Dt 7 - Chuj San Sebastian Bible

Sic'b'il 'el schon̈b' Dios yu'uj

¹ 'Ix yaln pax Moisés 'ixtic: A Jehová qui Diosalec, a 'oj eyi'n 'och 'a sat lum lum 'oj yac' 'ayx cha. A pax 'oj 'i'noc 'el uque niwc chon̈b'al eb' 'anma caw 'ay yip 'a eyojltac: Atn eb' hitita, eb' gergeseo, eb' amorreo, eb' cananeo, eb' ferezeo, eb' aveo yet' eb' jebuseo.

² A yic 'oj ya'nc 'och Jehová jun tzo'n̈ nacion̈ chi 'a yol e c'ab', c'uxn tze satl eb' smasnil. May junc trato tze b'o yet' eb', man̈ 'o'ch pax e c'ojl 'a eb'.

³ Man̈ eyac' yi' sb'a eyunnal yet' eb' 'ix yisl eb' 'anma 'ay 'a jun lugar cha, mto eyisl tzyij sb'a yet' yunnal eb'.

⁴ Toto ma'ay, 'oj yi'l eb' eyunnal chi snab'en 'a Jehová, ax yoch tza'n ewin yuj eb' 'ix, ax ya'n 'ejm sb'a ewin 'a sdiosal eb' 'ix cha; to 'ixta', 'oj cot yowl Jehová 'ayex, ax e cham yuj muc'uc.

⁵ Palta a tas 'oj e b'o', to 'oj e satl smasnil 'aj tzyal sb'a eb' 'anma cha, tze ma'cn poj q'uen q'ue'en, yet' te te 'aj tzlaj yac' 'ejm sb'a eb', tzlaj e n̈usnoc can tz'a sdiosal eb' cha.

⁶ Yujto an̈ec tic, sic'b'iln̈ec 'eli, yuj cochc schon̈b'oc Jehová qui Diosalec. Sic'b'iln̈ec 'elt 'a scal jun tzo'n̈ xo chon̈b' 'ay 'a sat lum lum tic, sec to yicn̈ej tzon̈ 'ajec.

A tas yowlal tzb'o eb' israel

⁷ 'Ix 'el 'a sc'ojl Jehová on̈ si'nec 'och yico'oc, man̈ yujoc to niwn qui b'islec 'a yib'n̈ jun tzo'n̈ xo nacion̈, palta wal yel 'in to jaywn̈ej wal qui b'eyi, man̈ 'ichaoc jun tzo'n̈ xo nacion̈ cha.

⁸ Yujto 'ay schamc'ojlal Jehová 'ayn̈ec, yuj cha, on̈ yi'n 'elt 'a Egipto 'a 'aj 'ayn̈ec 'och mosoal. Yet' wal spoder on̈ yi'n 'elt 'a yol sc'ab' win rey cha, sec tzyac' 'el'choc tas alb'il can yuj 'a eb' qui mam quichmec 'a pecti'.

⁹ A ticnec, tzeyojquej 'eli to a Jehová qui Diosalec, to cojni. A eb' 'ay schamc'ojlal 'a 'a, tzyac' 'el'choc strato yet' eb'. A eb' tzyiclni schecnb'il, tz'o'ch sc'ojl 'a eb', yet' 'a yin̈tl eb' b'aq'uin̈.

¹⁰ Palta a eb' tzchacn 'eli, sat cab' 'el eb' yu'uj, a cab' tz'a'n spac 'a eb', tojl cab'n̈ej satl eb'.

¹¹ Yuj cha, yicljec schecnb'il, sley yet' smasnil jun tzo'n̈ cuynb'il tzwalcn 'ayx 'a jun c'u tic; yowlal tze b'eylb'ej.

Spac yic eb' yiclum

¹² Toto yel tze chaj eyab' jun tzo'n̈ checnb'il tic, tze b'eylb'ej, to 'ixta', ax Jehová qui Diosalec, 'oj yac' 'el'choc strato 'aj ya'jnac can sti 'a eb' qui mam quichmec.

¹³ 'Oj ex schamc'ojloc, ax ya'n syaxilal 'a eyib'an̈, 'oj yac' pax q'uib' e b'isul. 'Oj yac' syaxilal 'a yib'n̈ eb' eyunnal, 'a yib'n̈ e trigo, 'a yib'n̈ eyal uva, eyaceite, e wacax, e calnelu 'oj e caj 'a sat lum lum 'aj ya'jnac sti ya'n 'a eb' qui mam quichmec.

