Dt 22 - Chuj San Sebastian Bible

¹ Toto 'ay swacax, mto scalnelu junc eyit chon̈b' tzsati, toto tzeyil no', man̈ ton̈joc tzex 'ochcn q'ueln 'a no', palta to tzeyij 'at no 'a jun eyit chon̈b' cha.

² Q'uinloc a mach 'ay yic no cha, man̈ e tz'eyc e b'a yet'oc, mto man̈ eyojcoc mach 'ay yic no'. Tztac' eyi'n 'at no 'a eyatut, wach'n̈j cab' yaj no 'a eyatut cha, masnto tzsayx 'ec' no yuj mach 'ay yico'. Tzlajw cha, tzeya'n meltzjoc no 'a 'a.

³ An̈jtona', 'ixta pax tzeyutj no b'uru, mto junc pichul, mto junc xo tas tzsat yuj junc xo mach. Toto 'ay junc ex tzeyila, man̈ ton̈joc tzex 'ochcn q'ueln 'a 'a.

⁴ A yic tzeyilni to telwnac junc sb'uru, mto swacx junc eyit chon̈b' 'a yol b'e, man̈ ton̈joc tzex 'ochcn q'ueln 'a 'a, palta to tzex colwj eyi'n chan̈ no yet'oc.

⁵ A eb' 'ix 'ix, matz tac' ya'n 'och eb' 'ix spichl win winac, an̈jtona win winac, matz tac' ya'n 'och win spichl eb' 'ix 'ix, yujto a mach tzb'on jun tzo'n̈ tic, caw tzyajx 'el eb' yuj Jehová Dios.

⁶ Q'uinloc 'ay mach tz'ilchj junc no man̈an ch'ic yuj 'a sc'ab' te', mto 'a yol b'e, mto 'a sat lu'um, toto 'ayx e no cotc ch'ic cha, mto n̈olb' to e no', palta man̈n 'ejm no nunb'il chi 'a yib'n̈ e no', man̈ eyam no snun chi yet' no cotc ch'ic cha;

⁷ cojn e no cotc chi tzeyama, ax no snun cha, tzeyactj can 'at no'. Toto 'ixta 'oj e b'o', caw wach' eyico', 'oj najtxb'oc e q'uinal.

⁸ Toto 'ayx tze b'o junc eyatut pan̈n tz'aj yib'an̈, yowlal tzeya'ch smuroal sti 'eli, sec may junc eb' tz'ajx 'och 'a eyib'an̈, toq'ue 'ay junc 'anma tztelwi, mto tzchami.

⁹ Man̈ eyawc junc xo tas 'a scal eyawb'en uva, yujto 'ay smay yajx yowlal 'ayex, ax tz'aji man̈x 'oj 'ajxoc e c'ux jun tzo'n̈ cha.

¹⁰ A yic tze t'ocn e lum yet' chawn̈oc no noc' t'ocm lu'um, man̈ junn̈joc tzeyutj 'och junc no wacx yet' junc no b'uru.

¹¹ Man̈ eya'ch jun tzo'n̈ pichl caln yaj sjalx yet' lana, yet' pax te lino.

¹² Tzeya'ch yixta'il, mto yelwnub'l e pichl tze potlej, tzeya'ch 'a junjn stitac.

Ley 'a yib'n̈ 'ajmulal

¹³ Toto 'ay junc winc tzyij sb'a yet' junc 'ix 'ix, yic tz'och yistloc, palta ax yic tzlajw yi'n win 'ix, tzchacn sb'a win yet' 'ix, man̈x 'a schamc'ojlal win 'a 'ix,

¹⁴ tzyaln winac to 'ay smul 'ix. Tzpitzn chan̈ win yala', to tu yel yab'xil 'ix, tzyaln win 'ixtic: In nupn cob' yet' jun 'ix tic, palta ax yic in way yet' 'ix, 'ix wojcan 'eli, chajtlto man̈x cob'soc 'ix, xchi winac.

¹⁵ Toto 'ixta', ax eb' smam snun 'ix cob's cha, tz'at sch'ox eb' senyail yic scob'sal 'ix chi 'a yojltac eb' yichmtac wincal jun chon̈b' cha.

