Ef 5 - Chuj San Sebastian Bible

A tas tzcutjec qui b'eyb'al

¹ An̈ec tic, yunnaln̈ec xo Dios ticnec, chamc'ojlb'iln̈ec xo yu'uj. Yuj cha, yowlal tzqui b'eylb'ejc 'icha sb'eyb'al.

² Qui ch'oxc qui chamc'ojlal 'a junjn c'u, yujto 'ixta on̈ yutj Cristo on̈ schamc'ojlanec, yic ya'n cham sb'a cujec. 'Icha no calnelu milb'il cham xajmb'alil, wach' sjab' 'a Dios, tzalj yet'oc, 'ixta x'aj Cristo smilx cham cujec.

³ A ticnec, yic on̈c xo Dios, yuj cha, man̈xtzac stac' calnec cot yab'xil 'ajmulal, junc tzann̈j maysch'olnil tzqui b'o yet' qui niwnal, mto jun nib'j 'och ricoal, wach'xam ton̈j tzqui nib'j calc jac speclal, palta man̈xtzac stac'a.

⁴ An̈jtona', matz tac' calnec jun tzo'n̈ q'uixweltac yalxi, yet' jun tzo'n̈ comn paxti'. Matz tac' ton̈j tzon̈ comn molamanec. Yujto a jun tzo'n̈ tic, caw man̈ smojc calnec. Yel xo wach' to tzca'c yuj diosal 'a Dios.

⁵ Cojquec xo, to a eb' tzb'on 'ajmulal, yet' eb' tzb'on tzann̈j junc maysch'olnil yet' sniwnal, yet' eb' tznib'n 'och ricoal, may xon yaln eb' yic yoch 'a yol sc'ab' Cristo, yet' 'a yol sc'ab' Dios. Toto tzqui nib'jec 'och ricoal, a 'a sat Dios, wan ca'nec 'och jun chi qui diosaloc.

⁶ Man̈ e cha 'ixtxoc paxti e b'a yuj eb' tzalni, to may yowlal qui b'onec jun tzo'n̈ tzwal tic. Caw wal may yel'ch tas tzyal eb', yujto atn 'a yib'n̈ eb' tzb'on jun tzo'n̈ tic, 'oj cot jun niwn yailal yuj yowl sc'ojl Dios, yujto matz yiclj eb' tas tzyala.

⁷ Yuj cha, caw man̈ comnoc tzeya'ch e b'a yet' eb'.

⁸ A 'a yic yalan̈, q'uic'q'uinl to yaj qui pixnec yuj qui b'eyb'al. Al ticnec, sacq'uinl xo yaj qui pixnec, yujto junxn̈ej cajc yet' Cajlil. Yic on̈c xo sacq'uinl ticnec. Yuj cha, yowlal wach' tzcutjec qui b'eyb'al.

⁹ Toto yel sacq'uinl xo yaj qui pixnec, caw wach' tzcutjec qui b'a, tojln̈ej tzcutjec qui nab'en. Cojn wal junc tas caw yel tzlaj calec.

¹⁰ Cuyc wal e b'a 'a jun tzo'n̈ tas caw wach' 'a sat Dios.

¹¹ Man̈ eya't e b'a 'a scal jun tzo'n̈ tas tzlaj sb'o eb' q'uic'q'uinl to yaj spixan, yujto a jun tzo'n̈ tas tzlaj sb'o eb', may jac yopiso. Yel xo wach' tzeyal-li, tze ch'oxli, to may yel'ch jun tzo'n̈ cha.

¹² Yujto a jun tzo'n̈ tas tzlaj sb'o eb' 'a c'ultaquil, caw q'uixweltac yalxi.

¹³ Palta jantcn̈ej tas tzb'o'i, c'uxn 'oj 'ajxc prowal yuj jun sacq'uinl yic Dios, ax scheclj 'eli. Yujto a jun sacq'uinl cha, a tz'a'n checljoc 'el smasnil tas.

¹⁴ Yuj cha, 'ay jun tzaln 'ixtic: Ach 'icha to waynac, 'ij 'el a wayan̈. Q'uen̈ wan 'a scal eb' 'icha to chamnc to. Ax Cristo 'oj 'a'nc sacq'uinl 'ayach, xchi.

¹⁵ Yuj cha, caw tzeyac' cuenta e b'a yuj e b'eyb'al, man̈ 'ichaoc eb' may snab'en 'a sat Dios. 'Ay cab' e nab'en 'a sat.