¹⁴ Yel xo wal wach' eyic 'a yib'n̈ jun tzo'n̈ xo chon̈ab'. 'Oj 'unewoc eb' 'ix 'ix smasnil, yet' pax eb' winac, 'ayn̈j yunnal eb'. An̈jtona', 'ixta pax no e cajb'en noc', 'oj 'unewoc e no smasnil.

¹⁵ A Jehová 'oj e coln 'el 'a yol sc'ab' smasnil yab'il, 'icha wal jun tzo'n̈ eyiljnac ya'n 'och 'a yib'n̈ eb' 'aj Egipto. Palta a jun tzo'n̈ yab'il cha, cojn 'a yib'n̈ eb' 'ajc'ojl yajch 'ayex, ata 'oj ya'chi.

¹⁶ Yuj cha, a smasnil chon̈b' 'oj yac' Jehová qui Diosal 'a yol e c'ab', yowlal tze satl eb' smasnil. Man̈ 'o'ch e c'ojl 'a eb', man̈ eyac' 'ejm e b'a 'a sdiosal eb', toto ma'ay, 'icha ch'an̈ yal 'oj 'ajch 'ayex.

¹⁷ Tecn 'ayx 'oj e na 'ixtic: A wal jun tzo'n̈ nacion̈ tic, caw 'ec'b'al eb' 'a quib'n̈ec. ¿Tas wal 'oj cutquec qui'n 'el jun tzo'n̈ 'anma tic 'a sat lum lum tic? tecn 'oj e chioc.

¹⁸ Palta man̈ ex xiwoc; tze na coti tas yutjnac Jehová win sreyl Egipto yet' eb' 'anma cha.

¹⁹ Nac cot jun tzo'n̈ yailal 'e'nc 'a yib'n̈ eb' 'aj Egipto cha. Xeyiln pax jun tzo'n̈ milagro caw satjub'tac yilxi, yet' wal spoder Jehová on̈ yi'nec 'elt 'a jun lugar cha. 'Icha wal yutjnac Jehová eb' 'aj Egipto cha, 'ixta 'oj yutc eb' chon̈b' 'aj tzex xiw cha.

²⁰ A Jehová 'oj 'a'nc 'ejm junc niwquil xiwc'ojlal 'a scal eb', masnto 'oj satl smasnil eb' pitznto tzc'ub'j can 'el sb'a 'ayex.

²¹ Yuj cha, man̈ ex xiw xon 'a eb' 'anma cha, yujto a Jehová qui Diosalec, a 'ayc' 'a e cal, caw niwquil spoder, caw wal 'ay smay.

²² Jab'jnal 'oj yi'l Jehová jun tzo'n̈ nacion̈ chi 'a eyojltac. Man̈ jun 'ejmocn̈ej tze satl eb', to ma'ay, 'ay smay sniwtj no calte'al noc' 'a e cal, ax ex schin no'.

²³ Palta a Jehová qui Diosalec, a 'oj 'a'nc 'och jun tzo'n̈ nacion̈ chi 'a yol e c'ab', jab'jnal 'oj e satl eb', masnto 'oj lajwc eb' smasnil.

²⁴ A 'oj 'a'nc 'och sreyl eb' 'anma chi 'a yol e c'ab', ax e satn 'el eb', man̈x 'aj 'oj b'inaxc eb' 'a yolyib'n̈q'uinl tic. May wal junc eb' 'oj stac' scoln sb'a 'ayex, c'uxn 'oj e satl eb' smasnil.

²⁵ A sdiosal eb' 'anma cha, c'uxn tze n̈ustz'a'oc, palta man̈ eyi'cn q'uen oro yet' q'uen plata 'aych 'a 'a. Man̈ e nib'c' 'ochi. To ma'ay, a jun chi 'oj 'och e mulc 'a Jehová, ax e juw 'el yu'uj.

²⁶ Yuj cha, may wal junc tas yajb'il 'el 'oj stac' eyi'n 'at 'a eyatut, sec wach' ma'oj e satl pax jun xo. A jun tzo'n̈ cha, yowlal tzeyajcn 'el eb', tze satl smasnil, xchi Moisés.