Esdras 5 - Chuj San Sebastian Bible

X'elx yich sb'ox yatut Dios

¹ A eb' schecb' Dios 'a jun tiempoal cha, atn Hageo yet' Zacarías, yunnal Iddo, xyaln eb' 'a eb' 'aj Judá yet' 'a eb' 'aj Jerusalén yuj tas 'ix yal sDiosal eb' 'a 'a.

² Xlajw cha, a Zorobabel yunnal Salatiel, yet' Jesúa yunnal Josadac, 'ix 'ochx eb' 'a munljel, sb'on pax chan̈ eb' yatut Dios 'a Jerusalén, 'ix colwj eb' schecb' Dios chi yet' eb'.

^3-4 A 'a yic jun tiempoal cha, 'ix jaw Tatnai gobernador yaj 'a junx sc'axpil 'ec' a Éufrates, yet' Setar-boznai, yet' jun tzo'n̈ xo yitb'eym eb', Xyaln eb' 'ixtic: ¿Mach 'ix aln 'ayex, yuj cha, tze b'on chan̈ jun n̈a tic? ¿Tas sb'i jun tzo'n̈ winc chi tzb'on chan̈ jun n̈a tic? xchi eb'.

⁵ Palta caw 'aych Dios yet' eb' tzjucb'tzan jun munljel cha, ma'ix tenx 'och wan eb' yuj eb' 'ajc'ojl cha. Ax win gobernador cha, ton̈j 'ix yac' win tz'ib'xoc 'at jun ch'an̈ carta 'a win rey Darío, stan̈wni win spac yuj tas 'oj yutc win rey chi yaln yu'uj.

^6-8 Atn scopiail ch'an̈ carta tic. Tzyal ch'an̈ 'ixtic: Mamin rey Darío, tznib'j qui c'ojl on̈ to junc'ojlal cab' aji. Tzcac' ojcoc 'eli, to on̈ xit' 'at quil smasnil yol yic Judá. A yatut jun Dios niwn yel'chi, wan sb'o'i, 'ayx 'och q'uen niwc q'uen 'a 'a. Tox 'ix q'ue spatzb'il, caw wal 'aych 'ip yuj eb' 'aj Judá, jab'xoj sb'o yuj eb'.

⁹ Xlajw cha, xqui c'anb'n 'ixtc 'a eb' tzjucb'tzan jun munljel cha: ¿Mach 'ix alni tze b'on jun n̈a tic?

¹⁰ ¿Tas sb'i jun tzo'n̈ winc tzjucb'tzan jun munljel cha?, xqui chi 'a eb' on̈; ax qui tz'ib'n 'at sb'i eb' 'aych calni, sec tzojquej 'eli.

¹¹ 'Ix ta'w eb' 'ayn̈ 'ixtic: An̈ tic on̈, tzcal qui b'a 'a Dios 'ay yic satcha'an̈ yet' lum lum tic, wan qui b'on chan̈ sjel yatut qui Diosal on̈, atn jun sb'ojnac rey Salomón, win qui reyl an̈ israel on̈ tic 'a pecti 'on̈, xchi eb'.

¹² An̈jtona', xyaln pax eb', to a smam yichm eb' tzuntzjnac cot yowl sc'ojl Dios 'ay yic satcha'an̈, yuj cha, yajx 'och ab' eb' 'a yol sc'ab' win Nabucodonosor sreyl Babilonia, win yin̈tl eb' caldeo. Ab' ma'jnac 'ejm lan̈chjoc jun yatut Dios cha, xlajw cha, xyi'n 'at eb' 'anma 'a 'icha presoal 'a Babilonia cha.

¹³ Palta a yic yab'lil yoch Ciro sreyloc Babilonia, xyaln ab'i' to tzb'ox q'ue wan sjel yatut Dios 'a Jerusalén.

¹⁴ An̈jtona', yijnac 'at ab' win Nabucodonosor chi jun tzo'n̈ yamc'ab', to nab'a oro, nab'a plata, yijnac 'elt 'a yatut Dios 'a Jerusalén, 'ix 'at ya'nc 'och 'a yol yatut sdiosal 'a Babilonia. Ax ab' win rey Ciro x'a'n pax meltzjoc jun tzo'n̈ chi 'a Sesbasar, atn win 'ix 'ajx 'och gobernadoral.

¹⁵ 'Ix yaln ab' Ciro chi 'a Sesbasar, to tzyij 'at jun tzo'n̈ yamc'ab' chi 'a yatut Dios 'a Jerusalén. An̈j 'ijnoc 'a yet'l 'aj pojnc 'ejmi, ata tzb'ox chan̈ sjel yatut Dios cha, xchi ab' win Ciro cha.

¹⁶ Xlajwn̈ej sc'och Sesbasar 'a Jerusalén, xya'n 'ejm yipnub'al yich yatut Dios. Yictax cha, x'el yich sb'o'i, palta mantzac lajw sb'o ticnec.

¹⁷ A ticnec mamin rey, toto wach' jun tic tzab'i, tzqui c'an 'ayach, to tzsayx 'ilxc 'a eb' ch'an̈ un̈ molb'il 'a sdespacho win rey 'a Babilonia cha, toto yel a rey Ciro tz'a'n b'o sjel yatut Dios 'a Jerusalén, tzal cot cab'i', tas tzotj a cuyn 'a yib'n̈ jun tic, xchi eb' 'a scarta cha.