Dt 27 - Chuj San Sebastian Bible

Q'uen q'uen 'aj tz'ib'x can 'och ley*r* 'a lum yich witz Ebal

¹ A Moisés yet' eb' yichm wincal chon̈b' Israel, 'ix yal eb' 'ixtc 'a smasnil eb' yit chon̈b' cha: A ticnec, tzeyiclj smasnil jun tzo'n̈ checnb'il tzcalcn 'ayx tic on̈.

² A yic 'oj eyec' 'a yol a Jordán, ax e c'och 'a sat lum lum 'oj yac' Jehová qui Diosalec 'ayex, tze tuscn chan̈ nan̈loc q'uen niwc q'ue'en, tzeya'ch poc spixloc, tze sucn 'och tan̈ 'a eb' q'ue'en.

³ Tzlajw cha, tze tz'ib'n can 'och jun tzo'n̈ cuynb'il tzwalcn 'ayx tic 'a eb' q'ue'en. Tze b'o jun tic, yic tzex 'och 'a sat lum lum caw yax sat, lum 'oj yac' Jehová qui Diosalec yet' eb' qui mam quichmec eyico'oc, 'icha yutjnac yaln can 'a eb'.

⁴ Yuj cha, a yic tzex c'axw 'ec' 'a yol a Jordán cha, tze sic' syam sb'a q'uen q'uen cha, tze tusn can chan̈ q'uen 'a lum yich witz Ebal.

^5-6 An̈jtona', yowlal tze b'o pax junc yet'l xajmb'al yic Jehová qui Diosalec 'a lum yich witz cha. A q'uen q'uen tzeya'ch 'a 'a, man̈ e tzey eb' q'ue'en, yujto a 'a yib'n̈ eb' q'uen 'aj 'oj eyac' tz'a e xajmb'al 'a Jehová Dios.

⁷ Ax eya'n pax e xajmb'al yic junc'ojlal. Ata 'oj e na q'uin̈, ax e wa 'a tzaljc'ojlal 'a yojltac Jehová.

⁸ Ax 'a eb' q'uen q'uen cha, ata wach' tzeyutj e tz'ib'n can 'och jun tzo'n̈ cuynb'il tzwalcn 'ayx tic, xchi Moisés.

A jun tzo'n̈ catab'

⁹ Ax Moisés, ajun eb' ya'mal 'och sti eb' 'anma chi yet'oc, atn eb' yin̈tl Leví, 'ix yaln 'a eb' yit chon̈b' chi 'ixtic: Sictac tzex 'aji, macljec eyab' tas 'oj wala'. Yujto a ticnec, on̈ 'och schon̈b'oc Jehová qui Diosalec.

¹⁰ Yuj cha, yowlal 'oj eyicloc, ax e b'eylb'an jun tzo'n̈ schecnb'il yet' scuynb'il tzwalcn 'ayx tic, xchi Moisés.

¹¹ A 'a jun c'u cha, ata 'ix yalcn Moisés jun tzo'n̈ checnb'il tic 'ixtc 'a eb' yit chon̈b' cha:

¹² A yic tzex c'axw 'ec' 'a yojl a Jordán, a eb' yin̈tl Simeón, Leví, Judá, Isacar, José yet' Benjamín, ata tz'aj eb' tic 'a lum yich witz Gerizim, sec ata 'oj yal eb' wach' paxti 'a yib'n̈ eb' chon̈ab'.

¹³ Ax eb' yin̈tl Rubén, Gad, Aser, Zabulón, Dan yet' Neftalí, ata tz'aj eb' 'a lum yich witz Ebal, sec ata tzyal eb' catb' 'a yib'n̈ eb' chon̈ab'.

¹⁴ A eb' yin̈tl Leví, caw 'ip 'oj yal eb' jun tzo'n̈ paxti tic 'ixtc 'a eb' yit chon̈b' chi smasnil:

¹⁵ Catb'tzaxc cab' eb' tzb'on junc yechl comn dios yet' q'uen q'uen to tenb'il, b'ob'il yuj eb' tztac' sb'oni. Tzb'on can 'och eb' 'a yet'ul 'a 'aj c'ultac yaji. A wal jun tzo'n̈ cha, yajb'il 'el yuj Jehová, xchi eb' levita. Ax smasnil eb' chon̈ab', 'oj yal eb' 'ixtic: 'Ixta cab' tz'aji, 'oj xchic eb'.

¹⁶ Catb'tzaxc cab' eb' may yel'ch smam snun 'a sat, xchi eb' levita. 'Ixta cab' tz'aji, 'oj xchic eb' chon̈ab'.

¹⁷ Catb'tzaxc cab' eb' tzt'un̈n smon̈jonal slum junc yit 'anma'il, yic tzto'n 'ec' slum junc xo mach, xchi eb' levita. 'Ixta cab' tz'aji, 'oj xchic eb' chon̈ab'.

¹⁸ Catb'tzaxc cab' eb' tz'ixtn paxti eb' matz uj yilni, yic tzjeln sb'e junc 'anma cha, xchi eb' levita. 'Ixta cab' tz'aji, 'oj xchic eb' chon̈ab'.

¹⁹ Catb'tzaxc cab' eb' tzb'on junc tas man̈ tojloc 'a eb' chuc chon̈b'al, mto 'a junc 'ix chamnc yichmil, mto pax 'a junc meb'a 'unn chamnc xo smam, xchi eb' levita. 'Ixta cab' tz'aji, 'oj xchic eb' chon̈ab'.

²⁰ Catb'tzaxc cab' eb' tzmuln yet' yistl smam, yujto 'a yet' jun 'ix chi tzyij 'el sq'uixwel smam, xchi eb' levita. 'Ixta cab' tz'aji, 'oj xchic eb' chon̈ab'.

²¹ Catb'tzaxc cab' eb' tzmuln yet' no noc', xchi eb' levita. 'Ixta cab' tz'aji, 'oj xchic eb' chon̈ab'.

²² Catb'tzaxc cab' eb' tzmuln yet' schab'l 'anab', wach'xam to yisl schab'l mam, mto yune schab'l nun, xchi eb' levita. 'Ixta cab' tz'aji, 'oj xchic eb' chon̈ab'.

²³ Catb'tzaxc cab' eb' tzmuln yet' sn̈i', mto yet' yalib', xchi eb' levita. 'Ixta cab' tz'aji, 'oj xchic eb' chon̈ab'.

²⁴ Catb'tzaxc cab' eb' tzmiln junc yit 'anmal 'a c'ultaquil, xchi eb' levita. 'Ixta cab' tz'aji, 'oj xchic eb' chon̈ab'.

²⁵ Catb'tzaxc cab' eb' tzchan tumin, yic tzmiln junc 'anma may jac smul, xchi eb' levita. 'Ixta cab' tz'aji, 'oj xchic eb' chon̈ab'.

²⁶ Catb'tzaxc cab' eb' to matz yiclni jun tzo'n̈ checnb'il tic, yet' pax eb' matz b'eylb'ani, xchi eb' levita. 'Ixta cab' tz'aji, 'oj xchic eb' chon̈ab'.