¹⁶ Caw tzeyac' eyip 'a yic Dios, ya' sb'a 'ayt jab'x tiempo, yujto a jun tiempoal tic, man̈x 'a sch'olnil.

¹⁷ Man̈ eya'ch e b'a man̈ nab'enal, cuyc e b'a sec tznachj 'el eyu'uj, tas wal tznib'j Dios tzqui b'o'ec.

¹⁸ Man̈ ex 'och 'u'm 'an̈il, yujto a te 'an̈, tzwach' juw 'el qui nab'enec yuj te'. Yel xo wach' a Yespíritu Dios 'aych yajlilal 'ayn̈ec, man̈oc te 'an̈ cha.

¹⁹ A yic tzlaj eyamnc e b'a, tze b'itnej jun tzo'n̈ salmo, yet' himno, yet' jun tzo'n̈ xo b'it yic Dios. A yic tzex laj b'itni, tzeyal wach' paxti 'a Cajlil 'a smasnil e c'ojol.

²⁰ Smasnil tiempo, tzlaj eyac' yuj diosal 'a qui Mam Dios yuj jantcn̈ej tas tzlaj 'ec' 'ayex. A 'a sb'i Cajlil Jesucristo tzlaj eyac' yuj diosal.

A schecnb'il Dios 'ayn̈ec

²¹ Yiclum tzeyutj e b'a 'ayx junjn ex, yuj e xiwc'ojlal 'a Cristo.

²² Ax 'istlab'il ex, yiclum tzeyutj e b'a 'a eyichmil, 'icha tzeyutj e b'a 'a Cajlil.

²³ Yujto a eyichmil, 'icha to e jolm yaji. 'Icha Cristo, sjolm yaj 'a yiglesia. An̈jtona', qui Colmalec paxi, 'icha to sniwnal cajec.

²⁴ An̈ec 'ayn̈ 'och stz'acb'oc yiglesia tic, yiclum tzcutjec qui b'a 'a Cristo. Yuj cha, ax 'istlab'il ex, yowlal 'ixta tzeyutj e b'a 'a eyichmil. 'Emmquilal tzeyutj e b'a, tzeyiclni jantcn̈ej tas tzyal eyichmil 'ayx junjn ex.

²⁵ Ax xo ex 'ichmilab'il, caw tze chamc'ojlej eyistzil, 'icha tzyutj Cristo schamc'ojlan yiglesia. A xyac' cham sb'a cujec,

²⁶ yic on̈ yi'nec 'och yico'oc. A yic on̈ 'emc 'a yol a', 'ix 'ijx 'el qui mulc yuj spaxti'.

²⁷ 'Ixta on̈ yutjec an̈ yiglesia on̈ec, sec caw wach'n̈ec 'a sat, yic 'oj qui c'ochc 'a yojltac. Yuj cha, a wal ta', man̈x 'a qui tu'al, qui maysch'olnilal. Man̈x 'a junc tas 'aych 'a qui pixnec. An̈j wal 'a 'oj ca'c 'och qui nab'en. Man̈x 'a jac qui paltailec ta'.

²⁸ An̈jtona', ax 'ichmilab'il ex, 'ixta tzeyutj e chamc'ojlan eyistzil. Toto tzlaj e chamc'ojloc eyistzil, tzyal 'el'chi, ax wan eya'iln e b'a.

²⁹ Toc 'ay junc mach tzchichn 'och 'a sniwnal. Qui masnilec, ya'ilb'il qui niwnalec cu'uj, tzca'nec pax servil. Ax Cristo, 'ixta tzon̈ yutjec pax an̈ yiglesia on̈c tic,

³⁰ yujto 'icha to caw sniwnal cajec.

³¹ Yuj cha, a win winac, 'oj yactc can win smam snun, sec junxn̈ej tz'aj win yet' yistzil. Ax eb' schawn̈il, 'icha wal to junxn̈ej 'anmal tz'ajcn eb', xchi 'a Ch'an̈ U'un̈.

³² A jun tzo'n̈ paxti tic, caw niwn yel'chi. Yujto tzin na'a, to tzyal cuj an̈ec yiglesia 'on̈c Cristo, 'icha cajc yet' quitb'eymec, 'ixta tzon̈ 'ajc pax yet'oc.

³³ An̈jtona', tzyaln pax eyuj junjn ex ax 'ichmilab'il ex, chajtlto tze chamc'ojlej eyistzil, 'icha tzeyutj eya'iln e b'a junjn ex. Tzyaln pax eyuj ax 'istlab'il ex, to yowlal niwn cab' yel'ch eyichmil 'ayx junjn ex.