Esdras 6 - Chuj San Sebastian Bible

X'ilchj jun ley alb'il cani

¹ Yuj cha, xya'n win rey Darío sayxc 'ilxoc 'a 'aj tzmolx ch'an̈ un̈ to niwc yel'ch 'a Babilonia;

² palta a 'a yol despacho 'a chon̈b' Ecbatana, 'a yol yic Media, ata 'ix 'ilchj jun ch'an̈ libro 'aj tz'ib'b'il can tastc nab'il cani, 'aj tzyal 'ixtic:

³ A 'a yic yab'lil yoch Ciro reyal, xyaln winac to tzb'ox sjel yatut Dios 'a Jerusalén. Caw wach' tz'aj yejm can yipnub'al yich sec wach' ata tz'ajx xajmb'al 'a yojol, 27 metro tz'aj ste'il, 27 metro pax tz'aj schiquin.

⁴ 'Ox stzol q'uen niwc q'uen tzeyb'il tz'och 'a 'a, jun tzol te 'a'nte'. Ax yuj stumnal 'oj lajwoc, a 'a win molm tumn yic win rey, ata tz'elta.

⁵ An̈jtona', ax jun tzo'n̈ yamc'ab' to nab'a oro, nab'a plata, yijnac 'elt Nabucodonosor 'a yol yatut Dios 'a Jerusalén, jun tzo'n̈ yijnac cot 'a Babilonia tic, 'ijx cab' pax meltzjoc, 'ajxcab' 'och 'a yet'l 'a yol yatut Dios, xchi jun checnb'il cha.

A tas xyal win rey

⁶ Xlajw yab'n win rey tas alb'il can cha, xya'n cot win rey Darío jun ley 'a win Tatnai gobernador yaj 'a stojlal 'aj tz'em c'u 'a sc'axpil 'e't a Éufrates, yet' 'a Setar-boznai, yet' 'a eb' yit yajlil eb', xyaln cot 'a eb' 'ixtic: 'Actjec can chon̈b' Jerusalén.

⁷ Man̈ e tench wan win gobernador yic chon̈b' Israel, yet' eb' tzjucb'tzan eb' tzb'on sjel yatut Dios, sb'o cab' chan̈ eb' 'a yet'l xoni.

⁸ An rey Darío in, an tzwal 'ayex, to tzex colwj yet' eb' israel tzjucb'tzan eb' tzb'on sjel yatut Dios. A 'a q'uen tumn tz'ajx yac' eb' 'ay 'a sc'axpil 'e't a Éufrates 'a win rey, a 'a q'uen tz'elt stojl eb' tzmunlj cha, matz 'ec' tiempo yajxi, sec wach' matz 'och wan jun munljel cha.

⁹ A wal tas tz'och yopiso 'a junjn c'u, man̈ cab' yac' palta yajx 'a eb' ya'mal 'och sti eb' 'anma 'a Dios 'ayc' 'a Jerusalén, a tzyal tas tzc'an eb': No quelm wacax, no mam calnelu, no quelm calnelu, yic tz'ajx no xajmb'alil, no tz'a smasnil 'a Dios 'ay yic satcha'an̈. Tz'ajx pax trigo, 'atz'am, yal uva yet' aceite. May cab' junc mach tzma'n 'eq'ui,

¹⁰ yic tzya'n eb' xajmb'al-l 'a Dios 'ay yic satcha'an̈. 'Och cab' lesl wuj an rey in tic yet' yuj eb' wunnal.

¹¹ An̈jtona an tzwala, toto 'ay junc mach matz yiclni tas tzwal tic, 'ijx cab' 'emt junc spatzb'il yatut, tzjoyx 'ejm lin̈an, ax 'a te tzlocx q'ue'i. Ax yatut cha, tzma'x can 'ejm lan̈chjoc, jun b'uln̈xoj tz'ajcni.

