Dt 28 - Chuj San Sebastian Bible

Yaxilal tz'ajx 'a eb' yiclum

¹ Toto caw yel, yiclum 'oj eyutc e b'a 'a Jehová qui Diosalec, ax e b'eylb'an smasnil jun tzo'n̈ schecnb'il tzwalcn 'ayx tic, toto 'ixta', caw niwn 'oj eyaj 'el'ch yuj 'a yib'n̈ jun tzo'n̈ xo nacion̈ 'a yolyib'n̈q'uinl tic.

² An̈jtona smasnil jun tzo'n̈ yaxilal 'oj wal tic, 'oj jawc 'a eyib'an̈, toto 'oj eyiclc tas xyal Jehová qui Diosalec.

³ 'Oj 'ajxoc yaxilal 'a eyib'n̈ 'a yol e chon̈ab', yet' 'a 'ajtil tzex munlji.

⁴ 'Oj 'ajxoc yaxilal 'a yib'n̈ eb' eyunnal, 'a yib'n̈ smasnil eyawb'en, 'a yib'n̈ e cotc wacax, e cotc calnelu, e cotc chiwo yet' 'a yib'n̈ yune smasnil jun tzo'n̈ xo e cajb'en noc'.

⁵ 'Oj yac' Dios syaxilal 'a yib'n̈ e trigo, e cebada yet' 'a yib'n̈ smasnil tas tze c'uxu.

⁶ 'Oj yac' syaxilal 'a eyib'n̈ 'aj tzex laj 'ati yet' 'aj tzex laj japxi.

⁷ A eb' 'ajc'ojl yajch 'ayex, a Jehová 'oj 'a'nc 'och eb' 'a yol e c'ab', yic 'oj ya'nc cob' eb' owl eyet'oc. Caw stzol-l 'oj 'aj eb' scot 'ayex, palta caw sactzicnac 'oj 'aj eb' s'at 'elc eyu'uj.

⁸ A Jehová 'oj ya' cot syaxilal 'a yib'n̈ e c'un̈a yet' 'a yib'n̈ smasnil tas tze b'o'o. 'Ixta wal 'oj yutc ya'n e tzaljc'ojlal 'a sat lum lum 'oj yac' 'ayx cha.

⁹ Toto tzeyiclj smasnil schecnb'il Jehová, tze b'eylb'an pax sb'eyb'al, 'oj ex yalch schon̈b'oc, 'icha wal yutjnac yaln cani.

¹⁰ Toto 'ixta', ax smasnil eb' nacion̈ 'ay 'a yolyib'n̈q'uinl tic, 'oj yojcoc 'el eb' chajtlto sic'b'ilx 'el yuj Jehová, yuj cha, caw 'oj xiw eb' 'ayex.

¹¹ A Jehová caw 'oj sch'ox swach'c'ojlal 'ayex, til wal 'oj 'aj eyunnal. Til wal 'oj 'aj yune e cajb'en noc'. Til wal pax 'oj 'aj sat eyawb'en 'a sat lum lum 'aj ya'jnac sti ya'n 'a eb' qui mam quichmec.

¹² 'Oj sjac wal satchan̈ 'aj 'ay sricoal, ax yem 'a eyib'n̈ 'icha yem n̈ab' 'a yib'n̈ lum lum 'a stiempoal, yic caw wach' tz'aj smasnil e munljel. 'Oj stac' eya'n majnil 'a jun tzo'n̈ xo nacion̈, palta ax xo tic, may tas 'oj e c'an e majnc 'a junc xo mach.

¹³ Toto tzeyiclj smasnil schecnb'il Jehová qui Diosalec, atn smasnil jun tzo'n̈ xwal 'ayx tic, to 'ixta', 'oj ex ya'cn 'a b'ab'el, man̈oc to 'a slajb' 'oj e cani; caw niwn 'oj eyaj 'el'ch 'a yib'n̈ jun tzo'n̈ xo nacion̈, may b'a'n̈ 'oj e can 'a yalan̈.

¹⁴ 'Ixta wal 'oj eyaji, toto matz eyij 'el e b'a 'a jun tzo'n̈ cuynb'il tic, yic matz ex 'och tza'n yuj eb' comn dios, matz eyac' pax 'emmquilal 'a jun tzo'n̈ cha.

