Ec 12 - Chuj San Sebastian Bible

¹ Ya' sb'a 'unn ext 'anma', nann̈ej cab' eyu'uj mach b'ojnac ex, ya' sb'a mantzac e yab' syal yuj 'ichm 'anma'il, nac cot Dios. Yujto 'ay jun tiempoal 'oj eyal 'ixtic: Man̈x 'a qui tzaljc'ojlal, nab'a xoj cob' pitzn on̈, 'oj e chioc.

² Nac cot jun Dios b'ojnac ex, ya' sb'a wach' to eyiln yoc c'u, yoc 'uj yet' c'anal. Yujto 'oj niwtjoc sjaw b'elb'noc yailal.

³ 'Ay jun c'ual, a e c'ab' tzex coln ticnec, 'oj 'ibxoc cha'an̈. A e yoc to caw 'ay yip, 'oj 'el yip. Man̈x 'a pax e ye 'oj eyac' cach'nc tas tze c'uxu, ax yoch pax 'a e sat.

⁴ A yic 'oj jawc jun tiempoal cha', man̈x 'oj eyab' tas tzalx 'a caye; man̈x 'oj eyab' pax sc'an̈ q'uen cha'; pitzn ex xo yic 'oj 'oc' no ch'ic 'a yic sutmj 'ac'wal, man̈x 'oj eyab' yoch b'it 'a e tz'ey.

⁵ 'Oj e xiw e q'ue 'a junc cha'an̈, 'ay xo smay eyec' 'a yoltc b'e. Ax syamn 'och sacb' xil e jolom, c'ojnc'ojnil xoj e yec' machljoc. Man̈x 'a pax tas 'oj e na 'a eyitb'eyum, yujto wan xo e 'at 'a jun e cajnub' 'a jun 'ejmn̈ej, ax eb' 'anma 'a yoltc caye 'oj laj 'oc' eb yuj e chamlil.

⁶ Qui nac cot jun Dios on̈ b'onec, yujto 'ay jun c'ual 'oj lajwc c'och qui q'uinlec 'icha junc q'uen lámpara oro tzpoji yic tzn̈i'chj cot scadenail to nab'a plata yamjnac. Mto 'icha tz'aj spoj junc lum xalu yic lechlab' a tzn̈i'chj sch'an̈il yic tz'ijx q'uet a yet' 'a yol junc xab'.

⁷ A yic 'oj lajwc c'och jab' qui q'uinlec tic, ax qui niwnalec 'oj meltzjoc can pax 'och poccal 'a sat lum tic, 'icha xon yaj 'a yic yaln̈taxi; ax qui pixnec, 'oj meltzjoc can pax 'a Dios, yujto a 'a'jnac 'ayn̈ec.

⁸ An alm in 'el 'ab'x tic, an tzwal jun 'ejm xo: to a smasnil jun tzo'n̈ tic, may xon jac yel'chi.

Jun tzo'n̈ slajb' paxti tzalx cani

⁹ A yic in jelnb'i, til wal tas wach' xwac' yojcoc 'el eb' wit 'anma'il. An̈jtona', til wal jun tzo'n̈ xo paxti xlaj in cuyu', xlaj wa'n 'och eb' 'a stzolil.

¹⁰ 'Ix wac' scha sb'a jun tzo'n̈ caw wal wach', yic tzin tz'ib'n can jun tzo'n̈ tas caw wal yel smoj stz'ib'xi.

¹¹ A spaxti eb' jelan, lajn wal 'icha stotz'b' junc no noc'. A yic schan sb'a jun tzo'n̈ paxti cha, yic xwa'n 'och eb' 'a stzolil, lajn 'icha junc 'istaca tzma'x can 'ejm 'a yol lu'um. A jun tzo'n̈ paxti cha, a Dios Quilmalec a x'a'n 'ayn̈ec.

¹² Ex 'unn 'anma', tzcham wal eyilni, man̈ comnoc tze chaj eyab' junc xo paxti', yujto a tz'ib'j u'un̈, may b'a'n̈ 'ay slajub'. A pax yic niwn tas tzqui cuyec, caw wal tzc'unb' pax qui niwnalec yu'uj.

¹³ 'Ixtn tic tz'aj slajw can jun tzo'n̈ paxti tic. 'Ix alx can 'el smasnil. 'Ay cab' yel'ch Dios 'a qui satec, qui yiclquec smasnil schecnb'il, yujto a jun chi yowlal tzqui b'o'ec.

¹⁴ A Dios, 'oj sc'anb'c 'ayn̈ec yuj smasnil tas xlaj qui b'o'ec, toto wach', mto man̈ wach'oc, wach'xam c'ultacl xqui b'o'ec.