Esdras 10 - Chuj San Sebastian Bible

'Ijxnac 'el eb' 'ix 'ix chuc chon̈b'al

¹ Ya' sb'a wan sleslwi Esdras, caw wal tz'oq'ui tzyaln smasnil jun tzo'n̈ tic, cumn 'ejm 'a sti yatut Dios, caw niwn eb' yit israelal 'ix 'och 'oyn 'a stz'ey, eb' winac, eb' 'ix 'ix, yet' eb' 'unin. Caw wal ji'jmtac yoc' eb' 'anma chi yet'oc.

² Xlajw cha, ax Secanías yunnal Jehiel yin̈tl Elam, sc'ann spaxti', xyaln 'a Esdras 'ixtic: An̈ tic on̈, 'ix 'och qui mul 'a qui Diosalec, yujto 'ix quijquib'a yet' eb' 'ix 'ix chuc chon̈b'al. Palta b'i'an, 'ayt wal sb'omb'il 'ayn̈ israel on̈c tic, sec wach' tzon̈ 'ajx niwnc'ojlal.

³ A ticnec, tzqui b'o qui trato yet' qui Diosalec, to 'oj qui chec meltzjc eb' 'ix quistzil chi 'on̈, atn eb' 'ix chuc chon̈b'al yet' yune'. 'Oj qui yicljc tas tzal ach tic, yet' jun tzo'n̈ xo eb' tzxiw 'a schecnb'il Dios et'oc, ax qui b'on 'icha yaln sley.

⁴ Yuj cha, q'uen̈ wan muc'uc, yujto 'ay aln ec a b'on jun tic, an̈ xo tic, 'oj qui colwj et'oc. Te'wtzej a b'a, 'och cab' munljel cha, xchi eb'.

⁵ Xlajw cha, xq'ue wan Esdras, xya'n pural eb' syajlil eb' ya'mal 'och sti eb' 'anma 'a Dios ya'n sti' to tzyiclj eb' 'icha tas xyal Secanías, yet' jun tzo'n̈ xo eb' levita, yet' eb' yit israelal.

⁶ Yajn̈ej xyi'n 'el sb'a Esdras 'a sti yatut Dios. 'Ix 'at 'a scuarto Johanán, yunnal Eliasib, ata x'ec' 'ac'wl yu'uj, may jac tas sc'uxu, may pax jac tas xyuq'uej, yujto caw tzcus sc'ojl yuj smul eb' paxncta 'a Babilonia cha.

⁷ Xlajw cha, xya'n 'awtxoc cot smasnil eb' 'aj Judá yet' eb' 'aj Jerusalén, yic tzyamn sb'a eb' 'a Jerusalén cha, atn smasnil eb' xit'nc 'a 'icha presoal.

⁸ 'Ix smol aln eb' yajl chi yet' eb' 'ichmtac winac, to a mach matz c'och 'a yoxl c'u 'a jun yamnil cha, tz'ijx 'ec' tastc 'ay 'a eb', tz'ijx pax 'el eb' 'a scal eb' tot jawnc cha.

⁹ Yuj cha, smasnil eb' winc yic Judá yet' eb' yic Benjamín, 'ix syam sb'a eb' 'a Jerusalén 'a yoxl c'u cha, atn 'a junc'l yoch sb'aln̈il 'uj. 'Ix 'em wocn eb' smasnil 'a yamq'uil yatut Dios, caw wal tzxiw eb' yuj jun paxti cha, tz'ib'x pax eb' yuj n̈ab' tz'ejmi.

¹⁰ Xlajw cha, xq'ue wan Esdras win ya'mal 'och sti eb' 'anma 'a Dios, xyaln 'a eb' 'ixtic: —Ax tic x'och e mul, yujto xeyij e b'a yet' eb' 'ix 'ix chuc chon̈b'al, yuj cha, 'ixta x'aj scot maysch'olnil 'a quib'n̈ec an̈ israel on̈c tic.

¹¹ A ticnec 'ojquejec 'eli to x'och e mul 'a Jehová qui Diosalec yet' eb' qui mam quichmec, yicljec 'icha wal tznib'ej. Pojc 'el e b'a 'a scal eb' 'anma chuc chon̈b'al, tzeyactn can eb' 'ix 'ix cha, xchi Esdras 'a eb'.

¹² 'Ix ta'w eb' 'anma chi smasnil, xyaln eb' 'ixtc 'a caw 'ip: —'Oj qui b'o 'icha tzal cha.

¹³ Palta 'in matz yactj ya'n n̈ab' tic, matz tac' qui canc 'a yol caye tic, a jun tic man̈ jun chab'oc c'u 'oj yac' sbo jun tic, yujto caw niwn qui b'ey x'och qui mul cha.

¹⁴ Yel xom wach' cojn eb' qui yajlil tzcan sb'o yaj jun tic, ax smasnil eb' cajn 'a yol chon̈ab', eb' to yijnac sb'a yet' eb' 'ix 'ix cha, tztac' sjaw eb' 'a junc c'u man̈ najtloc tz'ajcni. Eb' juez yet' eb' yichm wincal junjn chon̈b', a cab' eb' tz'i'n cot eb'. 'Ixtnta 'oj caj qui masnil, masnto tzlajw yowl sc'ojl Dios 'a quib'n̈ec yuj jun tic, xchi eb'.

