Dt 2 - Chuj San Sebastian Bible

A tas ujnac 'a cusltac lu'um

¹ Xlajw cha, on̈ cotc pax 'a lum cusltac lum cha, on̈ 'ochc 'a sb'el a Chac Mar, 'icha wal xyutj Jehová yaln 'ayin. Caw niwn tiempo on̈ oyyec' qui b'eyc 'ec' 'a lum switzl Edom.

² Caw niwn xo tiempo 'ix 'eq'ui, 'ix yaln Jehová 'ayn 'ixtic:

³ Caw wal niwn xo tiempo tzex oyyec' 'a jun tzo'n̈ lum witz tic. A ticnec b'i'an, 'ixquec 'a stojlal norte.

⁴ Al yab' eb' et chon̈b' jun checnb'il tic. To ata 'oj eyec' 'a yol slugar eb' yin̈tl can Esaú, atn eb' eyican to e b'a yet'oc, eb' cajn 'a yol smacb'en Seír. Caw wal 'ay xiwc'ojlal eb' 'ayex. Palta b'i'an, caw tze tan̈wj e b'a, man̈ e comn xib'tc eb'.

⁵ Man̈ e comn milc cham eb', yujto a lum slum eb' cha, may xon jac lum 'oj wac' eyico'oc. A eb' lum jolmctac witz 'ay 'a yol yic Seír, yic eb' yin̈tl Esaú yaj lu'um. An 'ix wac' lum 'a eb'.

⁶ Tze c'an e man tas tze c'ux 'a eb', tze tojn eyal tzeyu'j 'a eb', xchi Dios.

⁷ A Jehová qui Diosalec, a 'ix 'a'n swach'c'ojlal 'a yib'n̈ smasnil tas xqui b'o'ec. A 'a yol chawinc ab'il tic, caw wal tan̈b'iln̈ec yu'uj. A yic on̈ b'eyc cot 'a lum cusltac lu'um, may tas 'ix yac' palta 'ayn̈ec.

⁸ Xlajw cha, on̈ 'elc can 'a sb'el span̈nil sti a Jordán, on̈ 'e'c 'a Elat yet' 'a Esión-guéber. Xlajw cha, on̈ 'e'tec 'a yol slugar eb' quicanec, atn eb' yin̈tl Esaú, eb' cajn 'a lum yic Seír. Ata xcoyc qui b'a, on̈ 'ochc pax 'a b'e tz'ec' 'a cusltac lum yic Moab.

⁹ Yuj cha, xyaln Jehová 'ayn 'ixtic: Man̈ e tzuntzc eb' moabita yujto yin̈tl can Lot eb', may xon jac slum eb' 'oj wac' 'ayex. To an xwac' smasnil lum Ar 'a eb'.

¹⁰ (A jun lum tic, cajb'il lum yuj eb' 'anma 'a pecti', atn eb' tzcuch emita. Caw niwc wincn̈ej eb', caw niwn pax sb'isl eb', niwc pax stel eb', lajn eb' 'icha eb' yin̈tl win Anac.

¹¹ Wal yel a eb' 'anma 'a jun lugar cha, niwcn̈ej stel eb', caw 'ay smay eb', yuj cha emita sb'i eb' yuj eb' moabita.

¹² A lum Seír cha, cajb'il lum 'a pecti yuj eb' horeo, palta a eb' yin̈tl Esaú a eb' satjnac 'el eb' 'anma chi 'a jun lugar cha. 'Ixta 'ajnc eb' yoch 'a sat lu'um, 'ixta pax 'oj cajc coch 'a lum lum chi tzyac' Jehová 'ayn̈ec.)

¹³ Ax ticnec, 'ix yal Jehová to tzon̈ 'atc paxi, yic tzon̈ 'e'c 'a yojl a a tzcuch Zéred, xin chi 'ayex. Yuj cha, on̈ 'e'tec 'a yojl a a cha.

¹⁴ Yictax on̈ cotc 'a lum Cades-barnea masnto on̈ 'e'tec 'a yojl a Zéred, ata xtz'acw 38 ab'il qui cotec. A 'a yic jun tiempoal cha, lajwnacx scham eb' winc to smoj yoch soldadoil yic queltec 'a Egipto, ata x'el'ch jun sti Jehová ya'jnac.

¹⁵ Yujto a yowl sc'ojl Jehová xjaw 'a yib'n̈ eb', yuj cha, 'ix cham eb' smasnil.

¹⁶ A yic tox 'ix cham smasnil eb' soldado cha,

¹⁷ a yic cha, 'ix yal Jehová 'ayn 'ixtic:

¹⁸ Wal 'a jun c'u tic, tzex 'e'cn 'a yol smacb'en Moab, axta tzex c'och 'a lum Ar.

¹⁹ Palta a yic tze chan e b'a yet' eb' amonita, man̈ e tzuntzc eb', yujto yin̈tl pax Lot eb'. May xon jac slum eb' 'oj wac' 'ayex, to an wa'jnac lum yico'oc eb', xchi.

²⁰ (An̈jtona jun lum cha, yic pax eb' 'anma niwc stel chi lum 'a pecti', yujto 'e'nc cajn eb' ta', atn eb' chi zamzumita sb'i yuj eb' amonita 'a pecti'.

²¹ A eb' 'anma cha, caw niwn sb'isl eb' 'a yol schon̈ab', caw niwc pax stel eb'. Lajn eb' 'icha eb' yin̈tl Anac. Palta a Jehová, a satn 'el eb' yuj eb' amonita. A yic xlajw 'el eb' 'a sat lu'um, ax eb' amonita chi xcajn lu'um.