A tas tz'aj 'el'ch tenmtaquil

¹⁵ Palta toto ma'oj eyiclc smasnil schecnb'il yet' sley Jehová qui Diosalec, atn jun tzo'n̈ wan waln 'ayx tic, to 'ixta', 'oj jawc wal jun tzo'n̈ scatb' 'a eyib'an̈:

¹⁶ Caw wal maysch'olnil eyic 'a yol e chon̈ab' yet' 'a 'aj 'ay e munljel.

¹⁷ Caw wal may sch'olnil 'oj 'aj e trigo mto e cebada, may tas 'oj e c'uxu'.

¹⁸ Caw wal maysch'olnil yic eb' eyunnal, man̈ wach'c 'oj 'aj sat eyawb'en, e cotc wacax, e cotc calnelu mto e cotc chiwo, yet' yune smasnil e cajb'en noc'.

¹⁹ Caw maysch'olnil pax 'oj 'aj 'el'ch 'aj 'oj e 'ati, yet' pax yic 'oj e japxi.

²⁰ 'Oj ex scatb'tzoc can Jehová, ax ya'n cot yailal 'a eyib'an̈ yet' cusc'ojlal 'a yib'n̈ smasnil tas tze b'o'o. Jab' wal tiempo 'oj 'ec' eyu'uj, ax e lajw 'ejm yuj tas maysch'olnil tze b'o cha, yujto tzeyactj can Dios.

²¹ A Jehová 'oj 'a'nc cot junc niwquil yailal 'a eyib'an̈, a 'oj e satn 'el 'a sat lum lum 'aj 'oj e c'och cajn cha.

²² An̈jtona', 'oj ya' cot jun tzo'n̈ yab'il 'a e cal. 'Ay yab'il to tzex b'ac'b'chan̈ yu'uj, 'ay c'a'l yab'il, 'ay pax yab'il tzmalchan̈ e niwnal yu'uj. A tas 'oj eyawoc, 'oj tacjoc yuj c'ac', man̈x 'oj yac' n̈ab'. 'Oj jawc syab'il e trigo masnto 'oj e lajw 'eli.

²³ Man̈x 'oj cot n̈ab', ax lum lum tic, man̈x 'oj yac' lum sb'a'al.

²⁴ A pococ yet' arena, a chi 'oj ya' cot Jehová sjelc n̈ab' 'a eyib'an̈, masnto 'oj e lajw 'eli.

²⁵ Caw 'oj ex yac' ganar eb' 'ajc'ojl yajch 'ayex, stzol-l 'oj eyaj e 'at eyac' cob' owl yet' eb', palta caw sactzicnac 'oj eyaj e 'at 'elc yuj eb'. Caw wal 'oj sat sc'ojl smasnil nacion̈ yuj tas 'oj eyaji.

²⁶ A no 'usej yet' no calte'al noc', a no 'oj chinc e niwnal. Toc 'ayt mach 'oj xib'tnoc e no'.

²⁷ A Jehová 'oj yac' wal eyab' syal si'mb'il, 'icha 'ix yutj eb' 'aj Egipto. 'Oj q'ue quiscab' 'ayex, yaxc'a yab'il, ax spitzw chan̈ sno'l e niwnal, yet' q'uilj yab'il. Man̈x 'oj stac' eyan̈tn e b'a 'a jun tzo'n̈ yab'il cha.

²⁸ An̈jtona', 'oj cot owya 'a e jolom, 'oj juwc 'el yol e sat, ax somchjchan̈ e nab'en.

²⁹ Toxn̈ej 'oj e machloc, yic 'oj e b'eyc' 'a chimc'ual, 'icha yec' machmnoc eb' toxn to matz uj yilni. Ax smasnil tas 'oj e b'o', may xon tas 'oj 'el'choc 'a wach'. Caw wal 'oj eyixtxi, 'oltac wal 'oj eyaji. Man̈x 'a mach 'oj stac' ex scolni.

