Dt 31 - Chuj San Sebastian Bible

X'och Josué sjelc Moisés 'a yopiso

¹ 'Ix yaln pax Moisés 'ixtc 'a smasnil eb' yit chon̈ab':

² An tic, 'ayx 120 ab'il in q'uinal, man̈x 'a wip ex in jucb'tzani. An̈jtona', tox 'ix yal Jehová 'ayin, to man̈x 'oj in c'axw 'ec' 'a a Jordán cha.

³ Palta a Jehová qui Diosalec, a 'oj b'ab'ljoc eyu'uj, ax satn 'el smasnil jun tzo'n̈ nacion̈ 'ayc' 'a yol e b'e, yet' eb' 'ayc' 'a sat lum lum 'aj 'oj e c'och cha. Ax xo 'oj e caj slum eb' cha. A Josué tic 'oj 'ochx can ex sjucb'tzoc 'icha xyutj Jehová yalni.

⁴ A Jehová 'oj satnc 'el jun tzo'n̈ chon̈b' cha, 'icha 'ix yutj satn 'el eb' sreyl eb' amorreo, atn win Sehón yet' win Og, c'uxn satl eb' yet' schon̈ab'.

⁵ A 'oj 'a'nc 'och jun tzo'n̈ nacion̈ chi 'a yol e c'ab', ax e satn 'el eb', 'icha xwutj waln 'ayex.

⁶ Caw te'n tzeyutj e b'a. Man̈ ex xiwoc. Man̈ e xib'tc e b'a yic 'oj e chanc e b'a yet' eb' 'ajc'ojl yajch 'ayx cha. Yujto a Jehová qui Diosalec, a 'aych eyet'oc, ma'oj ex yactc can e ch'ocoj, xchi Moisés cha.

⁷ Xlajw cha, 'ix yawtn cot Moisés win Josué 'a stz'ey, 'a sat smasnil eb' chon̈b' cha, 'ix yaln 'a 'ixtic: Caw te'n tzotj a b'a, man̈ ach xiwoc, yujto ach 'oj e'ch eb' 'anma tic 'a sat lum lum 'ix yac' Jehová sti ya'n 'a eb' qui mam quichmec. Ach 'oj a'cn 'och eb' 'a sat lu'um.

⁸ A Jehová 'oj b'ab'ljoc o'oj, caw 'ayc'n̈ej et'oc. Man̈ a na to tzach yactj can a ch'ocoj. Yuj cha, man̈ ach xiwoc, man̈ ach meltzjoc 'a a patic, xchi Moisés.

Tz'awtx ley*r* 'a yic tzjaw junjn yucl ab'il

⁹ 'Ix stz'ib'n can Moisés smasnil jun tzo'n̈ ley tic, xya'n can 'a eb' ya'mal 'och sti eb' 'anma 'a Dios, atn eb' yin̈tl can Leví; eb' yi'mal b'ey scaxail strato Jehová. Xya'n pax 'a eb' yichmtac wincal chon̈ab'.

¹⁰ 'Ix yaln can jun ley tic 'ixtc 'a eb': A yic tz'acw junjn yuctquil ab'il, yic 'aych q'uin̈ chinama, ata tz'ajx niwnc'ojlal smasnil sb'oc eb' 'anma'.

¹¹ A yic tzyamn sb'a smasnil eb' chon̈b' 'a yojltac Jehová Dios, 'a jun lugar to sic'b'il 'el yu'uj, ata tz'awtx jun ley tic yab' eb' smasnil.

¹² Yowlal tzyam sb'a smasnil eb' chon̈b' tic, eb' winac, eb' 'ix 'ix, eb' 'unin, yet' eb' chuc chon̈b'al 'ayc' 'a yol e chon̈ab', sec tzyab' eb' yawtx jun ley tic. Tzcuyn eb', sec tzxiw eb' 'a Jehová Dios, tzb'eylb'an pax eb' smasnil tas tzyala.

¹³ An̈jtona', 'icha eb' eyunnal ax tic, man̈ yojcoc eb' jun ley tic; yowlal 'oj yab' eb', ax scuyn pax eb', sec wach' 'oj xiw eb' 'a Jehová qui Diosalec 'a smasnil tiempo. Atn 'a yic 'ayx xo 'ec' 'a sat lum lum 'oj eyico'oc cha, yic 'oj e c'axw 'ec' 'a a Jordán cha, xchi Moisés.

Jun tzo'n̈ slajb' checnb'il*r* 'ix yal Jehová 'a Moisés

¹⁴ Xlajw cha, 'ix yaln Jehová 'a Moisés 'ixtic: 'Ilto, wan sc'och stiempoal a chami; yuj cha, 'awtj cot Josué tzex 'at e chawn̈il 'a jun Mantiado 'aj tzin chaj in b'a eyet'oc, sec ata 'oj wa'cn 'och yopiso, xchi. Yuj cha, 'ix 'at Moisés yet' Josué 'a jun Mantiado cha.

¹⁵ Ata 'ix sch'ox sb'a Jehová 'a eb' 'a scal jun niwquil 'asn 'ix 'och oyn 'a sti smac jun Mantiado cha.