²² A jun tic, lajn 'icha 'ajnc yoch eb' yin̈tl Esaú 'a lum Seír. A Jehová satn 'el eb' horeo, sec ax eb' yin̈tl Esaú tzcajn lu'um.

²³ An̈jtona', 'ixta 'ajnc eb' aveo cajn 'a jun tzo'n̈ lugar 'a stz'ey Gaza. Lajwnac 'el eb' yuj eb' filisteo cotnc 'a Caftor. 'Ixta 'ajnc eb' yochcn 'a sat lu'um.)

²⁴ 'Ix yaln Jehová 'ixtc 'ayin: 'Ixquec paxi, c'axwan̈c 'ec' 'a sch'olnil sti a Arnón. Atn wal ta 'oj wac' win Sihón win amorreo 'a yol e c'ab', atn win sreyl chon̈b' Hesbón. 'Ochn̈ec 'a yol slugar win cha, tzeya'n owl yet'oc, tzeyi'n can 'ec' slum win cha.

²⁵ Wal 'a jun c'u tic, tz'el yich wa'n xiwc'ojlal 'a smasnil eb' chon̈b' 'ay 'a sat lum lum tic. A yic 'oj laj yab'nc eb' yalx eyab'xil, caw wal 'oj xiw chan̈ eb'. 'Oj laj 'ib'xoc chan̈ eb' yuj xiwlal. Caw 'ayxn̈ej xiwc'ojlal eb', xchi Dios, xchi Moisés.

'Emnc win rey Sihón

²⁶ 'Ix yaln pax Moisés 'ixtic: A yic 'ayn̈ec 'ec' 'a lum cusltac lum Cademot, ata xin chec cot jaywn̈ eb' in checb' 'a win Sihón, atn win sreyl chon̈b' Hesbón, sec tzin 'och 'a junc'ojlal yet'oc. 'Ix waln cot 'a 'ixtic:

²⁷ 'Ix in na'a, to a 'a sat lum a lum tic tzin 'ec' yet' eb' 'anma tic, a 'a niwn b'e 'oj in b'ey yet' eb', may junc xo b'e 'aj 'oj qui comn 'ati.

²⁸ 'Oj qui toj smasnil tas 'oj qui man qui c'ux 'ayex, ax qui tojn pax a a 'oj cuc' on̈, cojn toto tzon̈ a chaj 'ec' 'a sat a lum cha,

²⁹ 'icha on̈ yutj eb' yin̈tl Esaú on̈ schan 'e't 'a sat slu'um, atn eb' cajn 'a lum Seír, yet' eb' moabita cajn 'a lum Ar. 'Ixtan̈ej 'oj caj qui b'ey'ti, masnto 'oj que'cn 'a yojl a Jordán, ax qui c'och 'a lum lum tzyac' Jehová qui Diosal quico'oc on̈, xin chi 'a 'a.

³⁰ Palta ax win rey Sihón cha, ma'ix yal sc'ojl win on̈ 'e'tec 'a sat slum cha, yujto a Jehová qui Diosalec, a x'a'n sna winac, to matz on̈ schajec 'e'ta, sec wach' tzcan win 'a yol qui c'ab'ec, 'icha ton wal wan yuj tic.

³¹ Yuj cha, xyaln Jehová 'ayn 'ixtic: Wal 'a jun rato tic, tzwa'n win Sihón 'a yol e c'ab' yet' snacion̈. 'Ochn̈ec 'a yol slugar, tzlajw cha, tze cajn lu'um, xchi 'ayin.

³² 'Ix 'el Sihón on̈ scha yet' smasnil eb' soldado, yic tzya'n owl quet'ec 'a Jahas.

³³ Ax Jehová qui Diosalec, a 'ix 'a'n win 'a yol qui c'ab'ec, sec tzqui satc 'el win yet' eb' yunnal yet' pax smasnil eb' schon̈ab'.

³⁴ Smasnil lum chon̈b' 'ay 'a yol slugar win cha, 'ix laj can lum 'a yol qui c'ab'ec yuj qui satnec 'eli. 'Ix laj qui milnec eb' winac, eb' 'ix 'ix yet' eb' 'unin; man̈x 'a eb' xcan 'a spitznal cujec.

³⁵ A tas 'ix quique'ejec, atn smasnil scajb'en noc' eb', yet' smasnil tas 'ay 'a jun tzo'n̈ chon̈b' 'ix laj qui satc 'el cha.

³⁶ 'Ix 'el yich qui satnec 'el eb' 'a lum chon̈b' Aroer, lum 'ay 'a span̈nil sti a Arnón, masnto on̈ jawc 'a Galaad. May xon junc eb' chon̈b' chi stac' scoln sb'a 'ayn̈ec; yujto a Jehová qui Diosalec, a 'ix 'a'n eb' 'a yol qui c'ab'ec.

³⁷ 'Ay jaye xo chon̈b' ma'ix qui satc 'eli, atn eb' lum tic: lum schon̈b' eb' amonita, smasnil pax lum chon̈b' 'ay 'a sti a niwquil a Jaboc, eb' lum chon̈b' 'ay 'a lum jolmctac witz, yet' smasnil jun tzo'n̈ xo lugar 'ix yal Jehová to matz qui satc 'eli, cojxn eb' xcan cujec.