³⁰ 'Oj eyac' e ti cob' e nupn yet' junc 'ix 'ix, palta chucx win 'oj way yet' 'ix. 'Oj cob' e b'o eyatut, palta ma'oj e caja'. 'Oj cob' e b'o e munljel, palta ma'oj e c'ux sat eyawb'en cha.

³¹ Caw q'ueln ex wal 'ochi, ax smiln eb' 'ajc'ojl chi e wacax, palta ma'oj e chi jac schib'jal no cha. 'Oj 'ijxoc 'ec' e b'uru, palta man̈x 'oj 'ajxoc meltzjoc no'. 'Oj smacb't eb' e calnelu, palta man̈x 'a mach 'oj stac' scoln 'el e no eyet'oc.

³² Caw q'ueln ex 'ochi, ax yajx eb' eyunnal yet' eb' eyisl 'a yol sc'ab' eb' chuc chon̈b'al. 'Oj e c'unb' e macn sjaw eb' 'a junjn c'u, palta man̈x 'oj stac' eyu'uj.

³³ A smasnil sb'al sat e lu'um, yet' sat smasnil eyawb'en, a eb' 'anma man̈ eyojcoc, a eb' 'oj c'uxnoc, 'oj eyab' wal syail, caw 'oltac 'oj eyaji.

³⁴ A yic 'oj eyilnc smasnil jun tzo'n̈ tic, ax scot owya 'a e jolm yu'uj.

³⁵ 'Oj yac' wal Jehová eyab' syal yuj yaxc'a yab'il 'oj q'ue 'a sjolm e penec, 'a e xub', yet' 'a smasnil e niwnal, may xon junc mach 'oj stac' ex yan̈tni.

³⁶ A Jehová 'oj eyi'n 'at yet' e reyl sic'b'il 'och eyu'uj, 'a junc nacion̈ to man̈ eyojcoc, man̈ yojcoc pax eb' qui mam quichmec. Ata 'oj eyac' servil jun tzo'n̈ comn dios, b'ob'il 'a te te', mto 'a q'uen q'ue'en.

³⁷ 'Oj sat sc'ojl jun tzo'n̈ xo nacion̈ eyu'uj, tu eyilx 'a sat eb'. 'Oj e b'uchx yuj eb' 'anma 'aj 'oj ex yi't Jehová.

³⁸ Til wal tas 'oj eyawoc, palta jab' wal tas 'oj e molo', yujto an̈j e no c'ulb' 'ay 'a sat lum lum chi 'oj c'uxnc 'ejmi.

³⁹ 'Oj eyawc cob' te uva, ax e tan̈wni yel-l cob'i', palta may xon sat te uva chi 'oj e molo', may xon yal uva 'oj eyuc', yujto an̈j sc'ocholal sat lum lum chi 'oj c'uxnc 'ejmi.

⁴⁰ Til wal te snun olivo 'a sat e lum cha, palta may xon jac te yalil chi 'oj e c'an aceiteil mto perjumail, yujto ton̈j 'oj puc te sat cha.

⁴¹ 'Ay eyunnal, ay eyisil, palta may eb' 'oj 'ochwan eyet'oc, yujto 'oj 'ijxoc 'at eb' 'icha presoal 'a junc xo nacion̈.

⁴² Smasnil te te tzyac' sat yet' smasnil eyawb'en, c'uxn 'oj lajwc eb' te sc'uxn no c'ulub'.

⁴³ A eb' chuc chon̈b'al 'ayc' 'a yol e chon̈ab', caw 'oj wach' jelnb'oc eb', ax xo tic, 'ipn slajw can 'ejm e jelnal cha.

⁴⁴ A eb' cha, 'ay tas 'oj stac' ya'n eb' majnil; ax xo tic, toc 'ayt tas 'oj stac' eya'n majnil. A eb' chi 'oj can 'a b'ab'el, ax xo tic, slajb' xoj 'oj e cani.

⁴⁵ Smasnil jun tzo'n̈ yailal tic, 'oj jawc eb' 'a eyib'an̈, 'oj 'ochn̈j eb' 'ayex, masnto 'oj e satl yu'uj, yujto matz eyiclj smasnil schecnb'il yet' sley Jehová qui Diosalec xyac' 'ayex.

