Dt 3 - Chuj San Sebastian Bible

'Emnc win Og sreyl Basán

¹ Xlajw cha, chucx b'e 'aj on̈ 'atc paxi, 'ix qui tojlb'tzanc 'at qui b'a 'a chon̈b' Basán. Palta ax win Og sreyl jun nacion̈ cha, 'ix 'el yet' smasnil eb' soldado yic tzya'n owl quet'ec 'a chon̈b' Edrei.

² Yuj cha, xyaln Jehová 'ayn 'ixtic: Man̈ ex xiwoc, a win rey tic yet' smasnil eb' soldado yet' pax smasnil schon̈ab', tox 'ix wac' eb' 'a yol e c'ab'. 'Icha wal xeyutj win Sihón, win sreyl eb' amorreo cajn 'a Hesbón, 'ixta pax tzeyutj e satn 'el eb', xchi 'ayin.

³ 'Ixta wal xyutj Jehová qui Diosalec ya'n win Og 'a yol qui c'ab'ec yet' smasnil eb' soldado win cha. C'uxn 'ix qui milc can eb', man̈x 'a eb' xcan 'a spitznal cujec.

⁴ An̈jtona', 'ix quijec 'ec' smasnil eb' chon̈b' 'ay 'a yol slugar win cha, man̈x 'a junc xcan cujec. 'Ay 60 eb' lum chon̈b' chi 'a smasnil, tzyal 'el'chi, smasnil lum chon̈b' 'ay 'a yol yic Argob, 'a 'aj tzyac' win Og yajlil 'a lum Basán.

⁵ Smasnil jun tzo'n̈ chon̈b' cha, macb'il yuj smuroal, caw chan̈ yaj sb'o'i, q'uen pax smac 'aychi, 'aych pax jun tzo'n̈ q'uen hierro syamnub'loc. 'Ayt pax jun tzo'n̈ chon̈b' may smuroal, man̈ 'ayc 'och sb'isloc, palta 'ix qui satc 'el eb'.

⁶ 'Ix qui satc 'el eb' 'icha 'ix cutjec win Sihón, atn win sreyl Hesbón. Xqui milc cham eb' winac, eb' 'ix 'ix, yet' pax smasnil eb' 'unin.

⁷ A eb' 'ajc'ojl yajch 'ayn̈ec cha, cojxn scajb'en noc' eb' xcan quet'ec, yet' pax smasnil tas 'ay 'a eb'.

⁸ 'Ixta wal 'ix 'aj lum slum eb' amorreo scan 'a yol qui c'ab'c 'a jun tiempoal cha, atn lum 'ay 'a sti a Jordán, 'a stojlal 'aj tzq'uel c'u. Tz'atn̈j 'a sti a Arnón masnto tzc'och 'a lum stzalnil Hermón.

⁹ (A jun tzaln cha, Sirión sb'i yuj eb' 'aj Sidón, ax eb' amorreo, Senir sb'i yuj eb'.)

¹⁰ C'uxn xquijec 'ec' jun tzo'n̈ chon̈b' 'aj tzyac' win Og yajlil, atn smasnil lum chon̈b' 'ay 'a lum pan̈n cha, smasnil lum Galaad yet' lum Basán, masnto tzc'och 'a chon̈b' Salca yet' 'a chon̈b' Edrei, xchi Moisés.

¹¹ (Cojxn win Og chi yin̈tl eb' 'anma niwc stel 'aycn 'a jun lugar cha. A scaxail b'ob'il, q'uenn̈ej smasnil, chan̈e metro yoc, jab'xoj man̈toc chab' metro sat, checl to yaj jun chi 'a chon̈b' Rabá 'a yol slugar eb' amonita.)

A smacl lum eb' yin̈tl Rubén*r* eb' yic Gad yet' spacl eb' yic Manasés

¹² 'Ix yaln pax Moisés 'ixtic: A lum lum xquijec 'ec' 'a eb' 'anma 'a jun tiempoal cha, 'ix wa'cn lum 'a eb' yin̈tl Rubén yet' 'a eb' yin̈tl Gad. Smasnil lum 'ay 'a yol yic Aroer, yet' lum 'ay 'a sti a Arnón, masnto tzq'ue'ch 'a spacl lum stzalnil Galaad, 'ix can lum 'a eb', yet' jun tzo'n̈ chon̈b' cha.

¹³ Ax jab'x lum Galaad cha, smasnil lum Basán, 'a 'aj ya'jnac win Og yajlil, yet' smasnil lum Argob, checl yaj 'a sat eb' 'anma', to yic eb' niwc stel lu'um. A lum chi xwac' 'a spacl eb' yin̈tl Manasés.

¹⁴ (A Jaír, win yin̈tl Manasés, a 'ix can 'a lum 'ay 'a yol yic Argob, masnto tzc'och lum 'a smon̈jonal lum Gesur yet' Maaca. A sb'i xya'ch 'a lum Basán cha, Havot-jaír xyac' sb'ioc.)

