Ec 7 - Chuj San Sebastian Bible

Man̈ lajnoc jelnal yet' man̈ nab'enal

¹ Yel xo wach' to wach' qui b'inaxec 'a yib'n̈ pax to su'q'ui ye'c qui jab' yet' perjuma. Yel xo wach' jun c'u yic tzon̈ chamec, 'a yib'n̈ pax jun c'u yic tzon̈ 'aljec.

² Yel xo wach' yic tzon̈ 'atc tan̈j 'ac'wl 'a 'aj tz'och chamel, 'a yib'n̈ to tzon̈ 'atc can 'a q'uin̈, yujto a chaml cha, to quiquec yaj qui masnil. Wach' toto tzqui nac 'a yib'an̈ yic pitzn on̈c to.

³ Yel xo wach' to tzon̈ cusec, 'a yib'n̈ pax to tzon̈ tzewjec, yujto wach'xam cusltac yilx qui satec, palta tzb'o qui nab'enec yu'uj.

⁴ A eb' 'ay snab'en, tzna eb' yuj schamel, ax eb' may snab'en, a 'a q'uin̈ 'ayb't snab'en eb'.

⁵ Yel xo wach' toto tzqui chajec cab' tennb'il tzyac' junc mach 'ay snab'en, 'a yib'n̈ pax to tzon̈ cob' yalc wach'l junc may snab'en.

⁶ A yic tzcab'nec sjaj eb' may snab'en stzewji, caw may jac yel'chi, lajn wal cab'nec 'icha yic tzpo'chj te q'uix stz'a yuj c'ac'.

⁷ A q'uen c'ultac tumin, a q'uen tz'a'n yixtc 'el sb'a eb' jelan, lajn xoj tz'ajcn eb' 'icha eb' may snab'en.

⁸ Wach'xam a yic tz'el yich junc tas janc'n̈ej tzaljc'ojlal, palta ax yic tzb'o 'el'chi, yel xo niwn tzaljc'ojlal 'a jun c'u cha. Toto 'emmquilal tzcutjec qui b'a, yel xo wach' quiquec 'a yib'n̈ pax to cob' tzquijec chan̈ qui b'a.

⁹ Man̈ c'unoc cab' scot cowlec, yujto a jun owl cha, yic eb' may snab'en yaji.

¹⁰ Toto 'ay qui nab'enec matz calc 'icha eb' may snab'en, yujto a eb' cha tzyal eb' 'ixtic: A 'a pecti' caw wach' xcottch tiempo, ax ticnec caw wal tzjuwi, xchi eb'.

¹¹ Toto 'ay qui jelnalec, yel xo wach' quiquec 'a yib'n̈ to tz'ajx junc tas qui macloc 'a yolyib'n̈q'uinl tic.

¹² A jelnal cha, tzcolwj 'ayn̈ec 'icha scolwj q'uen tumin, palta yel xo wal wach' jun jelnal cha, yujto tzon̈ yijec b'ey 'a junc'ojlal.

¹³ Tzcham wal quilnec tas b'ob'il can yuj Dios: A tas coxo yajcn yu'uj, toc tztac' qui tojlb'tzani.

¹⁴ Toto wach' cajc tzquila, ca'c tzaljoc qui c'ojol; palta toto man̈ wach'c cajc tzquil jun, qui nac wal si'mb'il, to a Dios 'ixta tz'utn chac'aj tic. An̈ 'anman̈ec tic, man̈ cojcoquec tas tzqui chajec qui b'a yet' 'a cojltac.

¹⁵ A 'a jab' in q'uinl to may yel'ch tic, ata 'ix wil smasnil jun tzo'n̈ tic: 'Ay eb' 'anma caw wach' snab'en, palta yajn̈ej tzcham eb'. 'Ay pax eb' 'anma caw wal maysch'olnil sb'eyb'al, palta najtl tiempo tzyil eb'.

¹⁶ Yuj cha, man̈ on̈ 'e'c 'a yib'n̈ ca'nec 'och qui b'a wach'il, man̈ on̈ 'e'c pax 'a yib'n̈ ca'nec 'och qui b'a jelnal, sec wach' ma'oj quixtquec 'el qui b'a.

¹⁷ Man̈ qui b'oc maysch'olnil, man̈ ca'c pax 'och qui b'a man̈ nab'enal, sec wach' ma'oj qui seb' chamec.

¹⁸ Wach' tzcutjec qui yamn 'och wan qui b'a 'a jun tzo'n̈ tic, man̈ ca'c sat 'a qui nab'en. Toto 'ay yel'ch Dios 'a qui satec, wach' 'oj quelc c'och yet' jun tzo'n̈ tic.

¹⁹ A junc mach jelan, tz'ajx ste'nal yuj sjelnal cha, 'ec'b'al yip 'a yib'n̈ lajn̈wan̈oc eb' soldado jeln 'a junc chon̈ab'.

²⁰ Palta may junc on̈ec caw tojl qui b'eyb'al 'a yolyib'n̈q'uinl tic, yic to may 'aj tz'och qui mulec.

²¹ Man̈ qui chac cab' smasnil tas tzalxi, sec toto tu 'oj yal eb' qui checb' 'ayn̈ec, man̈ yac 'oj cab'ec,

²² yujto cojquec paxi, to 'ay 'aj tu xlaj calc pax 'a junc mach.

Tzb'eyc'ojlax junc tas yet' jelnal

²³ A smasnil jun tzo'n̈ tic, xin b'eyc'ojlej eb' yet' in jelnal, yujto 'aych wal 'a in nab'en, to jeln tzin 'aj 'el'chi. Palta matz nachj 'el wu'uj.

²⁴ A smasnil jun jelnal tic, matz nachj 'el wu'uj, yujto caw wal 'ajltac yojcax 'eli, may mach tznachj 'el yu'uj.

²⁵ 'Ix wac' wal in tiempo in cuyni, xin sayc' yet' jelnal yic tzwojcan 'eli, tas yaj smasnil. A yic xnachj 'el jun tzo'n̈ tic wu'uj, 'ix wojcan 'eli, to man̈ wach'c 'a sat Dios yic pit tzcutj qui b'a yuj qui man̈ nab'enal.

²⁶ 'Ay wal jun tas yel xo wal tu x'ilchj wuj 'a yib'n̈ chamel. Atn 'ix 'ix caw wal 'ay smon yejm win winc yu'uj, man̈xtzac yactj 'el 'ix win winc cha. A win winc yiclum 'a Dios, matz 'ejm win yuj 'ix, palta ax win tzb'on xon maysch'olnil, tzmonchj win yuj 'ix.

^27-28 A yic xwa'n 'ip wojcan 'el jun tzo'n̈ tic, til to wal tas mantzac wojquej 'eli. Palta 'ay jun tas 'ix wojquej 'el 'a scal jun tzo'n̈ tic, atn jun tic: cojn jun winc caw 'ay yel'ch 'a scal jun mil eb' winac. Ax 'a scal eb' 'ix 'ix, may junc 'ix caw 'ay yel'ch x'ilchj wu'uj.

²⁹ Cojn tas x'ilchj wu'uj, to an̈ 'anman̈ec tic, caw tojl on̈ 'aj qui b'oc yuj Dios, palta ax ticnec, caw wal yelc'ojlal on̈ juwc 'eli.