Ec 11 - Chuj San Sebastian Bible

Jun tzo'n̈ xo nab'en

¹ A ticnec 'ela cab' tzcutjec qui b'a, ax yic jaye c'u ax qui chanec pax spac.

² Tzyal 'el'chi, to a tas 'ay 'ayn̈ec, tzqui pojc 'ec' 'a scal eb' 'ay tas 'ay sc'a'l tz'och yu'uj, yujto man̈ cojcoquec tas wan sjaw 'a quib'n̈ec yet' qui chon̈ab'.

³ Toto caw q'uic' yilx 'asun, wal ya'n n̈ab' chi tzyal cha. Toto a junc te tzlib'chji, tzann̈j 'aj tztelw can 'ati, 'oj cann̈j 'a yet'l cha.

⁴ Toto tzqui macljec quil chajtl yilx tiempo 'aj 'ayn̈ec 'eq'ui, toto 'ixta', may b'a'n̈ tzon̈ 'awec, may pax b'a'n̈ 'oj qui molc chan̈ sat cawb'enec cha.

⁵ Man̈ cojcoquec 'aj tzcot 'ic', man̈ cojcoquec pax tas tz'aj sq'uib' junc 'unn 'a yol sc'ojl snun; 'ixtnta pax man̈ cojcoquec tas wan sb'on Dios, atn jun Dios xb'on smasnil tas.

⁶ Ca'c 'och qui b'ab'l trigo, tzca'nec pax 'och qui tza'n trigo, yujto man̈ cojcoquec 'aj 'ay junc'ajoc wach' 'oj 'ajoc, tom a jun b'ab'el, mto a jun tza'n to cha; mto wach' 'oj 'aj schac'ajil.

A nab'en tz'ajx 'a eb' quelem

⁷ A sacq'uinal caw wach' yilxi, tzqui nib'nec pax quil yoc c'u.

⁸ Wach'xam niwn tiempo tzquila, ca'c 'ip ca'nec tzaljoc qui c'ojol. Tzcham wal qui nanec, to niwn pax tiempo 'oj qui canc 'a campusan, man̈x 'a tas 'oj ca'c ganar ta'. Man̈xtzac nachj cujec tas yaji.

⁹ Ex quelmtac yet' ex cob'stac, tzaljan̈ec ya' sb'a caw te'n eyip; 'a'c tzaljoc e c'ojl 'a tas wach' ya' sb'a tztac' eyu'uj. 'Ixquec 'aj tze nib'j tzex 'ati, yet' tas tze nib'j tze b'o'o, palta tzeyojcan pax 'eli, to 'oj ex sb'eyc'ojloc Dios yuj smasnil jun tzo'n̈ tze b'o cha.

¹⁰ 'Ijec 'el e b'a 'a 'ilc'ojlal, man̈ ex 'och 'il yuj junc yailal 'a e niwnal, yujto a eyip caw wal yajn̈ej tz'eq'ui, may jac yel'chi.