Dt 34 - Chuj San Sebastian Bible

A schaml Moisés yet' 'aj mucxnac

¹ 'Ix 'at Moisés 'a lum cusltac lum 'a yol yic Moab, 'ix q'ue'ch 'a sjolm lum witz tzcuch Nebo, 'a lum switzl Pisgá, lum 'ay 'a yojltac Jericó. Ata 'ix sch'oxcn 'at Jehová yil Moisés lum slum Galaad, masnto 'aj tzc'och lum yic Dan,

² yet' lum yic Neftalí, Efraín, yet' Manasés, smasnil lum yic Judá, masnto tzc'och lum 'a a mar Mediterráneo.

³ An̈jtona', tzcot lum 'a Négueb, masnto tzc'och lum 'a ya'lical sti a Jordán, yet' lum ya'lical Jericó to nab'a palma, masnto tzc'och lum 'a Sóar.

⁴ 'Ix yaln Jehová 'a Moisés 'ixtic: Atn jun lum tic wa'jnac in ti wa'n 'a Abraham, 'a Isaac yet' 'a Jacob. Waljnac 'a eb' chajtlto 'oj wac' lum 'a eb' yin̈tl eb'. Yuj cha, tzwac' elcn 'at lum yet' a sat, wach'xam man̈x 'oj a c'och 'a lu'um, xchi Dios 'a Moisés cha.

⁵ Yuj cha, a win Moisés schecb' Dios, ata chamnc can win 'a yol yic lum Moab, 'icha wal yutjnac Jehová yaln 'a winac.

⁶ Ata xmucx can win yuj Jehová 'a jun lum ya'lical Moab cha, 'a yojltac Bet-peor, palta mant 'a xon junc mach 'ojtnac jun lugar chi 'aj mucn can Moisés cha.

⁷ 'Ay 120 ab'il sq'uinl Moisés yic 'ix chami, wach' to yilni, 'ayt pax yip.

⁸ Jun 'ujl 'ix 'oc' eb' yit israelal Moisés cha, x'och eb' 'a cusc'ojlal yuj schamlil win 'a lum cusltac lum yic Moab.

⁹ Ax Josué yunnal win Nun, 'ix schaj can sjelnal 'a Moisés, yujto ya'jnac can Moisés chi yopiso 'a 'a, ax eb' yit israelal, yiclum xyutj sb'a eb' 'a Josué, 'icha yutjnac Jehová yaln can 'a Moisés yic 'ayt 'ec' yet' eb' yit chon̈b' cha.

¹⁰ Yictax cha, man̈x 'a 'ajtil 'ay junc xo schecb' Dios 'ilchjnac 'a scal eb' yin̈tl Israel 'icha wal Moisés, yujto a win cha, caw q'uelc'mb'a x'aj yet' Jehová yic xpaxtin yet'oc.

¹¹ Man̈x xon junc mach stac' sb'on jun tzo'n̈ tas satjub'tac yilxi, yet' jun tzo'n̈ milagro, 'icha tas xyac' Jehová sb'o Moisés 'a win sreyl Egipto, yet' 'a eb' 'aych yajlil yet' winac, yet' pax 'a smasnil 'anma 'ay 'a yol smacb'en jun nacion̈ cha.

¹² May junc xo mach niwn yel'chi, yic tzb'on jun tzo'n̈ tas caw satjub'tac yilxi, 'icha wal tas sb'o Moisés 'a sat smasnil eb' yit chon̈ab'.