Dt 9 - Chuj San Sebastian Bible

Man̈ yujoc swach'l Israel si'x 'el eb'

¹ 'Ix yaln pax Moisés 'ixtic: Ex wit chon̈ab', 'ab'tec tas 'oj wala'. 'Ix c'och stiempoal eyec' 'a yojl a Jordán yic tze satn 'el jun tzo'n̈ niwc nacion̈. Caw jeln eb' 'a eyib'an̈, caw niwc jun tzo'n̈ schon̈b' eb', oyn 'och smuroal schon̈b' eb' cha, 'ayb't pax 'a cha'an̈.

² A eb' 'anma cajn ta', niwc wincn̈ej eb', niwc stel eb', yin̈tl can win Anac eb', cab'jnaquec yalxi: ¿Mach wal junc 'oj ste'wtzoc sb'a 'a yojltac eb' yin̈tl win Anac? xchi.

³ Yuj cha, yowlal tzeyojquej 'el ticnec, to a Jehová qui Diosalec, a 'oj b'ab'ljoc eyu'uj, 'icha wal junc c'ac' tzn̈uswji. A 'oj satnc 'el eb' 'anma chi 'a eyojltac. Ax xo tic, 'oj e pechl eb', ax e satn 'el eb' muc'uc, 'icha wal 'ix yutj Jehová yaln 'ayn̈ec.

⁴ A yic tox xlajw 'el eb' 'anma chi 'a eyojltac yuj Jehová, 'ayx cob' 'oj eyal 'ixtic: Yuj wal qui wach'il, yuj cha, on̈ yi'nec cot Jehová 'a jun lugar tic, 'oj e chioc. Palta yuj smul eb' 'anma 'a jun lugar cha, yuj cha, tzsatn 'el Dios eb'.

⁵ Man̈ yujoc e wach'il, mto yuj stojlal e nab'en ax 'at e cajnc lum lum cha, palta yuj smaysch'olnilal eb' 'anma cha. Yuj cha, ax satx 'el eb' 'a eyojltac yuj Jehová, sec 'ixta 'oj 'aj yel'ch strato sb'ojnac yet' Abraham, Isaac yet' Jacob, atn eb' qui mam quichmec.

⁶ Yuj cha, yowlal tzeyojquej 'eli, chajtlto man̈ yujoc e wach'il tzya'n Jehová qui Diosalec lum lum chi 'ayex, palta yujto 'ixta snab'en. Alx tic jun, caw wal pitx 'a 'a.

Xmeltzj 'och eb' israel 'a Dios 'a Sinaí

⁷ May wal b'a'n̈ tzeyac' sat 'a e c'ojol, chajtlto ax tic, 'ochnc ex 'ajc'ojlal 'a Jehová, yic 'ayn̈ec 'ec' 'a lum cusltac lu'um. Yictax on̈ 'eltec 'a Egipto masnto on̈ jawc 'a jun lugar tic, an̈j 'ijnoc pit tzeyutj e b'a 'a 'a.

⁸ A yic 'ayn̈ 'ec' 'a lum yich witz Sinaí, ata xe tzuntzj cot yowl sc'ojl Jehová. Caw wal xcot yowl sc'ojl 'a eyib'an̈. Yuj cha, jab'xoj wal ma'ex smil cham e masnil.

⁹ In xit'c 'a sjolm lum witz Sinaí 'at in cha chapachn̈ q'uen q'uen 'aj tz'ib'b'il 'och strato Jehová b'ob'il yuj quet'ec. Ata in can chawinc c'u chawinc 'ac'wal, may xon jac tas xin c'uxu, may jac tas xwuq'uej.

¹⁰ Ata 'ix yac' Jehová chapachn̈ q'uen q'uen chi 'ayin, caw a 'ix stz'ib'n eb' q'ue'en. A jun tzo'n̈ paxti 'aych 'a eb' q'ue'en, atn jun tzo'n̈ alb'il 'elt yuj 'ayn̈ec 'a scal te c'ac', yic yamnon̈c 'a yich lum witz cha.

¹¹ Ax x'aji a yic xtz'acw chawinc c'u chawinc 'ac'wl in c'och 'a sjolm lum witz cha, 'ixta to b'i'an, xya'n Jehová chapachn̈ q'uen q'uen chi 'ayin, atn 'a eb' q'uen tz'ib'b'il 'och strato chi yu'uj.

¹² 'Ix yaln 'ayn 'ixtic: 'Ixic, paxn̈ 'ejm muc'uc, yujto a jun chon̈b'al eb' 'anma 'ix ej 'elt 'a Egipto, caw wal 'ix juw 'el eb'. Ma'ix syiclj eb' in checnb'il alb'il can wu'uj, yajn̈ej sb'on eb' jun sdiosal to nab'a oro.

