Ef 1 - Chuj San Sebastian Bible

Tz'el yich scarta Pablo

¹ An Pablo in tic, schecb' in Jesucristo, yujto 'ixta x'el 'a sc'ojl Dios. Tic tzin tz'ib'j 'at jun in carta tic 'ayx ex yic xo Dios 'a chon̈b' Éfeso. Caw 'aych e c'ojl 'a Cristo Jesús si'mb'il.

² Tzin nib'ej, a qui Mam Dios yet' Cajlil Jesucristo, tzyac' swach'c'ojlal yet' sjunc'ojlal 'ayx ta'.

A swach'c'ojlal Dios

³ Calc wach' paxti 'a qui Mam Dios, atn 'a Smam Cajlil Jesucristo. C'uxn xyac' jun tzo'n̈ wach'l yic Espíritu 'ayn̈ec, atn jun tzo'n̈ yic satcha'an̈, yujto junxn̈ej cajc yet' Cristo ticnec.

⁴ Yictax mantzac b'o yolyib'n̈q'uinl tic, a Dios si'jnacn̈ec xon yuj Cristo, sec an̈j 'ayn̈ec yico', man̈x 'a jac qui paltailec 'a sat.

⁵ Til wal schamc'ojlal 'ayn̈ec. Yuj cha, yictax pecti', snajnac cani, to 'oj on̈ yunnalquec yuj Jesucristo, yujto 'ixta x'el 'a sc'ojol.

⁶ Yuj cha, tzcalc wach' paxti 'a 'a, yujto caw niwn yel'ch swach'c'ojlal. 'Ix ch'ox wal swach'c'ojlal tic 'ayn̈ec, yujto junxn̈ej cajc yet' Yunnal, atn jun caw chamc'ojlb'il yu'uj.

⁷ Yuj wal sniwn chamc'ojlal, on̈ scolnec 'el yet' schic'l Yunnal, yic 'ix cham cujec. Caw xlajw can qui mulc yu'uj.

⁸ Yuj swach'c'ojlal tic, c'uxn xyac' sjelnal 'ayn̈ec. 'Ix ya'n nachjc 'el cujec.

⁹ 'Ay wal jun tas snajnac can Dios, to tzb'o 'a yolyib'n̈q'uinl tic 'icha tznib'ej. May xon mach 'ojtnac jun tic 'a pecti'. Palta ticnec, a tz'a'n cojcoquec 'el tas tznib'j tzb'o cha.

¹⁰ A yic 'oj c'och stiempoal, 'oj 'el'choc jun snib'jnac cha. Yujto ata 'oj swach' 'a'c 'och smasnil mach yet' smasnil tas 'a yol sc'ab' Cristo. Wach'xam jun tzo'n̈ 'ay 'a satcha'an̈, yet' pax jun tzo'n̈ 'ay 'a yolyib'n̈q'uinl tic, junxn̈ej 'oj yutc ya'n 'och smasnil 'a yol sc'ab' cha.

¹¹ Yictax pecti', sic'b'iln̈ec xon 'el yuj Dios, yic 'oj qui chac quic 'oj yac' 'ayn̈ junjn on̈, yujto junxn̈ej cajc yet' Cristo. 'Oj 'el'choc jun tic 'icha tznib'j Dios, yujto a tzb'on smasnil tas 'icha tznib'ej.

¹² An̈ tic on̈, qui b'ab'l 'a'jnac 'och Cristo yipc qui c'ojl on̈. Yuj cha, x'el 'a sc'ojl Dios to cuj on̈, tzalx wach' paxti 'a 'a, chajtlto caw niwn swach'il.

¹³ Ax xo paxi, yic eyab'n jun 'ab'x caw yel, atn yab'xil qui colnb'il, eya'n 'och e c'ojl 'a Cristo quet' on̈. Yuj cha, junxn̈ej ex 'aj yet'oc. 'Ix 'och Yespíritu Dios 'a e pixan, 'icha tz'aj yajx 'och junc seyo 'a junc tas. Yuj cha, chequel, to yic ex xo Dios. Yujto ya'jnac can Dios sti', to tzya' cot 'ayn̈ec.

¹⁴ Yuj Yespíritu 'aych 'ayn̈ec, yuj cha, cojtac to 'oj qui chac jun quic 'oj yac' Dios 'ayn̈ec. Atta 'oj checljoc 'el qui colnb'ilec an̈ yic on̈c xo tic. Ata 'oj alxc wach' paxti 'a 'a, chajtlto caw niwn swach'il.

Sc'anjnac Pablo sjelnal eb' creyente

¹⁵ Tic 'ix wab'i, chajtlto caw tzeya'ch e c'ojl 'a Cajlil Jesús. 'Ay ab' pax e chamc'ojlal 'a jantcn̈ej eb' yic xo Dios quet'ec.

¹⁶ Yuj cha, a yic tzin leslwi 'a junjn 'ejm eyu'uj, tzwac' yuj diosal 'a Dios eyu'uj.

¹⁷ A sDiosal Cajlil Jesucristo, atn qui Mamc caw niwn yel'chi. Tzin c'an 'a 'a, sec 'oj yac' sjelnal 'ayx yuj Yespíritu, sec 'oj wach' nachjc 'el eyu'uj, tas 'ac'b'il cojcoquec 'eli. 'Ixta to b'i'an, ax e wach' 'ojcan 'el qui Mam Dios.

¹⁸ Tzin c'an 'a 'a, sec 'oj swach' jacc e nab'en, sec 'oj wach' nachjc 'el eyu'uj, tas 'aych yipc qui c'ojlec, atn jun 'aj 'awtb'iln̈ec yuj Dios. Ax swach' nachj 'el eyu'uj, chajtlto man̈x jantcoc swach'l jun quic 'oj yac' 'ayn̈ec, yujto yic on̈c xo.

¹⁹ Tzin c'ann pax 'a 'a, sec 'oj eyojcoc 'eli, to caw niwn yel'ch spoder, tztac' yuj smasnil. Atn jun chi 'aych 'ayn̈ec, yujto tzca'c 'och qui c'ojl 'a 'a. Sch'oxjnac, to caw niwn spoder si'mb'il,

²⁰ yic ya'n pitzwc pax Cristo 'a scal eb' chamnac, yic ya'n 'ejm wocn 'a swach' c'ab' 'a satcha'an̈.

²¹ Yuj cha, yel xo wal niwn yel'ch Cristo 'a yib'n̈ smasnil eb' yajal, yet' jun tzo'n̈ xo eb' 'aych yajlil, yet' eb' 'ay spoder man̈ checloc, yet' eb' 'ay yopiso ya'n mandar. Wach'xam 'a jun tiempoal tic, wach'xam 'a jun tiempoal tot 'oj jawoc, yel xo wal niwn yel'ch 'a yib'n̈ smasnil eb' tzlaj b'inaxi.

²² C'uxn 'ix ya'ch Dios smasnil tas 'a yol scab' Cristo. 'Ix ya'n pax yopiso yoch Syajlilc yiglesia, 'icha to sjolm yaji.

²³ Ax yiglesia tic, 'icha to sniwnal yaji, tz'acn tzch'oxl swach'il. A Cristo tic, tz'acn yaj pax smasnil tas yu'uj.