¹⁵ A 'a scal eb' 'anma paxncta 'a Babilonia cha, ata 'ay chan̈wn̈ eb' ma'ix chaj sc'ojl jun nab'en cha, atn Jonatán yunnal Asael, yet' Jahazías, yunnal Ticva, yet' chawn̈ levita atn Mesulam yet' Sabetai.

¹⁶ Palta ax eb' 'anma chi smasnil 'ix chaj sc'ojl eb' sb'on jun cha, yuj cha, 'ix si'n 'el Esdras eb' ya'mal 'och sti eb' 'anma 'a Dios, yet' jun tzo'n̈ winac, to yajl yaj 'a yib'n̈ eb' yican. A 'a yic b'ab'l c'u yic slajn̈il 'uj, ata syam sb'a eb' winc si'x 'el cha, x'em wocn eb' sb'eyc'ojlan jun tzo'n̈ mul cha.

¹⁷ Ax 'a yic b'ab'l c'u yoch b'ab'l 'uj, a yic cha, 'ix lajw sb'eyc'ojlan eb' smasnil eb' yijnac sb'a yet' eb' 'ix chuc chon̈b'al cha.

Slistail ewin chuc chon̈b'al yistzil

¹⁸ A eb' ya'mal 'och sti eb' 'anma 'a Dios yijnac sb'a yet' eb' 'ix 'ix cha, atn eb' tic: A 'a scal eb' yin̈tl Jesúa win yunnal Josadac, yet' 'a scal eb' yican: ata x'elt Maasías, Eliezer, Jarib, yet' Gedalías.

¹⁹ A eb' cha, sta'wj eb' sti'oc to tzpoj sb'a eb' yet' yistzil cha, 'ix ya'n eb' junjn no mam calnelu ofrendail yuj smul cha.

²⁰ 'A scal eb' yin̈tl Imer: ata x'elt Hanani yet' Zebadías.

²¹ 'A scal eb' yin̈tl Harim: ata x'elt Maasías, Elías, Semaías, Jehiel yet' Uzías.

²² 'A scal eb' yin̈tl Pasur: ata x'elt Elioenai, Maasías, Ismael, Natanael, Jozabad yet' Elasa.

²³ 'A scal eb' yin̈tl Leví: ata x'elt Jozabad, Simei, Kelaía (mto Kelita) Petaías, Judá yet' Eliezer.

²⁴ A 'a scal eb' tzb'itni: ata x'elt Eliasib. 'A scal eb' tan̈m puerta: ata x'elt Salum, Telem yet' Uri.

²⁵ 'A scal jun tzo'n̈ xo eb' yit israelal, ata x'elt eb' tic yijnac sb'a yet' eb' 'ix chuc chon̈b'al cha: A eb' yin̈tl Paros: ata x'elt Ramía, Jezías, Malquías, Mijamín, Eleazar, Malquías, yet' Benaía.

²⁶ 'A scal eb' yin̈tl Elam: ata x'elt Matanías, Zacarías, Jehiel, Abdi, Jeremot yet' Elías.

²⁷ 'A scal eb' yin̈tl Zatu: ata x'elt Elioenai, Eliasib, Matanías Jeremot, Zabad yet' Aziza.

²⁸ 'A scal eb' yin̈tl Bebai: ata x'elt Johanán, Hananías, Zabai yet' Atlai.

²⁹ 'A scal eb' yin̈tl Bani: ata x'elt Mesulam, Maluc, Adaía, Jasub, Seal yet' Ramot.

³⁰ 'A scal eb' yin̈tl Pahat-moab: ata x'elt Adna, Quelal, Benaía, Maasías, Matanías, Bezaleel, Binuy yet' Manasés.

^31-32 'A scal eb' yin̈tl Harim: ata x'elt Eliezer, Isías, Malquías, Semaías, Simeón, Benjamín, Maluc yet' Semarías.

³³ 'A scal eb' yin̈tl Hasum: ata x'elt Matenai, Matata, Zabad, Elifelet, Jeremai, Manasés yet' Simei.

^34-37 'A scal eb' yin̈tl Bani: ata x'elt Madai, Amram, Uel, Benaía, Bedías, Quelúhi, Vanías, Meremot, Eliasib, Matanías, Matenai, Jaasai.

^38-42 'A scal eb' yin̈tl Binuy: ata x'elt Simei, Selemías, Natán, Adaía, Macnadbai, Sasai, Sarai, Azarel, Selemías, Semarías, Salum, Amarías yet' José.

⁴³ 'A scal eb' yin̈tl Nebo: ata x'elt Jeiel, Matatías, Zabad, Zebina, Jadau, Joel yet' Benaía.

⁴⁴ A smasnil jun tzo'n̈ winc tic, yijnac sb'a eb' yet' eb' 'ix chuc chon̈b'al. 'Ay eb' 'ayx yunnal yet' eb' 'ix, palta xlaj spoj sb'a eb', xlaj pax eb' 'ix yet' eb' yune cha.