¹³ A ticnec 'ix wila to a jun tzo'n̈ 'anma tic, caw wal pit tzyutj sb'a eb' 'ayin.

¹⁴ Yuj cha, 'ij 'el a b'a 'a wojltac, yujto 'oj in satl jun tzo'n̈ 'anma tic, man̈x 'a 'aj 'oj b'inaxc eb' 'a sat lum lum tic. Cojxn yet' eb' en̈til, ata 'oj in b'o jun nacion̈ caw niwquil, caw jeln 'oj 'aj 'el'chi, 'ec'b'al 'oj 'aj sb'isl eb' 'anma chi 'a yib'n̈ eb' tic, xchi.

¹⁵ Xlajw xoj cha, in pax 'emt 'a sjolm lum witz cha, atn 'aj caw tzn̈ilchj sc'a'l lum witz chi stz'a'i, mec'b'il chapachn̈ q'uen q'uen chi wu'uj, atn q'uen 'aj 'aych strato cha.

¹⁶ Ax yic in 'emli, 'ix wilni b'ob'ilx jun yechl wacx e diosaloc. Tox 'ix 'och e mul 'a Jehová qui Diosalec. Yajn̈ej xeyi'n 'el e nab'en 'a schecnb'il tzyac' e b'eylb'oc.

¹⁷ Yuj cha, xin juln 'ejm eb' q'uen q'uen chi 'a sat lu'um, xin ma'n can poj eb' q'uen 'a eyojltac.

¹⁸ Xlajw cha, in 'em cumn 'a yojltac Jehová, 'icha xon tzwac' yet'oc. Chawinc c'u chawinc 'ac'wl ma'in wa'i, may pax jac tas xwu'j eyaloc. 'Ixta xwutj in b'a, yujto xeya'ch e mul 'a Jehová, xe tzuntzn cot yowal.

¹⁹ Caw wal in xiwi yic xwab'n scot yowl Jehová 'a eyib'an̈. A xwutj wab'ni, tox ex lajw 'el yuj muc'uc. Palta 'ix yab' to wal Jehová tas xwal 'a jun 'ejm xo cha.

²⁰ An̈jtona', caw wal xcot yowl Jehová 'a yib'n̈ Aarón. 'Ix snib'j wal 'a yajn̈ej 'ix satl Aarón cha, palta in leslwi yu'uj, yuj cha, ma'ix chami.

²¹ Yuj ton wal jun yechl wacx cha, x'och e mul. Yuj cha, xin tza'n cot jun yechl wacx cha, xin ma'n pojoc, xin juln 'at 'a scal c'ac', xin tenn chojoc, xwa'n 'at 'a yol a a tzcot 'a jolm witz.

²² 'Ixta pax eyutjnac e b'a 'a Taberá, 'a Masah yet' 'a Kibrot-hataava, e tzuntzjnac wal cot yowl sc'ojl Jehová 'a eyib'n̈ ta'.

²³ A yic 'ayn̈ec 'ec' 'a Cades-barnea, ata yaljnac 'ayn̈ec to tzon̈ 'at qui cha lum lum cha, atn lum 'oj yac' eyico'oc. Atnta e tenjnac tas yaljnac Jehová qui Diosalec, yujto ma'ix eya'ch xon yipc e c'ojol.

²⁴ ¡Yictax ex wojcan 'eli, xin yamn 'och wilni to caw wal pit tzeyutj e b'a 'a Jehová!

²⁵ Yuj ton wal cha, yaln Jehová to tzex satli, palta an xo, in 'emcn cumn 'a yojltac 'a chawinc c'u 'a chawinc 'ac'wal.

²⁶ 'Ix waln 'a 'ixtic: Mamin Jehová, man̈ a satl jun a chon̈b' tic, yujto ach xa col 'elt yet' a jelnal, yet' a poder xe'n 'elt 'a Egipto yic tz'och eco'oc.

²⁷ Na cot tas aljnac 'a eb' a checab', atn Abraham, Isaac yet' Jacob. A spitl jun tzo'n̈ 'anma tic, smul eb' yet' smaysch'olnilal eb', man̈ a na coti,

²⁸ sec a eb' 'anma 'a lum chon̈b' 'aj on̈ ej 'elt cha, ma'oj yal eb' 'ixtic: A Jehová ma'ix stac' yi'n 'och eb' 'anma chi 'a sat lum lum tzyal yac' 'a eb' cha. 'Ix yij 'el eb' 'anma chi 'a tic, sec tzchamcn eb' yuj 'a lum cusltac lu'um, yujto chacb'il 'el eb' yu'uj, 'oj xchic eb'.

²⁹ Palta a jun chon̈b'al eb' 'anma tic, ec ton wal yaj eb', ach ejnac 'elt eb' 'a Egipto yet' wal a niwquil poder, xin chi 'a 'a.