¹⁶ Ax yaln win smam 'ix cob's chi 'a eb' yichmtac wincal chon̈b' chi 'ixtic: 'Ix wac' 'ix wisl tic yistloc jun winc tic, palta ax ticnec, man̈xtzac snib'j win 'ix,

¹⁷ tzya'n 'och win 'es 'a yib'n̈ 'ix, tolab' 'ayx smul 'ix, tzyaln winac, tolab' man̈x cob'soc 'ix. Palta yaj senyail, chajtlto yel cob's to 'ix, xchi smam 'ix cha. A yic tzlajw yaln jun tzo'n̈ cha, tzlichn 'ejm win te nip chi 'a yojltac eb' 'ichmtac winc cha.

¹⁸ Ax eb' yichmtac wincal chon̈b' cha, a eb' tzyamn cot jun win winc cha, tzya'n 'och eb' yailal 'a yib'n̈ winac.

¹⁹ Tzya'n eb' yac' win multa, jun ciente q'uen tumn plata tzyac' winac, ax q'uen tumn cha, a eb' smam 'ix chi tzchani, yujto tzyal winac, to 'ayx smul 'ix cob's 'ix cha. Man̈ yujoc cha, tztac' spojn sb'a win yet' 'ix, palta tzcann̈j pax 'ix yistloc winac, masnto chamel.

²⁰ Palta toto yel, a 'ix cob's 'ix cha, sb'ojnacx 'ix 'ajmulal yic mantzac nupn 'ix,

²¹ to 'ixta', tz'ijx 'at 'ix 'a sti 'el yatut smam cha, ax eb' winc smasnil 'a jun chon̈b' cha, a eb' tzjuln cham 'ix yet' q'uen q'ue'en, yujto sb'o 'ix jun niwquil mul 'a scal eb' quit chon̈ab', tzyi'n pax 'el 'ix sq'uixwel smam. 'Ixta wal tz'aj satl jun maysch'olnil 'a e cal.

²² Toto 'ay junc winc tz'ilchj eyu'uj, to wan smuln yet' junc 'ix 'ix 'ay yichmil, tojln̈ej scham eb' schawn̈il. 'Ixta wal 'oj 'aj satl jun maysch'olnil chi 'a e cal.

²³ Toto 'ay junc 'ix cob's 'ayx strato tznupn yet' junc winac, palta ax tz'aji, chucx junc win tzmuln yet' 'ix 'a yol schon̈b' cha,

²⁴ to 'ixta', tz'ijx 'at eb' schawn̈il 'a yojltac despacho 'a jun chon̈b' cha, ata tzjulx cham eb' yet' q'uen q'ue'en. Tzcham 'ix cob's cha, yujto yol chon̈b' 'ayc' 'ix, ma'ix 'el yaw 'ix. An̈jtona win winc cha, tzcham winac yujto xyixtj win 'ix 'ix wan yoch yistloc win yit wincal win cha. 'Ixta tzeyutj e satn 'el maysch'olnil 'ayc 'a e cal.

²⁵ Palta toto 'ay junc winc tzb'eyc' 'a 'ajtil may 'anma', ax tz'aji, tz'ilchj junc 'ix 'ix yu'uj, palta 'ayx strato 'ix snupn yet' junc xo winac, tzya'n pural win 'ix smuln yet'oc, toto 'ixta', cojn win winc chi tzchami.

²⁶ Ax 'ix cob's cha, may tz'aj 'ix, yujto man̈oc 'ix tzsay smuloc, yuj cha, man̈ smojc tzcham 'ix. A tas tzb'o jun win cha, lajn 'icha junc winc tzmiln junc yit 'anma'il.

²⁷ Yujto tzyam cot win 'ix sch'ocj 'a 'aj may 'anma', yuj cha, wach'xam tz'el yaw 'ix, palta may junc mach tztac' scoln 'ix.

²⁸ Q'uinloc 'ay junc winc tz'ilchj junc 'ix cob's yu'uj, palta mant 'a strato 'ix tznupn yet' junc xo winac, tzya'n pural win 'ix smuln yet'oc. Ax tz'aji, tz'ilchj eb'.

²⁹ To 'ixta', a win winc cha, yowlal tzyac' win cincuenta q'uen tumn plata 'a smam snun 'ix cob's cha, yujto xyixtj 'el win 'ix. Yuj cha, yowlal tz'ochcn 'ix yistloc winac, matz tac' spojn sb'a win yet' 'ix masnto chamel.

³⁰ May cab' junc mach tznupn yet' yistzil can smam chamnac. Toto 'ay mach tzb'on jun cha, wan yi'n 'el sq'uixwel smam.