Ec 9 - Chuj San Sebastian Bible

A tas smoj tzqui b'o'o

¹ A wal yic xwa'n 'ip in cuyn jun tzo'n̈ tic, 'ix wojcan 'eli, to a tas tzb'o eb' wach' yet' eb' jelan, a 'a yol sc'ab' Dios 'ayq'ui. May junc on̈c cojtac tas 'ayc' 'a cojltac, tom 'oj qui chamc'ojlaxi mto 'oj qui chacx 'eli.

² Palta ax tz'aji, jun lajnn̈ej pax tz'aj sjaw 'a quib'n̈ec. Tzjaw 'a yib'n̈ eb' tojl snab'en yet' 'a eb' tu snab'en, 'a eb' wach' yet' 'a eb' tu'. Tzjaw 'a yib'n̈ eb' yiclum yet' 'a yib'n̈ eb' man̈ yiclumoc, 'a eb' tzyac' xajmb'al yet' 'a eb' matz yac' xajmb'al; lajn junc may smul yet' junc 'ay smul, tzjaw 'a yib'n̈ eb' tzlocn sb'i Dios yet' eb' tzxiw slocn sb'i.

³ 'Ay jun tas tu tzb'o 'a scal smasnil tas tzuj 'a yolyib'n̈q'uinl tic: atn yujto junn̈j tas tzon̈ satnec 'eli. Ax tas 'ayc' 'a qui nab'enec qui masnil, atn maysch'olnil yet' man̈ nab'enal; ax yic tzjaw tza'n̈joc qui chamlec 'a quib'an̈, tzon̈ satc can pax 'ejmi.

⁴ A eb' mantzac chami, tzat stac' to snan sb'a eb', 'intax junc no tz'i pitznto, wach' to yic no 'a yib'n̈ junc no chamnc león.

⁵ A eb' 'anma mantzac chami, yojc eb' to 'oj cham eb'; palta ax eb' chamnc xo, toc 'ayt jac tas yojc eb'. Man̈x 'a sganar eb', satnc xo sc'ojl 'anma 'a eb'.

⁶ A 'aj tzmucx junc mach, ata tzlajw can c'och yet' schamc'ojlal, schichnc'ojlal yet' tas maysch'olnil nab'il yu'uj. Man̈x 'a xon b'a'n̈ 'ay yaln yic 'a junc tas tzb'o 'a yolyib'n̈q'uinl tic.

⁷ Ex wit 'anma'il, ca'c tzaljoc qui c'ojl qui wa'i, tzcu'nec tas tzcuq'uej, yujto a jun tic caw wach' 'a sat Dios.

⁸ Wach' cab' yilx qui pichlec tzca'c 'ochi, tzca'nec q'ue yan̈l qui jolom.

⁹ Yujto tzab'n jab' qui q'uinlec 'ix yac' Dios, yuj cha, junjn mach tzalj cab' yet' yistzil chamc'ojlb'il yu'uj. Atn chi tz'ajx spacc 'ayn̈ec yuj Dios yic tzcab'nec syal qui munlj 'a yolyib'n̈q'uinl tic.

¹⁰ A smasnil tas tzqui b'o'ec, qui b'oc 'a smasnil qui c'ojol; yujto a yic 'oj qui chamec, yic 'ayn̈ecx 'ec' 'a campusan, toc 'ayt tas 'oj qui b'oc ta'. Ata', man̈x 'a tas 'oj qui na'ec, man̈x 'a pax yel'ch jelnal ta'.

A tas man̈ tojloc tzb'o'i

¹¹ 'Ay junx tas xwil 'a yolyib'n̈q'uinl tic: Man̈ smasnilc tiempo an̈j eb' jeln sb'ey tz'a'n ganar, man̈ smasnilc pax eb' jeln ya'n owl tz'a'n ganar; man̈ smasnilc eb' jelan, wach' yec' tiempo yu'uj. Man̈ smasnilc eb' 'ay snab'en tz'och ricoal, man̈ smasnilc eb' cuywnac tz'och 'a niwc 'opiso; palta a tzyala tas tzchachj yuj junjn mach.

¹² An̈ 'anman̈ec tic, man̈ cojcoquec jantc qui q'uinal; 'icha tzyac' no chay tzcan 'a yojl ch'an̈ chim, mto 'icha no ch'ic tzcan 'a ya'al, 'ixta 'on̈ec, may tas nan cujec, ax tz'aji, ata tz'el-l tza'n̈joc junc tas 'a quib'n̈ec.

¹³ An̈jtona', 'ay junx tas xwil 'a yolyib'n̈q'uinl tic, caw niwn yel'ch jun cuynb'il 'ix wij can 'a 'a:

¹⁴ 'Ay jun yune chon̈b' man̈ niwnoc 'anma cajn 'a 'a, ax x'aji, 'ix jaw jun win rey to niwn sb'isl eb' soldado, 'ix yoyn sb'a eb' 'a yic tzya'n eb' owl yet'oc.

¹⁵ Palta a 'a jun yune chon̈b' cha, ata cajn jun win meb'a winac, cojn b'i'an to caw wal jelan. Tecn xtechj scoln jun chon̈b' chi yet' sjelnal cha, palta may mach xchan 'ab'nc tas xyala, may xon mach xyiclni.

¹⁶ Yuj cha, wach'xam a sjelnal junc win meb'a cha, to may yel'ch 'a sat 'anma', may mach tznib'n 'ab'nc tas tzyala, palta an tic tzwala to yel xo 'ay yel'ch jelnal 'a yib'n̈ yip eb' tzte'wtzej sb'a.

¹⁷ Yel xo wach' cab'nec spaxtin junc 'ay snab'en to c'un spaxtin 'a yib'n̈ pax yic tzcab'n spaxtin junc rey may snab'en to caw ow spaxtini.

¹⁸ Yel xo niwn yel'ch jelnal, 'a yib'n̈ yamc'ab' yic owal, yujto yel xo niwn tas tzjuw 'el cujec toto man̈ wach'c tzcutjec qui nani yic tzqui b'on junc tas.