Ec 1 - Chuj San Sebastian Bible

A smasnil tas, may xon jac yel'chi

¹ A yic 'aych jun yunnal win David reyl 'a Jerusalén, caw wal b'inab'il yuj sjelnal spaxtini. A 'ix aln 'ixtic:

² ¡Caw wal nab'an̈ej! ¡Smasnil tas may xon jac yel'chi!

³ ¿Tas wal tzyac' ganar eb 'anma', yic til wal munljel tzb'o eb' a yolyib'n̈q'uinl tic?

⁴ 'Ay eb' tz'alji, 'ay pax eb' tzchami, a pax lum lu'um, yajn̈j yaj lu'um.

⁵ Tzq'uel c'u, tz'ejm can paxi, 'ixta tz'aj s'atx can 'a 'aj tz'ejmi, yic tzq'uex wul jun 'ejm xo.

⁶ A 'ic', tz'atcn 'a stojlal sur, tzmeltzj can pax 'at 'a stojlal norte, ton̈j tz'ec' 'oyyoc, tzmeltzj can pax 'a spatquil.

⁷ A smasnil eb' a b'eymal a', ata tzc'och eb' a 'a a mar, palta may tz'aj a mar chi sb'ut'ji; tzmeltzj pax eb' a 'a spatic, tzq'uexwul eb' a 'a 'aj tzpaq'ui, tzcha b'eyx eb' a 'a sb'e jun 'ejm xo.

⁸ Smasnil tas tzon̈ tzactzjecn̈ej chan̈ yu'uj, palta man̈ yujoc cha tzcactnec qui matz'ni, mto tzcactnec cab'n junc tas.

⁹ A smasnil tas 'ayc' ticnec, 'ayc' xon 'a yic pecti', may junc tas tzat qui b'o'ec, junc tas man̈ sb'ojnacc eb' 'anma cha, may junc tas to tzat checlj chan̈ cujec.

¹⁰ 'Ay eb' tzcob' alnoc: A jun tic tzat pitzw chan̈ 'a qui cal, xchi cob' eb'. Palta a junc tas cha, toxn 'ayc' xoni yic mantzac on̈ jawc an̈ec tic.

¹¹ A jun tzo'n̈ tas 'ay 'a pecti cha, 'atnc xo 'a satc'ojlal cujec, 'ixta pax 'oj 'aj s'at satc'ojlal jun tzo'n̈ tas wanto sjaw 'a cojltaquec yuj eb' 'anma 'a yic b'aq'uin̈.

A tas yojc win alm 'el 'ab'ix

¹² An alm 'ab'x in tic, xwa'lj reyl 'a chon̈b' Jerusalén 'a yib'n̈ eb' israel.

¹³ 'Ix in yamn 'och in b'eyc'ojlani, 'ix cham in cuyn wal 'a jelnal smasnil tas 'ay 'a yolyib'n̈q'uinl tic. Caw wal 'al jun 'ictz 'aych can 'a quib'n̈ an̈ 'anman̈ec tic yuj Dios.

¹⁴ Ata snachj 'el wu'uj, to a smasnil tas tzcob' qui b'oc 'a yolyib'n̈q'uinl tic, matz c'och qui c'ojlec yu'uj, 'icha wal yic tzcob' qui pechnec qui b'a yet' 'ic' yic tzcob' ca'lnoc qui yamni.

¹⁵ A junc tas coxo, man̈xtzac stac' qui tojlb'tzanec, ax tas to may tas, matz tac' qui b'isnec.

^16-17 Yuj cha, xin nan 'ixtc yet' in nab'en: An tic, caw wal niwn wel'ch 'a sat eb' 'anma'; yel xo jeln in 'a yib'n̈ smasnil eb' 'e'nc reyl 'a Jerusalén tic; til wal tas wojtac. Yuj cha xin yamn 'och in b'eyc'ojlani tas wal sjelpal jelnal yet' man̈ nab'enal. Ata xnachj 'el wu'uj to a jun tzo'n̈ cha, lajn 'icha 'ic' to matz tac' syamxi, caw matz nachj 'el wu'uj, xin chi.

¹⁸ Wal yel, a yic tzniwtj qui jelnalec, a pax ta tzniwtj sjaw qui somc'ojlalec. A yic tzniwtj cojcanec 'el junc tas, a pax ta tzniwtj sjaw qui cusc'ojlalec.