Dt 21 - Chuj San Sebastian Bible

A junc chamnc 'anma*r* man̈ checloc mach tzmilni

¹ Toto 'ay junc chamnc 'anma tz'ilchj sniwnal eyuj 'a sat lum lum 'oj yac' Jehová qui Diosalec eyico'oc, palta man̈ checloc mach tzmilni,

² a eb' yichmtac wincal chon̈ab', yet' eb' yajl 'oj nanoc, mto 'oj yechtoc eb' tas chon̈b'al la'n yaj 'a stz'ey jun lugar 'a 'aj 'ay sniwnal jun chamnc 'anma cha.

³ Ax eb' yichmtac wincal jun chon̈b' cha, eb' la'n yaj 'a stz'ey cha, tzyij cot eb' junc no cob's wacax, no mant 'a 'aj tzq'ue te yugo 'a sjolom,

⁴ tzyij 'ejm eb' no 'a junc span̈nil sti ch'oln 'aj tzb'ey a a', 'a lum lum 'ajtil mant 'a xon 'aj tz'awxi, axta tzma'x wecchjoc sjaj no'.

⁵ Tzlajw cha, ax eb' ya'mal 'och sti eb' 'anma 'a Dios, atn eb' yin̈tl can Leví, tzc'och eb' 'a stz'ey no'. Yujto a eb' sic'b'il 'el yuj Jehová qui Diosalec yic tz'ajx servil yuj eb', ax eb' tzc'ann swach'c'ojlal Jehová chi 'a eyib'an̈. Yuj tas tzyalcn eb' cha, tz'ajx can lajwc junc owal, mto junc chacjb'al 'a yol e chon̈ab'.

⁶ Ax eb' yichmtac wincal jun chon̈b' cha, tzb'iccn 'el eb' sc'ab' 'a yib'n̈ no cob's wacx chamnc xo cha,

⁷ ax yaln can eb' 'ixtic: An̈ tic on̈, man̈oc on̈ xqui mil jun 'anma tic on̈, ma'ix quil pax on̈ mach 'ix milni.

⁸ Mamin Jehová, 'ac' wal niwnc'ojlal 'a quib'n̈ an̈ a chon̈b' on̈ tic, yujto ach on̈ a col 'elta, man̈ a'ch jun mul tic 'a quib'n̈ yuj schic'l jun 'anma 'ix cham tic, sec man̈x 'a tas 'oj 'ajxoc yowlal, 'oj schic eb'.

⁹ Ax xo tic, tojln̈ej tzeyutj e b'on tas wach' 'a sat Jehová, sec 'oj eyajx niwnc'ojlal yuj schic'l junc 'anma cha.

Ley 'a yib'n̈ eb' 'ix 'ix*r* tzyamchj can 'a yic 'aych owal

¹⁰ A yic tzeya'n owl yet' eb' 'ajc'ojl yajch 'ayex, ax Jehová qui Diosalec, a tz'a'n eb' 'a yol e c'ab', yic tzeyi'n can eb' 'icha presoal.

¹¹ Toto 'ay junc mach 'a e cal tz'iln 'och junc 'ix 'ix 'a scal eb' tzyamchj cha, to caw wach' yilx 'ix, tznib'n win tz'och 'ix yistziloc,

¹² toto 'ixta', yowlal tzyij cot win 'ix 'a yatut, tzya'n win joxxoc 'el xil sjolm 'ix, tzlot'x 'el yech 'ix,

¹³ tzjelx 'el spichl 'ix 'aych yu'uj, yic xyamchj can 'ix cha. Tzlajw cha, tzcancn 'ix 'a yatut win winc cha, jun 'uj tztac' yoc' 'ix yuj smam snun, 'ixta to b'i'an, tztac' sway win yet' 'ix, tzyi'n can sb'a eb'.

¹⁴ Toto ax 'a spatquil xo, man̈xtzac snib'j pax win 'ix, tztac' ya'n 'el win 'ix 'a libre, palta matz tac' schon̈n win 'ix, matz tac' pax tz'och 'ix ya'malc servil winac, yujto tox xjuw 'el 'ix yuj winac.

A tas 'aj 'ay yaln eb' b'ab'l 'unn yico'

¹⁵ Q'uinloc 'ay junc winc chawn̈ yistzil, palta jun wal 'ix tzchamc'ojlej winac, ax junc xo 'ix ma'ay. Toto tz'alj yune eb' 'ix schawn̈il, ax tz'aji a 'ix matz chamc'ojlej win cha, a 'ix tzb'ab'l 'alj yico',

¹⁶ a yic tzc'och stiempoal spojn 'ec' win tas 'ay 'a 'a, yic tzya'n 'a eb' yunnal cha, matz tac' ya'n win smacl yic b'ab'l 'unnab'ilal 'a win yune 'ix caw tzchamc'ojlej win cha, yujto a jun tzb'o cha, caw man̈ wach'oc. A win yune 'ix chacb'il 'el cha, caw yel a win b'ab'l 'unn yaji.

¹⁷ Yuj cha, yowlal tzchaj win mamb'il chi jun yunnal chi sb'ab'l 'unnaloc, cha'ejm tzyutj win ya'n smacl jun yunnal chi 'a tas 'ay 'a 'a, yujto caw sb'ab'l 'unnal yaji; 'ay yaln win yic schan smasnil smacl yic sb'ab'l 'unnab'ilal cha.

Yailal tz'ajx 'a eb'*r* 'unnab'il maysch'olnil snab'en

¹⁸ Q'uinloc 'ay junc mach 'ay junc yunnal maysch'olnil snab'en, caw tu tas tzb'o'o. Matz chaj yab' tas tzyal smam snun, wach'xam tzmac' eb', palta man̈ yujoc cha, tzyiclj tas tzyal eb' cha.

¹⁹ Toto 'ixta tzyutj sb'a win 'unnab'il cha, ax eb' mamb'il cha, tzyij 'at eb' jun yunnal chi 'a sdespacho eb' yichmtac wincal chon̈ab'.

²⁰ Tzyaln cab' eb' 'ixtic: A jun cunnal tic on̈, caw maysch'olnil snab'en, caw tu tas tzb'o'o, matz on̈ syiclj xon jac on̈, caw juwnacx 'el snab'en, 'u'm 'an̈ paxi, xchi eb'.

²¹ Ax smasnil eb' winc 'a jun chon̈b' cha, tzjul cham eb' jun 'anma chi yet' q'uen q'ue'en. 'Ixta 'oj eyutc e satn 'el jun maysch'olnil chi 'ayc' 'a yol e chon̈ab'. A yic 'oj yab'nc eb' 'anma jun 'ab'x cha, 'oj xiw chan̈ eb'.

Jun tzo'n̈ xo ley

²² Toto 'ay junc winc tz'ajx 'och 'a yol sc'ab' chamel, tzt'un̈xq'ue 'a spenc te', yujto tz'och junc sniwquil mul,

²³ a sniwnal jun 'anma cha, matz tac' scan junc 'ac'wl 'a 'aj 'ayc' cha. Yowlal tzmucx 'a jun c'u cha, sec matz eyixtj 'el lum lum 'oj yac' Jehová eyico'oc, yujto a junc 'anma tzq'ue t'un̈n 'a spenc te', tzcatb'tzax can yuj Dios.