Ec 3 - Chuj San Sebastian Bible

Smasnil tas 'ay sc'ual

¹ Smasnil tas 'ay 'a yolyib'n̈q'uinl tic, 'ay sc'ual yet' yorail yet'i:

² 'Ay yorail 'aljelal, 'ay pax yorail chamel. 'Ay yorail yawx junc tas, 'ay pax yorail sto'x cha'an̈.

³ 'Ay yorail smilx 'anma', 'ay pax yorail yan̈txi. 'Ay yorail sma'x 'ejm junc tas, 'ay pax yorail sb'ox cha'an̈.

⁴ 'Ay yorail yoch 'oq'uel, 'ay pax yorail yoch tze'ej. 'Ay yorail yoch cusc'ojlal, 'ay pax yorail yoch q'uin̈.

⁵ 'Ay yorail sjulx puc q'uen q'ue'en, 'ay pax yorail si'x monto q'ue'en. 'Ay yorail la'jb'a, 'ay pax yorail ma'ay.

⁶ 'Ay yorail sayx junc tas tzsati, 'ay pax yorail man̈xtzac sayxi. 'Ay yorail smolx junc tas, 'ay pax yorail sjulx 'eli.

⁷ 'Ay yorail tzjat junc tas, 'ay pax yorail snipxi. 'Ay yorail sictac tzon̈ 'ajec, 'ay pax yorail tzon̈ paxtinec.

⁸ 'Ay yorail 'ay chamc'ojlal, 'ay pax yorail chacjb'ail. 'Ay yorail yoch owal, 'ay pax yorail yoch junc'ojlal.

⁹ ¿Toc 'ay jac qui ganarec yic tzon̈ cob' munljec an̈ 'anman̈ec tic?

¹⁰ An tic, xwila to til wal munljel 'ix ya'cn Dios qui b'o'ec.

¹¹ Caw wach' xyutj Dios sb'on smasnil tas, toto tzb'o 'a 'icha sc'ual. 'Ix ya'n pax qui nib'quec yic tzcojcan 'elec smasnil tas tot oj ujc yic b'aq'uin̈, palta matz yac' wal cojcoc 'elec si'mb'il tas tzb'o'o.

¹² An tic xwojquej 'eli to may junc xo tas wach' qui b'onec an̈ 'anman̈ec tic, cojn to tzon̈ tzaljec, wach' cab' pax tzcutjec qui b'a ya' sb'a pitzn on̈ec.

¹³ A tas tzyac' Dios 'ayn̈ec to tzon̈ tzaljec qui wa'i, tzcu'nec tas tzcuq'uej, tzca'nec pax tzaljoc qui c'ojl yet' qui munljelec.

¹⁴ 'Ix wojcan 'eli, to a smasnil tas b'ob'il yuj Dios, 'ayc'n̈ej 'a smasnil tiempo. May tas tztac' ca'nec 'och stz'acub', matz tac' pax qui'nec 'el jab'oc. A Dios 'ixta x'utni, sec wach' tzon̈ 'ochc 'emmquilal 'a 'a.

¹⁵ A tas 'ayc' ticnec, toxn 'ayc' xon 'a yic pecti', ax tas tot 'oj jawoc, toxn 'ayc' xon pax 'a yaln̈tax cha, ton̈j tzmeltztej sb'a yuj Dios.

A tas smoj sb'eylb'axi

¹⁶ A 'aj tzb'eyc'ojlax eb' 'anma 'a yolyib'n̈q'uinl tic, smoj wal to 'ay wach'il yet' tojlal, palta xwilni to cojn maysch'olnil tzb'o ta'.

¹⁷ Yuj cha, tzin nan 'ixtic: A Dios 'oj qui b'eyc'ojlanec an̈ 'anman̈ec tic, wach'xam wach'n̈ec mto may qui ch'olnilec, yujto a smasnil tas yet' tas tzlaj uji, 'ay sc'ul 'oj b'eyc'ojlaxoc, xin chi.

¹⁸ An̈jtona', xwaln pax yuj qui b'eyb'alec an̈ 'anman̈ec tic, to a Dios tzon̈ 'a'nec prowal yic tznachj 'el cujec, to lajn on̈c 'icha no noc'.

¹⁹ Wal yel an̈ 'anman̈ec tic, lajn tzon̈ 'ajc qui satl yet' no noc' cha, yujto tzcham no', tzon̈ chamc paxi. Lajn tzcutjec qui'n quic' yet' no'. Man̈ 'ec'b'aloc quel'chec 'a no'. Smasnil jun tzo'n̈ tic nab'an̈ej.

²⁰ Junn̈j lugar 'aj tzc'och qui niwnalec tic yet' no noc' cha, yujto a 'a lum lum cotn̈c on̈ec, an̈jtona', a pax ta tzon̈ meltzjec can qui masnil.

²¹ Toc 'ay junc mach tzte'wtzej sb'a yalni to a qui pixnec an̈ 'anman̈ec tic to 'ixc tzq'uecn 'a satcha'an̈, ax sq'uinl no no' to a 'a sat lum tic tzsatcn 'ejmi.

²² 'Ix nachj 'el wu'uj, to may junc xo tas wach' qui b'onec, cojn to tzca'c tzaljoc qui c'ojl yet' tas tzquijec 'a qui munljel, yujto 'ixta yajcn 'a quib'n̈ec. ¡Toc 'ayt mach 'oj alnc cab'ec tas 'oj ujc 'a yic chamnc on̈c xo!