¹⁵ A 'a win Maquir ata xwac' lum yic Galaad.

¹⁶ Ax 'a eb' yin̈tl Rubén yet' eb' yin̈tl Gad, ata xwac' lum 'ay 'a snan̈l Galaad yet' a niwquil a Arnón. Ata tz'ec' smon̈jonal lum 'a spacl lum ch'olan, masnto tzc'och 'a sti a Jaboc, atn a 'aych smon̈jonoc eb' amonita.

¹⁷ Ax lum 'ay 'a stojlal 'aj tzq'uel c'u, 'ix wac' lum span̈nil sti a Jordán 'a eb'. Lum tzq'ue'ch 'a span̈nil lum tzaln Pisgá 'a stojlal 'aj tzq'uel c'u, atn jun chi mon̈jon yaj 'a a niwquil a Jordán. Tz'atn̈j sti a Jordán cha, tzc'och 'a jun a niwquil pama tzcuch Quinéret masnto tzc'och 'a a mar yic Arabá, atn pax a tzcuch Mar Muerto.

¹⁸ A 'a jun tiempoal cha, ata xwalcn jun tzo'n̈ checnb'il tic 'a eb' yin̈tl Rubén, 'a eb' yin̈tl Gad, yet' 'a spacl eb' yin̈tl Manasés. 'Ix waln 'a eb' 'ixtic: A Jehová qui Diosalec, a tz'a'n jun lugar tic eyico'oc. Jantcn̈ej ex to tztac' eya'n owal, 'ijec eyamc'ab' yic owl cha, tzlajw cha, tzex b'ab'lj yuj eb' quit israelal tic.

¹⁹ Cojxn eb' eyistzil yet' eb' eyunnal tzcan 'a eb' lum chon̈b' 'ix wac' 'ayx tic, tzcan pax smasnil e cajb'en noc', yujto til wal no cajb'il eyu'uj.

²⁰ Colwjan̈c yet' eb' quit israelal tic, masnto 'oj yi'cn eb' slum tzyac' Jehová, atn lum 'ay 'a stojlal 'aj tz'em c'u 'a sc'axpil 'ec' a Jordán. At yic 'oj ya'nc Jehová junc'ojlal 'a eb', 'icha 'ix yutj ya'n 'ayx ax tic, 'ixta to b'i'an, tzex meltzj paxt 'a lum eyic 'ix wa'cn tic, xin chi 'a eb'.

²¹ A 'a Josué, ata xwal jun checnb'il tic 'ixtic: 'Ix el wal si'mb'il tas 'ix yutj Jehová qui Diosalec chawn̈ eb' rey cha. 'Icha wal x'aj eb' cha, 'ixta pax 'oj 'aj jun tzo'n̈ xo eb' rey 'a jun tzo'n̈ xo lugar 'aj 'oj e c'ochi.

²² Man̈ ach xiwoc, yujto a Jehová qui Diosalec, a 'oj 'a'noc owl cujec, xin chi 'a 'a.

Ma'ix chax 'och Moisés 'a lum Canaán

²³ A 'a jun tiempoal cha, ata in tew 'och 'a Jehová, xwaln 'a 'ixtic:

²⁴ Mamin Jehová, a ticnec xa chaj 'el yich a ch'oxni to niwn el'chi yet' a jelnal 'a 'ayn a checb' in tic. May junc xo Dios 'a satcha'an̈ mto 'a sat lum tic 'ay sjelnal sb'on junc tas satjub'tac yilx 'icha tas tza b'o tic.

²⁵ Tzin tew wal 'ayach, comnoc tzin a chaj 'ec' 'a sc'axpil 'ec' a Jordán tic. Tzin nib'j tzin c'och 'a sat jun lum caw wach' cha. Tzin nib'j wal tz'at wil lum lum 'ay 'a jolmctac witz cha, yet' pax lum Líbano, xin chi 'a 'a.

²⁶ Palta ax Jehová 'ix cot yowl 'ayin. Eyujn̈ej wal ax tic, yuj cha, ma'ix yac' tas xin c'an 'a 'a. 'Ix yaln 'ayn 'ixtic: Colb'xo al jun tic 'ayin.

²⁷ Lem, q'uen̈ta 'a sjolm lum witz Pisgá tic. Ata 'oj elcn 'at lum lum chi 'a stojlal norte, 'a stojlal sur, 'a stojlal 'aj tzq'uel c'u yet' pax 'a stojlal 'aj tz'em c'u. Al wal ec' 'a sc'axpil 'ec' a Jordán cha, may xon b'i'an.

²⁸ A ticnec, 'a'cn snab'enoc Josué, tza cuyn cani, sec a 'oj jucb'tzanc eb' in chon̈b' tic, ax spojn 'ec' jun lum chi 'a eb', atn lum 'oj elcn 'at cha, xchi 'ayin.

²⁹ 'Ixta wal on̈ 'ajc cochcwan 'a lum pan̈n 'a yojltac Bet-peor, xchi Moisés.