¹² A Dios 'ix si'n 'el 'aj tz'och 'emmquilal 'a sb'i 'a Jerusalén, a cab' tzsatn 'el smasnil eb' rey yet' eb' chon̈b' tzya'ch sc'ab' sjeln 'el jun ley tic, mto tzmac' 'ejm lan̈chjoc yatut Dios cha. An Darío in tic, an tzwac' jun checnb'il tic. Smasnil tastc tz'ib'x can tic, yowlal tzyiclx muc'uc, xchi win rey cha.

Xwach' b'o yatut Dios

¹³ Ax win Tatenai gobernador yaj 'a sc'axpil 'e't a Éufrates, yet' Setar-boznai, yet' pax eb' yitb'eym sb'a yet'oc, caw 'ix syiclj eb' sb'on 'icha 'ix yutj rey Darío yalni.

¹⁴ Ax eb' tzjucb'tzan jun munljel cha, x'ochx eb' swach' b'oc yatut Dios, masnto xlajw sb'o'i, 'icha wal yaj yaln can eb' schecb' Dios, atn Hageo, yet' Zacarías yunnal Iddo. 'Ixtnta x'aj swach' b'o yatut Dios cha. 'Ix b'o 'icha 'ix yutj yaln sDiosal chon̈b' israel, yet' tas xyal eb' sreyl Persia, atn Ciro, Darío yet' Artajerjes.

¹⁵ A yatut Dios cha, 'ix lajw sb'o 'a yoxl xo c'u yoch 'uj Adar, yic swacl xo ab'il yoch Darío reyl 'a Persia.

¹⁶ Ax eb' israel, eb' ya'mal 'och sti eb' 'anma 'a Dios, yet' jun tzo'n̈ xo eb' levita yet' smasnil eb' paxncta 'a Babilonia, 'ix sna eb' sq'uin̈l yatut Dios 'a tzaljc'ojlal.

¹⁷ A yic cha, 'ix ya'n eb' jun tzo'n̈ xajmb'al tic: jun ciente no quelm wacax, chab' ciente no mam calnelu, chan̈e ciente no quelm calnelu, yet' lajchwan̈ no mam chiwo, junjn no chiwo chi 'a yic junjn macn̈ eb' yin̈tl Israel, yic tz'ajx lajwc smasnil smul eb'.

¹⁸ Xlajw cha, x'ajx 'och junjn c'aj eb' ya'mal 'och sti eb' 'anma 'a Dios 'a stzol-l yiln yopiso, yet' jun tzo'n̈ xo eb' levita, x'ajx yopiso eb' 'a yatut Dios 'a Jerusalén, 'icha yaj stz'ib'x can 'a ch'an̈ libro yic Moisés.

Q'uin̈ snanb'il cot*r* yel eb' israel 'a libre

¹⁹ An̈jtona pax eb' paxncta 'a Babilonia cha, sna eb' q'uin̈ yic yelt eb' smam yichm eb' chi 'a libre 'a Egipto, 'a yic chan̈lajn̈e yoch b'ab'l 'uj.

²⁰ Ax eb' ya'mal 'och sti eb' 'anma 'a Dios yet' jun tzo'n̈ xo eb' levita, tox 'ix sacb'tzej sb'a eb' smasnil 'icha yaln ley. A eb' levita cha, a eb' xb'on jun tzo'n̈ no calnelu tzchix 'a yic q'uin̈ cha, atn no yic smasnil eb' yit chon̈b' eb' cha, no yic eb' ya'mal 'och sti eb' 'anma 'a Dios, yet' no yic eb' 'a mun yico'.

²¹ Smasnil eb' israel paxncta 'a Babilonia, schi eb' no xajmb'al yic jun q'uin̈ cha, yet' smasnil eb' xya'ch sb'a yet' eb', atn eb' spojjnac 'el sb'a 'a scal smaysch'olnilal eb' 'anma cajn 'a stz'ey eb', yic tzyaln sb'a eb' 'a Jehová sDiosal.

²² Uque c'u sna eb' sq'uin̈l 'ixm pan may yich 'a tzaljc'ojlal, yujto a Jehová a x'a'n 'och tzaljc'ojlal 'a snab'en eb', yujto xyac' jelmjoc snab'en win sreyl Persia, sec tzcolwj sb'on yatut Dios, atn sDiosal chon̈b' Israel.