Dt 33 - Chuj San Sebastian Bible

'Ix yalcn Moisés*r* wach' paxti 'a yib'n̈ eb' Israel

¹ A yic jab'xoj sc'och stiempoal scham Moisés win schecb' Dios, 'ix syamn 'och yaln can wach' paxti 'a yib'n̈ eb' yit israelal.

² 'Ix yaln can 'ixtic: 'Ix cot Jehová 'a lum switzl Sinaí, 'ix ya'n cot sacq'uinlal 'ayn̈ec, 'a lum Edom. Toxn̈ej tzwetzwni cot 'a lum switzl Parán, 'ix jaw 'ayn̈ec. Caw smil-l sb'isl eb' ángel ajun yet'oc, ax 'a swach' c'ab', ata yet' jun ley, caw tzn̈ilchj yet' sc'aq'uil.

³ A Jehová caw 'ay schamc'ojlal 'a eb' schon̈ab', a eb' yicxo yaji, 'ayc' eb' 'a yol sc'ab'. A eb' cha, tz'och eb' 'emmquilal 'a 'a, tzyiclni pax eb' schecnb'il.

⁴ A jun ley 'ix wa'cn tic, 'icha to smacl eb' yin̈tl Jacob yaji.

⁵ A Jehová 'aych sreyloc Jesurún, yic tzya'n syam sb'a eb' syajlil chon̈ab', yet' eb' yin̈tl junjn c'aj eb' yin̈tl Israel, xchi Moisés cha.

⁶ 'Ix syamn 'och Moisés yaln can wach' paxti 'a yib'n̈ eb' yin̈tl Rubén 'ixtic: 'Ay cab' sq'uinl eb' yin̈tl Rubén, may cab' b'a'n̈ tzsatl eb', man̈ 'emtoc cab' sb'isl eb', xchi.

⁷ 'Ix yaln 'ixtc 'a yib'n̈ eb' yin̈tl Judá: Mamin Jehová, 'ab' wal tas tzyal eb' yin̈tl Judá 'ayach; jun cab' tzotj eb' yet' eb' yit chon̈ab'. Tza col eb' yet' a poder 'a yol sc'ab' eb' 'ajc'ojol, xchi.

⁸ 'Ix yaln 'ixtc 'a yib'n̈ eb' yin̈tl Leví: Mamin Jehová, ec yaj q'uen Tumim yet' q'uen Urim; yic pax eb' winc to yiclum 'ayach, yic 'ix a'lni prowal ewin 'a Masah, ewin xa tej a b'a yet' 'a 'aj 'ay a a 'a Meriba.

⁹ A eb' cha, yel xo ach schamc'ojlej eb' 'a yib'n̈ smam snun, 'a yib'n̈ yu'tac, yet' 'a yib'n̈ yunnal. A eb' tic, caw yel syiclj eb' a paxti', yet' a trato.

¹⁰ Tzyac' eb' cuyxoc a ley 'a scal eb' yit chon̈ab', atn eb' yin̈tl Jacob, ax yaln pax eb' 'a scal eb' yit israelal. A eb' tz'a'n tz'a incienso 'a ojltac, ax ya'n pax tz'a eb' no xajmb'al to tz'a smasnil 'a yib'n̈ yet'l xajmb'al.

¹¹ Mamin Jehová, 'ac' a yaxilal 'a yib'n̈ eb', tzchan cab' a c'ojl tas tzyac' eb' 'ayach. Tza mac' wecchjoc sb'acl yich spatc eb' 'ajc'ojl yajch 'a eb', sec man̈xtzac stac' yi'nchan̈ sb'a eb' tzchichn 'och 'a eb' cha, xchi.

¹² 'Ix yaln 'ixtc 'a yib'n̈ eb' yin̈tl Benjamín: Caw wal nib'b'il eb' yin̈tl Benjamín yuj Jehová, caw tzaljc'ojlal yaj eb', a Dios caw niwn yel'chi, a tzcolwj yet' eb'. ¡A 'aych stan̈malc eb'! xchi.

¹³ 'Ix yaln 'ixtc 'a yib'n̈ eb' yin̈tl José: Ya' cab' 'ejm Jehová syaxilal 'a yib'n̈ slum eb', a cab' chicb'chan̈ caw wach' tz'ejm 'a yib'an̈, ax a a tzq'uel 'a yol lu'um, a cab' a tzc'an eb'.

¹⁴ Wach' cab' tz'aj sb'al lum lum tic 'a junjn ab'il, wach' pax cab' tz'aj sat te 'awb'ente 'a stiempoal.

¹⁵ Wach' cab' tz'aj sb'al eb' lum jolmctac witz, atn lum sicl lum 'ayc' xon 'a yic pecti'.

¹⁶ Wach' cab' tz'aj smasnil sat te lob'tzal te tz'awx 'a sat lum lu'um, yuj swach'c'ojlal Jehová, atn jun sch'oxjnac sb'a 'a scal c'ac' 'aj wan stz'a jun te q'ui'ix. Cot cab' can smasnil jun tzo'n̈ yaxilal tic 'a yib'n̈ eb' yin̈tl José, yujto sic'b'il 'el win 'a scal eb' yu'tac.