⁴⁶ A jun tzo'n̈ yailal cha, sch'oxnb'il yowl sc'ojl Dios 'ayex, yet' pax 'a eb' eyin̈tl 'a smasnil tiempo.

⁴⁷ Yujto ma'ix eyac' servil Jehová qui Diosalec 'a tzaljc'ojlal, yet' 'a smasnil e c'ojol yic til wal tas wach' xyac' 'ayex.

⁴⁸ Yuj cha, yowlal 'oj eyac' servil eb' 'ajc'ojl 'oj ya' cot Jehová 'a e cal. 'Oj eyab' syal wejel, tacn̈ti'al, man̈ pichlal yet' smasnil yailal. Caw 'oj eyab' syal yuj eb' 'ajc'ojl cha, majniln̈ej 'oj eyajchi, masnto 'oj e lajw 'ejmi.

⁴⁹ A junc nacion̈al eb' 'anma caw najt 'ay 'a slajb' yolyib'n̈q'uinl tic, a 'oj yi' cot Jehová 'ayex. 'Icha wal sjelnal sb'ey junc no salt'iw yic tzjen̈wj no', 'ixta 'oj 'aj sjaw eb'. Chuc sti eb', ma'oj eyab' tas tzyal eb'.

⁵⁰ A jun tzo'n̈ 'anma cha, caw ow eb', may yel'ch eb' 'ichmtac winc 'a sat eb', matz 'o'ch pax sc'ojl eb' 'a eb' 'unin.

⁵¹ 'Oj schi eb' yune smasnil e cajb'en noc', ax sc'uxn eb' sb'al sat e lu'um, masnto 'oj e lajw 'el yuj eb'. Man̈x 'a e trigo 'oj yactc can eb', e yal uva, yet' eyaceite. Man̈x 'a pax e cotc wacax, e cotc calnelu mto e chiwo 'oj can yuj eb'. Yuj cha, 'oj e cham yuj wejel.

⁵² 'Oj 'och oyn eb' 'ajc'ojl chi 'a spatc 'el e chon̈ab'. 'Oj yac' eb' owl eyet'oc, masnto 'oj lan̈chjoc 'ejm smuroal e chon̈b' chi yuj eb', yet' jun tzo'n̈ yet'l eb' soldado 'aych yipc e c'ojol. 'Oj yoy eb' smasnil chon̈b' 'ay 'a sat lum lum 'oj yac' Jehová qui Diosalec 'ayex.

⁵³ A yic oyn 'och eb' 'ajc'ojl yac' owl eyet' 'a e chon̈b' cha, ax xo, caw 'ay e wejel. Yuj wejl cha, ax e chin 'ejm eyunnal yet' eyisil, eb' xyac' Jehová qui Diosalec 'ayex.

⁵⁴ An̈jtona pax win winc caw wach' snab'en, tu 'oj yutc win yiln 'och eb' yu'tac yet' 'a 'ix yistl win to caw chamc'ojlb'il yu'uj, yet' pax 'a eb' yunnal 'oj can to 'a yic jun tiempoal cha.

⁵⁵ 'Ixta 'oj yutc sb'a, sec man̈ locnoc eb' 'oj chinc schib'jal eb' yunnal win chi yet'oc. Yujto man̈x 'a tas wach' sc'uxni yic 'ayc' eb' 'ajc'ojl yac' owl eyet' 'a yol e chon̈b' cha. Atn wal jun niwquil cusc'ojlal chi 'oj 'em 'a e cal yuj eb' 'ajc'ojl cha.

⁵⁶ An̈jtona pax 'ix 'ix caw wach' snab'en, 'ix tz'oc' sc'ojl 'a junc xo mach; matz nib'j xon tztec' jac lu'um, 'aychn̈ej xan̈ab' tz'eq'ui, caw tu 'oj yutc 'ix yiln 'och win yichmil, atn jun caw chamc'ojlb'il yuj cob'i', yet' 'a eb' yune'.

