Dt 30 - Chuj San Sebastian Bible

Yaxilal yet' catab'

¹ Tox 'ix wac' e si'lc yaxilal 'oj jawc 'a eyib'n̈ yuj Jehová qui Diosalec toto 'oj eyicloc. An̈jtona waljnacx jun tzo'n̈ catab' 'oj ya' cot 'a eyib'an̈ toto ax tic 'oj e patquiljcan 'el Jehová. Palta a yic sactzicnacx eyajcn 'at 'a jun tzo'n̈ nacion̈ 'a caw najat, 'oj nachjoc 'el eyu'uj to a tz'a'n 'och eyailal.

² Toto ax tic yet' eb' eyunnal, eyisil tzex meltzj pax 'a Jehová yet' smasnil e c'ojol yet' 'a smasnil e nab'en, tze b'eylb'an pax jun tzo'n̈ schecnb'il wan waln can 'ayx ticnec,

³ toto 'ixta 'oj eyutc e b'a, ax Jehová qui Diosalec 'oj sjel pax snab'en 'a eyib'an̈. 'Oj 'o'x 'och sc'ojl 'ayex. Ax ex smolb'tzan cot jun 'ejm xo 'a jun tzo'n̈ nacion̈ 'aj pechb'ilx can 'at 'a 'icha presoal.

⁴ Wach'xam tzex sactzic can 'at 'a yolyib'n̈q'uinl tic, palta a 'aj 'ayx 'ec' cha, atta 'oj ex yi' paxt Jehová qui Diosalec.

⁵ A 'oj eyi'n paxt jun 'ejm xo 'a sat lum lum 'aj 'e'nc cajn eb' qui mam quichmec, ax e cajn pax lum jun 'ejm xo. Caw 'oj eyoch ricoal, 'ec'b'al xo 'oj 'aj e b'isl 'a yib'n̈ eb' qui mam quichmec cha.

⁶ 'Oj ya'ch Jehová qui Diosalec yechl strato 'a e nab'en yet' 'a snab'en eb' eyin̈til, sec 'oj e chamc'ojloc Jehová yet' smasnil e c'ojol yet' smasnil e nab'en. Toto 'ixta', 'oj najtxb'oc e q'uinal.

⁷ Ax Jehová Dios, 'oj ya'cn 'at smasnil jun tzo'n̈ catb' chi 'a yib'n̈ eb' 'ajc'ojl yajch 'ayex, yet' 'a yib'n̈ eb' tzex pechn b'eyc'oc yuj schichnc'ojlal.

⁸ Ax xo tic tzex meltzj can pax 'a Jehová, tzeyiclni, tze b'eylb'an smasnil jun tzo'n̈ schecnb'il wan waln can 'ayx tic.

⁹ 'Oj eyoch ricoal yuj Jehová Dios, ax ya'n syaxil 'a yib'n̈ smasnil tas 'oj e b'o', 'a yib'n̈ eyunnal, 'a yib'n̈ e cajb'en noc', yet' 'a yib'n̈ smasnil e munljel. 'Oj tzaljoc Jehová yuj tas wach' tze b'o'o, 'icha yutjnac stzalj yet' eb' qui mam quichmec.

¹⁰ Toto 'oj eyiclc smasnil tas tzyal Jehová qui Diosalec, tzeyiclj schecnb'il yet' scuynb'il tz'ib'b'il can 'a ch'an̈ un̈ yic ley tic, tze jeln e b'eyb'al 'a smasnil e c'ojol yet' 'a smasnil e nab'en. To 'ixta', 'oj e cha yaxilal cha.

¹¹ A jun tzo'n̈ checnb'il wan wa'n eyojcoc can 'el tic, man̈ 'ajltacc qui yiclni, man̈ najtoc pax 'ayl 'a qui tz'ey.

¹² Man̈oc 'a satchan̈ 'ay, sec wach' matz eyal 'ixtic: ¿Mach wal junc tztac' s'atq'ue 'a satchan̈ cujec, yic tz'at yab'nc 'emta, tzlajw cha, tzyaln pax cab'ec, sec wach' tzqui yicljec? sec man̈ xe chioc.

¹³ An̈jtona', man̈oc pax 'a sc'axpil 'ec' a mar 'ay, sec matz eyal 'ixtic: ¿Mach wal junc tztac' sc'axptan 'ec' a mar tic cujec, yic tz'at yab'nc 'e'ta, tzlajw cha, tzyaln pax cab'ec, sec wach' tzqui yicljec? sec man̈ xe chioc.

¹⁴ Ocxo jun, a jun checnb'il tic caw la'n yaj 'a qui tz'eyec. Tzlaj calb'tan̈oc, 'ayc' pax xon 'a qui nab'enec, sec wach' tztac' qui yiclniec.

A q'uinal yet' chamel

¹⁵ A ticnec, tic wal tzwac' e si'loc 'aj 'ay tas tze nib'ej: ¿tom a e q'uinal yet' swach'ilal mto a maysch'olnil yet' chamel?

¹⁶ Yuj cha, tzwalcn 'ayx ticnec to tze chamc'ojlej Jehová qui Diosalec, tzex 'och tza'n yu'uj, tzeyiclni schecnb'il, yet' scuynb'il. Toto 'ixta', wach' 'oj eyaj e b'ey 'a swach'il. Caw 'oj niwtjoc e b'isul, ax ya'n Jehová syaxilal 'a eyib'n̈ 'a sat lum lum 'oj eyico'oc cha.

¹⁷ Palta toto tzeyij 'el e nab'en 'a 'a, matz e chaj eyab' smasnil jun tzo'n̈ tic, tzyal e c'ojl tzex 'och tza'n yuj jun tzo'n̈ comn dios, yic tzeyaln e b'a 'a 'a, tzex 'em cumn pax 'a yojltac eb',

¹⁸ toto 'ixta', wal 'a jun c'u tic, tzwaln can 'ayex, chajtlto 'oj e chamn̈ej. Man̈ najtloc 'oj eyec' cajn 'a sat lum lum 'oj eyi'cn 'ec' 'a yic 'oj e c'axw 'ec' 'a yojl a Jordán.

¹⁹ Wal 'a jun c'u tic, tzwa'n can 'och satcha'an̈ yet' lum lum tic testigoal to 'ix wa'cn e si'loc tas tze nib'ej, ¿am q'uinal, mto a chamel? ¿am yaxilal, mto a catab'? Palta a cab' e q'uinl tze si'cn 'eli, sec wach' 'oj eyaj e b'ey yet' eb' eyin̈tl 'a eyojltac b'aq'uin̈.

²⁰ Chamc'ojlejc Jehová qui Diosalec, yiclumn̈ej tzeyutj e b'a 'a 'a, tzex 'och tza'n yu'uj. Toto 'ixta', yujn̈ej Jehová 'oj e cha e q'uinal, najtl 'oj eyec' cajn 'a sat lum lum 'ix yac' Jehová sti ya'n 'a eb' qui mam quichmec, atn Abraham, Isaac yet' Jacob, xchi Moisés.