¹⁷ Caw wach' yilx eb' yin̈tl José, 'icha junc sb'ab'l 'unnal junc no quelm wacax, caw jelan. 'Ay yip 'icha junc no simrón wacx caw niwc sch'a'ac. 'Oj stec smasnil chon̈ab', masnto 'aj tzlajw c'och yolyib'n̈q'uinl tic. A sch'ac chi tzch'oxn 'eli to caw 'ay yip, atn smil-l sb'isl eb' yin̈tl Efraín, yet' smil-l sb'isl eb' yin̈tl Manasés, xchi.

¹⁸ 'Ix yaln 'ixtc 'a yib'n̈ eb' yin̈tl Zabulón, yet' 'a yib'n̈ eb' yin̈tl Isacar: Tzaljan̈c ex yin̈tl Zabulón, 'a 'ajtil tzex laj 'eq'ui, an̈jtona ex yin̈tl Isacar, tzaljan̈c 'a eyatut.

¹⁹ Tzeyawtj cot smasnil eb' nacion̈ 'a jolmctac witz, tzeya'n jun tzo'n̈ xajmb'al 'a Jehová, atn jun tzo'n̈ caw tzalj yet'oc. Tzeya'n tzaljoc e c'ojl yet' sricoal a mar, yet' pax syaxilal sti a', jun tzo'n̈ to man̈ checloc yaji, xchi.

²⁰ 'Ix yaln 'ixtc 'a yib'n̈ eb' yin̈tl Gad: ¡'Ijx cab' chan̈ sb'i Jehová, to a 'ix 'a'n slum eb' yin̈tl Gad, yujto caw lewn slum eb'! Lajn eb' 'icha junc no león tzjil't sc'ab' tzicn cot xil sjolm junc xo no', 'ixta eb' 'a eb' 'ajc'ojl yajch 'a 'a.

²¹ A eb' yin̈tl Gad, 'ix can eb' 'a lum lum caw wach' sat. A jun lum cha, smoj wal to a eb' capitan̈ 'aj x'ajx lu'um. A yic syamn sb'a eb' yichm wincal chon̈b' Israel, ax eb' yin̈tl Gad, a eb' xya'ch sb'a sjucb'tzan eb' chon̈ab', syiclni eb' smasnil tas 'ix yal Jehová yuj eb' schon̈ab', xchi.

²² 'Ix yaln 'ixtc 'a yib'n̈ eb' yin̈tl Dan: A eb' yin̈tl Dan tic, lajn wal eb' 'icha junc no quelm león xb'at'j cot 'a lum Basán, xchi.

²³ 'Ix yaln 'ixtc 'a yib'n̈ eb' yin̈tl Neftalí: A eb' yin̈tl Neftalí, wach' yajcn eb' yuj Jehová, yujto til wal syaxilal xya'cn 'a yib'n̈ eb'. Yic eb' yaj a pama', masnto tzlajw c'och a 'a stojlal sur, xchi.

²⁴ 'Ix yaln 'ixtc 'a eb' yin̈tl Aser: Ya' cab' Jehová smasnil syaxilal 'a yib'n̈ eb' yin̈tl Aser. A 'a scal smasnil eb' yunnal Jacob, chamc'ojlaxc cab' eb' yin̈tl chi yuj eb' yu'tac. Niwtj cab' chan̈ aceite 'a eb'.

²⁵ Wach' cab' smac yatut eb'. A cab' q'uen hierro, mto q'uen bronce 'aych smacoc. 'Ay cab' yip eb' yic te'n sq'uinl eb'.

²⁶ Ex 'aj Jesurún, may xon junc mach tztac' slajb'tzan sb'a yet' qui Diosalec, yujto ata tz'ec' 'a yib'n̈ 'asun, caw 'ay smay yic tzjaw colwjoc quet'ec.

²⁷ A qui Diosalec 'ayc' 'a jun 'ejmn̈ej, a 'aych qui tan̈maloc. A spoder caw may b'a'n̈ 'ay slajub', a 'aych quet'ec. A 'oj pechnc 'el eb' 'ajc'ojl yajch 'ayn̈ec, a tzalni tzsatx 'el eb' 'ajc'ojl cha.

²⁸ Ex wit chon̈ab', yelc'ojlal tzex can cajn 'a sat lum lum cha. A eb' eyin̈til, caw junc'ojlal 'oj 'aj yec' yuj eb' 'a sat lum lum cha. A 'a lum e lum cha, caw wach' 'oj 'aj 'ixm trigo yet' yal uva. May b'a'n̈ 'oj 'och wan ya'n n̈ab' 'a yib'n̈ lu'um.

²⁹ Caw wach' quic ex wit israelal, ¿mach wal junc tztac' slajb'tzan sb'a quet'ec? A Jehová a tzon̈ colnec. A tzon̈ tan̈wniec, tzcolwj pax quet'ec. Quespada 'ay smay yaji, yuj cha, tzca'n ganar eb' 'ajc'ojl yajch 'ayn̈ec, ax qui te'n can 'ejm sb'an̈quinal eb', xchi Moisés 'a eb'.