⁵⁷ 'Ixta 'oj yut sb'a 'ix, sec man̈ locnoc eb' 'oj chinc eb' yune 'ix tzat 'alji. An̈jtona pax smoj yune 'ix cha, ma'oj yac' 'ix schi eb', mun 'oj sc'ultac chic 'ix eb' yune cha, yujto man̈x 'a tas wach' sc'uxni, yic 'ayc' eb' 'ajc'ojl yac' owl eyet' 'a e chon̈ab'.

⁵⁸ Toto ma'oj eyiclc jun tzo'n̈ checnb'il tz'ib'b'il can 'a ch'an̈ un̈ tic, may pax yel'ch Jehová qui Diosalec 'ayex, atn jun man̈x jantcoc swach'c'ojlal tzyac' 'ayex.

⁵⁹ To 'ixta', 'oj ya' cot Jehová wal niwc yailal 'a eyib'an̈, yet' 'a yib'n̈ eb' eyin̈til. 'Oj jawc jun tzo'n̈ yab'il to man̈x 'a yan̈il.

⁶⁰ 'Oj ya' cot jun tzo'n̈ yailal 'a eyib'an̈, 'icha jun tzo'n̈ jawnc 'a yib'n̈ eb' 'aj Egipto, atn jun tzo'n̈ 'aj ex xiwi. Man̈x 'oj 'el jun tzo'n̈ yailal chi 'ayex.

⁶¹ An̈jtona', 'oj ya' cot pax jun tzo'n̈ xo yailal to man̈xtzac b'inax 'a yojl ch'an̈ un̈ yic cuynb'il tic, masnto 'oj e lajw 'el yu'uj.

⁶² An̈ israel on̈c tic, caw niwn qui b'islec 'icha c'anal 'ay 'a satcha'an̈. Palta a 'a jun tiempoal cha, 'oj 'emtoc e b'isul, yujto matz eyiclj tas tzyal Jehová qui Diosalec.

⁶³ A Jehová caw 'ay stzaljc'ojlal yic tzya'n niwtjoc qui b'islec; 'ixta pax 'oj tzaljoc 'a jun tiempoal cha yic 'oj e lajw pax 'eli. Caw man̈x 'a yel'ch 'oj eyaj e satl 'a sat lum lum 'aj jab'xoj e c'och cajn cha.

⁶⁴ A Jehová 'oj e pechn can 'at 'a jun tzo'n̈ xo nacion̈, 'oj e sactzic can 'at 'a jun tzo'n̈ chon̈b' 'ay 'a smasnil yolyib'n̈q'uinl tic. Ata 'oj eyal e b'a 'a jun tzo'n̈ comn dios tzb'o yet' te te', yet' q'uen q'ue'en, jun tzo'n̈ to man̈ eyojcoc, man̈ yojcoc pax eb' qui mam quichmec.

⁶⁵ Ya' sb'a 'ayx 'ec' 'a jun tzo'n̈ nacion̈ cha, may xon jac e tzaljc'ojlal ta', ma'oj eyilj xon jab'oc, yujto a Jehová 'oj 'a'n jawc e xiwc'ojlal, caw cusltac yilx e sat yuj somc'ojlal.

⁶⁶ Xiwc'ojlal eyaj 'a smasnil tiempo yuj e q'uinal. 'Oj e xiw 'a c'ual, yet' pax 'a 'ac'wal. May xon b'a'n̈ 'ay e tzaljc'ojlal.

⁶⁷ Til wal xiwc'ojlal 'oj jawc 'ayex, yujto til wal tas 'ay smay 'oj eyila'. A 'a yic sq'uin̈b'ial, 'oj eyal 'ixtic: Comnoc 'ay mayoc sq'uic'b'i, 'oj e chioc. Ax 'a yic 'ac'wl cha, 'oj eyal pax 'ixtic: Comnoc 'ay mayoc sacb'i, 'oj e chioc.

⁶⁸ Wach'xam a Jehová 'ix yal 'ayex, to man̈x 'a b'a'n̈ tzex meltzj jun 'ejm xo 'a sb'el Egipto, palta 'oj ex ya'x meltzjoc 'a yol barco. Ata 'oj cob' e chon̈ch e b'a mosoal 'a eb' 'ajc'ojl yajch 'ayx cha, palta may xon junc eb' 'oj e manni, xchi Moisés.