Dt 25 - Chuj San Sebastian Bible

¹ Toto 'ay chawn̈oc 'anma tzyac' owal, yowlal tz'at eb' sb'oyaj sb'a 'a sat eb' juez; a jun may smul cha, a tzcolchj cani, ax jun 'ay smul cha, tzcann̈j 'a yib'an̈.

² Toto yel xo niwn smul smoj wal sma'xi, a win juez chi tzaln 'a 'a, to tz'ec' teln 'a sat lu'um, q'ueln 'och wal win yajl cha, tzma'xi. A tzyal jantc smul cha, 'ixta tz'um chi tz'och 'a 'a.

³ A yic tzma'x junc 'anma yuj smul, matz 'ec' 'a yib'n̈ chawinc tz'um tz'och 'a 'a; toto tz'ec' 'a yib'n̈ sma'xi, man̈x 'a yel'ch 'a e sat tzyutj yab'ni.

⁴ Man̈ eya'ch spa no wacax yic tzte'w trigo no'.

Ley 'a win winac*r* yic tzyi'n win junc 'ix smu'

⁵ Toto 'ay chawn̈oc winc to yu'tac sb'a, junn̈j yatut eb' 'aj 'ay, ax tz'aji tzcham junc winac, palta mant 'a junc yunnal win tz'elcn yet' yistzil. A 'ix yistzil win cha, matz tac' yi'n 'ix junc xo win chuc wincal. Palta a win yu'tac win yichmil 'ix cha, a win tztac' yi'n can pax 'ix, sec 'ixta tzyutj win syiclni sleyal yic tzyi'n win 'ix smu cha.

⁶ Ax junc yune 'ix tzb'ab'l 'alji, a sb'i win yichmil 'ix chi chamnc cha, a tz'och sb'ic jun 'unn cha, sec matz satl sb'i win 'a scal eb' quit chon̈b'ec.

⁷ Palta toto a win winc chi matz yal sc'ojl tzyij 'ix smu cha, tztac' s'at 'ix 'at yal 'a eb' yichm wincal chon̈ab'. Tzyaln 'ix 'ixtic: A win in mu tic, matz yal sc'ojl win tzb'inax yu'tac 'a scal eb' quit chon̈b'ec; matz nib'j win tzwij in b'a yet'oc, 'icha yaln sleyal, xchi cab' 'ix.

⁸ Tzlajw cha, tz'awtx win yuj eb' yichmtac wincal chon̈b' cha, tzc'anb'n eb' 'a winac, tas yuj matz nib'j win tzyij sb'a yet' 'ix. Toto tzte'wtzej sb'a winac, matz nib'j win tzyij 'ix smu cha,

⁹ toto 'ixta', tzjaw 'ix 'a stz'ey winac, wal 'a sat eb' yichmtac wincal chon̈b' cha, tzyi'n 'el 'ix junc xan̈b' winac, tzupn 'och 'ix stzup 'a sat winac, tzyaln 'ix 'ixtic: 'Ixtc wal tz'aj eb' winc matz nib'j tzya'l yin̈tl yu'tac, xchi cab' 'ix.

¹⁰ Yuj cha, a tz'aj sb'inax yunnal jun winc chi 'a scal eb' yit chon̈ab', eb' yunnal win 'ic'b'il 'el xan̈ab', xchi cab' eb' 'anma'.

A jun tzo'n̈ xo ley

¹¹ Toto 'ay chawn̈oc winc wan ya'n owal, ax tz'aji, tzc'och yistzil junc winac, yic tzcoln 'ix yichmil chi yalni, tzyamn cot 'ix swincal junx win cha,

¹² toto 'ixta tzb'o 'ix, tzu'x cab' 'el sc'ab' 'ix 'ix cha, man̈ 'o'ch e c'ojl 'a 'ix.

^13-14 Man̈ e c'an chab'oc 'echtab', junc to man̈ tz'acnoc 'a yic tzex chon̈wji, yet' junc 'ec'b'al yic tzex manwji.

¹⁵ A wal eyechtab' tz'acan, a tze c'ana, sec wach' 'oj najtxb'oc e q'uinl 'a sat lum lum 'oj yac' Jehová Dios 'ayex.

¹⁶ Yujto a Jehová qui Diosalec, matz nib'j jun tzo'n̈ 'anma to man̈ tz'acnoc yechtab' yet' jun tzo'n̈ xo tas man̈ tojloc.

Yowlal tzsatx 'el eb' yin̈tl Amalec

¹⁷ Nac cot nab'an tas on̈ yutjec eb' yin̈tl Amalec yic 'ayn̈ec 'och 'a yol b'e, yic on̈ 'eltec 'a Egipto.

¹⁸ Nac cot si'mb'il chajtlto may xon jac xiwc'ojlal eb' 'a Dios, yic xya'n eb' owl quet'ec, yic caw may quipc yuj c'unb'lal. Xcham eb' quit chon̈b'ec yuj eb', atn eb' najt tza'n xoj cujec, yujto tz'el yip eb'.

¹⁹ Yuj cha, a yic 'oj e colx 'el yuj Jehová qui Diosalec, a eb' 'ajc'ojl oyn 'och 'a sti lum lum 'oj yac' Jehová Dios eyico'oc, yowlal tze satl yab'xil eb' yin̈tl Amalec 'a sat lum lum cha, man̈ eyac' sat e c'ojl 'a jun checnb'il tic.