¹⁶ 'Ix yaln Jehová 'a Moisés 'ixtic: Ach tic jab'xoj wal 'oj a chami, ax jun chon̈b'al eb' 'anma tic, 'oj ya'cn 'at sb'a eb' 'a sdiosal jun tzo'n̈ chuc chon̈b'al 'ayc' 'a sat lum lum 'aj 'oj c'och cajn eb' cha. Yuj cha, ax in yactn can eb', ax sjun 'el eb' in trato 'ix in b'o yet'oc.

¹⁷ Yuj wal cha, 'oj cot wowl 'a eb', ax wactn can eb' sch'ocoj. Man̈x 'oj in na cot eb', man̈x yalnb'ilc yailal yet' pax b'ilc'ojlal 'oj jawc 'a yib'n̈ eb', masnto 'oj yal eb' 'ixtic: ¿Tas wal yuj tzcab'c syail, yuj am to man̈x 'ayc 'ec' qui Diosalec quet'oc? 'oj schic eb'.

¹⁸ Palta wal yel 'oj wel ch'umn 'a eb' 'a jun c'u cha, yuj smasnil maysch'olnil tzb'o eb', yet' yuj pax to tzyal sb'a eb' 'a jun tzo'n̈ comn dios.

¹⁹ A ticnec, tz'ib'j can jun b'it 'oj wal 'aych tic, tzlajw cha, tza'n scuy eb' et chon̈ab' sec 'oj sb'itnoc eb', yic tz'och testigoal wuj 'a eb'.

²⁰ A yic 'oj lajwc wi'n 'och eb' 'anma tic 'a sat lum lum 'aj 'ix wac' in ti wa'n 'a eb' e mam eyicham, lum caw 'ay syaxil sat, caw 'oj wa eb' si'mb'il, 'oj b'ut'joc sc'ojl eb', ax sb'a'chb'i eb'. 'Oj lajwc cha, ax yoch tza'n eb' yuj jun tzo'n̈ comn dios, ax yi'n 'ejm sb'a eb' 'a 'a; an xo tic, 'oj in spatquilc can 'el eb', ax sjun 'el eb' in trato 'ix in b'o yet'oc.

²¹ Palta a wal yic 'oj jawc jun tzo'n̈ yailal yet' somc'ojlal 'a yib'n̈ eb', a jun b'it tic, a 'oj yac' testigoal sb'a 'a eb'. Ax yin̈tl eb', 'oj sna cot eb' jun b'it tic, ax sb'itnan eb'; yujto a yic mantzac xon c'och eb' 'a sat lum lum 'aj 'ix wac' in ti wa'n 'a eb', wojc xo si'mb'il, tas 'ayc' 'a snab'en eb', xchi Dios 'a Moisés cha.

²² A 'a yic jun c'u cha, ata stz'ib'j can Moisés jun b'it cha, xlajw cha, 'ix ya'n scuy eb' yit chon̈ab'.

²³ 'Ix yaln Jehová jun checnb'il 'ixtc 'a Josué win yunnal Nun: Caw te'n tzotj a b'a, man̈ ach xiwoc, 'aynn̈ej 'ec' et'oc, yujto ach 'oj e'ch eb' israel tic 'a sat lum lum 'aj 'ix wac' in ti wa'n 'ayex, xchi.

A ch'an̈ libro yic sley Dios

²⁴ Ax yic xlajw stz'ib'n Moisés jun tzo'n̈ ley tic 'a ch'an̈ u'un̈,

²⁵ 'ix yaln 'ixtc 'a eb' yin̈tl Leví, eb' 'ajcuenta yi'n b'ey scaxail strato Jehová:

²⁶ Chajec jun ch'an̈ un̈ yic ley tic, tzeya'n 'och ch'an̈ 'a stz'ey scaxail strato Jehová qui Diosalec, yic tz'och testigoal 'ayex.

²⁷ Yujto wojtac, to ax tic caw wal pit ex, tenmtac ex. 'Aynto cob' 'ec' eyet'oc, palta 'in toxn to tenmtac tzeyutj e b'a 'a Jehová Dios, ¿ocxom wal yic 'oj in chami?

²⁸ 'Awtjec cot smasnil eb' yichmtac wincal chon̈ab', yet' eb' yajl yajch 'a junjn 'in̈tal 'a e cal, to tzwalcn yab' eb' jun tzo'n̈ tic, tzwa'cn 'och satcha'an̈ yet' lum lum tic testigoal 'ayex.

²⁹ Yujto wojcxoni to a yic 'oj in chami, 'oj e juw 'eli, ax eyi'n 'el e b'a 'a jun b'e 'ix in ch'oxcn 'ayex. Wojc paxi, to 'oj jawc yailal 'a eyib'n̈ b'aq'uin̈, yujto 'oj e tzuntzc cot yowl sc'ojl Jehová yuj e maysch'olnilal yuj pax jun tzo'n̈ comn dios 'oj e b'o', xchi Moisés.

Sb'it Moisés

³⁰ Xlajw cha, syamn 'och Moisés yaln spaxti'al jun b'it tic, tz'el yich masnto 'a slajub', 'ix yal yab' smasnil eb' yit israelal yamn cha: