Ec 10 - Chuj San Sebastian Bible

¹ A yuj sjab' junc no chamnc yax a'ay, tzjuw 'el sjab' junc perjuma caw su'q'ui. 'Ixta pax junc mach tzb'inax yuj cob' sjelnal, q'uinloc 'ay tas tu tzb'o'o, caw tzjuw 'el sb'inab'ilal cha.

² A snib'b'en junc 'anma jelan, a 'a tas wach', ata tzya'ch sb'a, palta ax snib'b'en junc 'anma may snab'en, cojn 'a maysch'olnil 'aj tzya'ch sb'a.

³ A eb' may snab'en, a tas tzb'o eb', a chi tzch'oxn 'el muc'uc, to may snab'en eb'.

⁴ Q'uinloc a junc mach yajl yaj 'ayn̈ec tzcot yowl yuj junc qui paltail, man̈ yajn̈joc cha, tzcactnec can copiso 'aj 'ayn̈ec 'ochi. Toto tzquijec 'ejm qui b'a, 'ay sb'omb'il jun qui paltail cha, wach'xam niwquil yalxi.

⁵ 'Ay wal jun tas man̈ smojc sb'o 'a yolyib'n̈q'uinl tic tzwila, atn tas tz'el sb'on eb' 'aych yajlil.

⁶ Yujto a eb' may snab'en, a eb' tz'ajx 'och 'a junc 'opiso niwn yel'chi, ax eb' rico, a jac comn 'opiso tz'ajx 'a eb'.

⁷ 'Ix wiln paxi, to a eb' 'aych mosoal, yib'n̈ chej tzlaj 'ec' eb', ax eb' niwc winac, yoc eb' tz'eq'ui, 'icha to 'aych eb' mosoal.

⁸ A eb' tzb'on junc xab', 'ay smay mun a eb' tz'atcn 'a yojol. Ax eb' tzxuyn 'ejm junc muro, 'ay smay a no chan tzchin eb'.

⁹ A eb' ma'mpoj q'ue'en, 'ay smay tzlajw eb' yuj q'uen q'uen cha. Ax eb tzpojw c'atzitz, 'ay pax smay stzu'n sb'a eb'.

¹⁰ A yic tz'ec' ye q'uen ch'acab', ax yic tzqui c'annec q'ue'en yowlal caw 'ip qui tzu'nec 'och q'ue'en, yuj cha, yel xo wach' tzqui n̈icc q'ue ye q'ue'en. Toto jeln on̈ec yajn̈ej tzqui nani tas tzcutjec junc chi muc'uc.

¹¹ ¿Tas to yopiso eb' cob' jeln smontn no chan, toto tox xchix eb' yuj no'?

¹² Toto tzon̈ paxtinec yet' qui jelnal, wach' tzalx 'ayn̈ec yuj qui paxti cha, palta toto tzon̈ paxtinec yet' qui man̈ nab'enal, mun tzquijec cot 'a quib'an̈.

¹³ A junc may snab'en, a yic tzchan 'el yich spaxtini, a jun tzo'n̈ comn paxti tzyal muc'uc, ax yic tzlajw spaxtin cha, man̈x 'a yel'ch tas tzyala.

¹⁴ A eb' 'ixta tzyutj sb'a cha, matz tzactzj eb' spaxtini. An̈ec xo tic man̈ cojcoquec tas wan sjaw 'a cojltac. Toc 'ay mach tzaln cab'i tas 'oj ujc to b'aq'uin̈.

¹⁵ A eb' may snab'en, ton̈j tzmac' c'unb'oc sb'a eb' smunlji, caw tz'el yip eb', 'ijn man̈xtzac stac' spaxt eb' 'a yol schon̈ab'.

¹⁶ 'Oltac wal junc nacion̈ to quelm 'unn junc tzya'ch sreyloc, ax eb' yichmtac wincal chon̈ab', an̈j 'a 'aj 'ay q'uin̈ ata tzq'uin̈lb'i 'el eb'.

¹⁷ Caw wal wach' yic junc nacion̈, toto a junc rey caw 'ay snab'en 'aych sreyloc, ax eb' 'ichmtac winc cha, tzwa eb' 'a yorail, sec tz'ochx yip eb', man̈ cojnoc 'a 'u'l 'an̈ tz'atcn eb'.

¹⁸ A eb' 'isj sjeln yib'n̈ yatut, 'oj 'ec' tz'uj 'a eb', ax 'oj 'ajoc, 'oj telwc 'ejm yatut eb' chi 'a yib'an̈.

¹⁹ A tas wach' sc'uxxi, wach' toni, ax 'u'l 'an̈, tzaljc'ojlal ton paxi, palta yuj jun tzo'n̈ tic, tznib'x to 'ay tumin.

²⁰ Man̈ calc speclal win rey, man̈ qui c'ultac nacc junc tas 'a spatc winac. Man̈ calc tu paxti'al 'a yib'n̈ eb' rico, wach'xam qui ch'ocjec 'ayn̈ec 'ec' 'a yol catut, yujto 'ay smay ax no ch'ic tz'i'n 'ati, ax yab'n sb'a win 'a jun tzo'n̈ qui paxti'ec cha.