Dt 8 - Chuj San Sebastian Bible

Man̈ yujocn̈ej tas tzc'uxxi pitzn 'anma'

¹ 'Ix yaln Moisés 'ixtic: Wach' tzeyutj e b'eylb'an jun tzo'n̈ checnb'il wan waln can 'ayx tic, sec wach' 'oj eyel'chi. 'Oj q'uib' e b'isul, ax e cajn lum lum 'aj ya'jnac can Jehová sti ya'n 'a eb' qui mam quichmec.

² Nac cot wal si'mb'il, chajtlto chawinc ab'il on̈ b'eyc cot 'a lum cusltac lum yuj Jehová qui Diosalec. 'Ix yac' quilc yailal, on̈ ya'lni prowal yet' qui nab'en, toto yel tzqui yicljec schecnb'il tic, mto ma'ay.

³ Til wal yailal xquilec, xca'nec pax wejel, ax Jehová 'ix 'a'n qui c'uxc maná. A jun cha, man̈ eyojcoc sc'uxxi. May pax 'aj c'uxb'il yuj eb' qui mam quichmec 'a pecti'. 'Ixta xyutj ya'n cojcoc 'eli to man̈ cojnoc yuj tas tzc'uxxi pitzn on̈ec, palta pitzn on̈c yuj smasnil tas tzyal Dios.

⁴ A qui pichl 'aych cujec 'a jun chawinc ab'il cha, ma'ix lajw xoni, ma'ix tzajlj pax coc qui b'eyi.

⁵ Nac cot nab'an, 'icha tzyutj junc mamb'il ya'n cuenta yunnal, 'ixta wal on̈ yutjec Jehová qui Diosalec.

⁶ Yuj cha, yowlal tzeyiclj jun tzo'n̈ schecnb'il, 'ay cab' yel'ch jun tzo'n̈ scuynb'il tic 'a e sat.

⁷ Yujto a Jehová qui Diosalec, a 'oj eyi'n 'och 'a sat lum lum caw wach'. Til wal a a 'a lum ch'olctac, 'ay a spac'b'a', 'ay pax a niwc a tzcot 'a lum jolmctac witz.

⁸ A lum lum cha, caw wal yelb' trigo, cebada, uva, higo, granado, olivo, 'ay pax no yal chab' ta'.

⁹ A 'a jun lugar cha, may tas 'oj e na yuj tas tze c'uxu, may pax tas 'oj e na yuj junc xo tas. A 'a scal q'uen q'ue'en, ata 'oj 'ilchjoc q'uen hierro eyu'uj, ax 'a eb' lum jolmctac witz, ata 'oj eyic' 'elt q'uen cobre.

¹⁰ Wach' 'oj e wa ta'. 'Oj e b'ut'j si'mb'il, palta yowlal tzeyac' yuj diosal 'a Jehová qui Diosalec, yujto wach' jun lum chi tzyac' eyico'oc.

Tz'ajx snab'enoc eb'*r* sec matz yij 'el eb' snab'en 'a Dios

¹¹ Caw wal tzeyil e b'a, man̈ eyac' sat e c'ojl 'a Jehová qui Diosalec. Yowlal tzeyiclj schecnb'il, sley yet' jun tzo'n̈ cuynb'il tzwalcn 'ayx tic.

¹² A yic 'oj laj e c'uxnc tas ta', 'oj laj e b'ut'ji, ax e b'on eyatut 'aj tzex 'aj cajan.

¹³ 'Oj laj q'uib' sb'isl e wacax, yet' e calnelu. 'Oj niwtjoc q'uen oro, yet' q'uen plata 'ayex. A yic tzniwtj jun tzo'n̈ chi 'ayex,

¹⁴ man̈ e b'an̈ e b'a yet'oc. Xeya't wal sat e c'ojl 'a Jehová qui Diosalec, atn jun on̈ 'i'nec 'elt 'a Egipto, 'a 'aj 'ayn̈ec 'och mosoal.

¹⁵ Yujto a 'on̈ 'i'nec b'ey 'a lum cusltac lum caw 'ay smay, lum 'aj 'ay no chan man̈x 'a yan̈il, 'a 'aj 'ay no sina'an, 'a 'aj may a a wach' yu'xi. Palta a Jehová, a 'ix 'a'n 'eltoc a a 'a sat q'uen q'ue'en, 'ix laj cu'nec a'.

¹⁶ 'Ix qui wan maná 'a lum cusltac lum cha. A jun cha, man̈ 'ojcab'ilc yuj eb' qui mam quichmec. 'Ixta 'on̈ yutjec on̈ ya'lni prowal, sec wach' tzex 'el'ch b'aq'uin̈.

¹⁷ 'Ayt ex xe na 'ixtic: A jun tzo'n̈ qui ricoal tic, 'ix ca'c ganar yet' quip, xe chi ta.

¹⁸ Yowlal tze na coti to a Jehová a tz'a'n eyip, tzya'n e nab'en yic tzex 'och ricoal. 'Ixta wal tzyutj ya'n 'el'choc strato sb'ojnac yet' eb' qui mam quichmec, 'icha wal tas wan yuj ticnec.

¹⁹ Palta toto tzeyac' sat e c'ojl 'a Jehová qui Diosalec, tzex 'och tza'n yuj jun tzo'n̈ tzalx 'och diosal, tzeya'n 'e'jm e b'a 'a 'a, toto 'ixta 'oj eyutc e b'a, 'a jun rato tic tzwaln cani, to 'oj ex satl Jehová e masnil.

²⁰ 'Icha wal 'oj yutc Jehová satn 'el jun tzo'n̈ chon̈b' 'aj 'oj e c'och cha, 'ixta pax 'oj eyaj e satl jun xo, yujto matz eyiclj tas tzyal Jehová qui Diosalec, xchi Moisés.