Dt 20 - Chuj San Sebastian Bible

A yoclemal tas tz'aj yoch owal

¹ A yic tzex 'el eyac' owl yet' junc chon̈b' 'ajc'ojl yajch 'ayex, toto 'ec'b'al sb'isl soldado eb' chi 'a yib'n̈ eb' eyic ax tic, til wal schej eb', til wal scaruaje eb' yic owal, palta man̈ ex xiw xon yuj eb', yujto a Jehová qui Diosalec a 'aych eyet'oc, atn jun on̈ 'i'nec 'elt 'a Egipto.

² Ax yic tzc'och yorail yoch owl cha, ax win ya'mal 'och sti eb' 'anma 'a Dios, a win 'oj jucb'tzanc eb' e soldado cha,

³ ax yaln win 'ixtic: Ex wit chon̈ab', 'ab'tec tas 'oj wala': A ticnec 'oj ca'c owl yet' eb' 'ajc'ojl yajch 'ayn̈ec, may cab' qui chab'c'ojlalec, man̈ on̈ xiwec, man̈ on̈ 'ib'xoc cha'an̈, man̈ qui xib'tquec qui b'a,

⁴ yujto a Jehová qui Diosalec a 'aych quet'ec. A 'oj 'a'nc owl yet' eb' 'ajc'ojl cha, a 'oj 'a'nc ca'c ganar, xchi cab' winac.

⁵ Ax eb' syajlil eb' soldado cha, 'oj yal eb' 'ixtic: Toto 'ay junc ex 'a qui calc tic tot xe b'o junc eyatut, mantzac e caj xon jab'oc, tztac' e pax 'a eyatut cha. Toto ma'ay, ch'olb'j tzex cham 'a owal, ax 'oj 'ajoc chucx mach 'oj cajnc eyatut cha.

⁶ Toto 'ay junc ex tot xeyawj eyuva 'a sat e lu'um, mantzac eyac' tzaljoc e c'ojl yet' e munljel cha, tztac' e pax 'a eyatut. Toto ma'ay ch'olb'j tzex cham 'a owal, ax 'oj 'ajoc, chucx mach 'oj molnoc chan̈ sat eyuva cha.

⁷ Toto 'ay junc ex 'ayx e trato to tzex nupni, tztac' tzex pax 'a eyatut sec tzex nupni. Toto ma'ay ch'olb'j tzex cham 'a owal, ax tz'aji chucx mach tznupn yet' 'ix 'ix cha, xchi cab' eb'.

⁸ Tzlajw cha, tzyaln pax eb' syajlil eb' soldado chi 'ixtic: Toto 'ay junc ex caw tzex xiwi, mto matz techj eyuj tzeyab'i, tztac' tzex pax 'a eyatut, yic wach' ma'oj somchjoc chan̈ eb' quit soldadoil tic eyu'uj, xchi cab' eb'.

⁹ Ax yic tzlajw yaln ewin syajlil eb' chi jun tzo'n̈ cha, tz'ajx yopiso junjn eb' tz'i'n b'ey junjn b'uln eb' soldado cha.

¹⁰ A yic tzex c'och 'a sla'nil junc chon̈b' 'aj 'oj eyac' owl cha, b'ab'el, yowlal tze ya't junc e checab' yic tzc'anb'n 'ixtic: ¿Tzam e nib'j junc'ojlal, mto owal? xchi cab' 'a eb' 'anma cha.

¹¹ Toto tzyal sc'ojl eb' 'anma 'a junc chon̈b' chi tz'och 'a junc'ojlal eyet'oc, tzex schan 'och eb' 'a yol schon̈b' cha, to 'ixta', yowlal tz'och eb' eya'malc servil.

¹² Palta toto matz yal sc'ojl eb' tz'och eyet' 'a junc'ojlal, a owl tznib'j eb', to 'ixta', tzeyoy spatquil schon̈b' eb' cha, tzeya'n owl yet' eb'.

¹³ Ax Jehová qui Diosalec, a 'oj 'a'nc eb' 'a yol e c'ab', ax e tzu'n cham eb' winc smasnil.

¹⁴ Ax eb' 'ix 'ix, eb' 'unin, smasnil scajb'en noc' eb', yet' pax smasnil tas 'ay 'a yol schon̈b' eb' cha, eyic tz'aj smasnil; tztac' tze c'ux tas 'ay 'a eb', tzeyac' tzaljoc e c'ojl yet' jantcn̈ej tas tzyal sc'ojl Jehová Dios tzeyijcan 'ec' 'a eb' 'ajc'ojl cha.

¹⁵ 'Ixta tzeyutj smasnil chon̈b' to najt yajl 'a stz'ey 'aj 'oj e c'och cajn cha.

¹⁶ Palta a jun tzo'n̈ chon̈b' 'oj yac' Jehová qui Diosalec eyico'oc, c'uxn tze mil eb' 'anma chi smasnil, man̈x 'a junc tzeyactj cani.

¹⁷ Tze satl eb' hitita, eb' amorreo, eb' cananeo, eb' ferezeo, eb' aveo yet' eb' jebuseo. 'Oj cham eb' 'icha wal xyutj Jehová yalni,

¹⁸ sec ma'oj ex scuy eb' e b'on jun tzo'n̈ tas yajb'entac tzlaj sb'o', yic tzya'n 'ejm sb'a 'a jun tzo'n̈ scomn diosal eb'. Tze satl eb' sec matz 'och e mul 'a Jehová Dios yuj eb'.

¹⁹ A yic niwn tiempo tzex 'och oyn 'a junc cha, man̈ e comn ch'acc 'ejm yawb'ente eb', yujto 'ay 'oj 'och sat te eyu'uj; mun 'ay eb' te 'a 'aj 'ay, matz yac' eb' te owl eyet'oc.

²⁰ Palta a pax eb' te comn te matz lox sat, tztac' e ch'acn 'ejm eb' te', yic tze c'anlb'an eb' te e te'nub'oc 'a jun chon̈b' 'aj wan eyoch cha yic tzeya'n owal, masnto tz'ejm jun chon̈b' chi eyu'uj.