Dt 18 - Chuj San Sebastian Bible

A smacl eb' yin̈tl Leví

¹ 'Ix yaln pax Moisés 'ixtic: A eb' ya'mal 'och sti eb' 'anma 'a Dios yet' smasnil eb' yin̈tl Leví, may yaln eb' yic 'a tas 'oj scha eb' quit israelal smacloc. Yujto a tas tz'ajx xajmb'al-l 'a Jehová, a chi yic eb' yaji, a 'oj 'i'nc 'ec' tiempo 'a eb'.

² May tas 'oj scha eb' 'icha jun tzo'n̈ xo eb' quit chon̈b' cha, yujto a tas yic Jehová, a chi smacl eb' yaji, 'icha yutjnac can yalni.

³ A eb' ya'mal 'och sti eb' 'anma', a tas smacl eb' yaji a chi tz'ijx can 'el 'a no wacax, yet' 'a no calnelu tz'ajx yuj eb' 'anma xajmb'alil. A jun tzo'n̈ tz'elcn cha, atn tic: no squelab', no yaln̈ sti', yet' no stzucutz.

⁴ An̈jtona', yic pax eb' tz'aj ofrenda yic sb'ab'l sat 'ixm trigo, yal uva, aceite, yet' pax sb'ab'l slanail no calnelu tzjoxx 'eli.

⁵ Yujto a Jehová qui Diosalec, a si'n can 'el eb' yin̈tl Leví 'a scal smasnil jun tzo'n̈ xo eb' quit chon̈b'ec, sec an̈j eb' tz'a'n servil Jehová 'a smasnil tiempo.

⁶ Toto 'ay junc win yin̈tl Leví 'ayc' 'a junc chon̈b' 'ay 'a yol smacb'en eb' quit israelal, tznalb'ej sc'och 'a jun lugar to sic'b'il 'el yuj Jehová,

⁷ tztac' yoch 'a'j servil 'a Jehová Dios, 'icha tzyutj munljoc sb'a eb' yit levitail 'a yojltac Dios.

⁸ Tzchan pax tas tzc'ux 'icha yechl tas tz'ajx 'a eb' 'ayc' xon cha, yet' pax smacl tzchaj 'a smam.

Tennb'il yuj sb'eyb'al eb' chuc chon̈b'al

⁹ A yic 'oj e c'och 'a lum lum 'oj yac' Jehová qui Diosalec eyico'oc, man̈ e b'eylb'oc sb'eyb'al eb' 'anma 'ayc' 'a jun tzo'n̈ chon̈b' cha.

¹⁰ May cab' junc mach 'a e cal tzyac' tz'a junc yunnal mto yisil xajmb'alil. May cab' junc mach tzcuy sb'a snan 'el paxti', tzyaln yuj tas tot 'oj jawoc, mto tzyal tas tzyal 'el'ch junc lab', mto tzcuy 'ajchumal, mto wayjlil,

¹¹ mto b'almil. May cab' junc mach tzc'anb'j sb'a 'a eb' tznan 'el paxti', yet' pax 'a eb' tzyal to tzc'umj spixn eb' chamnac.

¹² Yujto a eb' tzb'on jun tzo'n̈ tic, caw yajb'il 'el eb' yuj Jehová. Yuj wal to tzb'o eb' nacion̈ jun tzo'n̈ cha, yuj cha, a Jehová qui Diosalec, 'oj 'i'nc 'el eb' 'a eyojltac.

¹³ Ax xo tic, yowlal caw wach' tzeyutj e nab'en 'a yojltac Jehová.

¹⁴ A wal eb' 'anma 'a jun tzo'n̈ nacion̈ 'a 'aj 'oj e c'och cajn cha, caw wal tzchaj eb' yab' tas tzyal eb' tznan 'el paxti', mto eb' tzaln yuj tas tot 'oj jawoc; palta ax xo tic, caw matz yal sc'ojl Jehová qui Diosalec to tze b'o jun tzo'n̈ cha.

Junx schecb' Dios 'oj checljoc cha'an̈

¹⁵ A Jehová qui Diosalec, 'oj sic' 'elt 'a e cal junc xo schecb' 'icha 'in tic; a jun cha, yowlal 'oj eyiclc tas 'oj yala'.

¹⁶ Atn ton wal jun chi c'anb'il eyuj 'a Jehová Dios, yic yamn on̈c qui masnil 'a yich witz Sinaí yic eyaln 'ixtic: Man̈xtzac qui nib'j cab' sjaj Jehová Dios jun 'ejm xo, man̈xtzac qui nib'j pax quil jun niwquil c'ac' cha, sec ma'oj qui chami, xe chi.

¹⁷ Yuj cha, 'ix yaln Jehová 'ixtc 'ayin: Wach' tas 'ix yal eb'.

¹⁸ 'Oj in sic' 'elt junc xo in checb' 'a scal eb' 'icha ach tic, junc mach to yit chon̈b' eb', sec a tas 'oj wal 'a 'a, a chi 'oj yalx 'a eb'.

¹⁹ A mach to ma'oj scha yab' tas 'oj yal jun in checb' cha, to a tzpaxtin in jeloc, 'oj wac' yowlal 'a 'a.

Eb' tzyalch sb'a schecb'oc Dios

²⁰ Toto 'ay junc cob' tzyalch sb'a in checb'oc, ax yaln tas to man̈oc in tzwal 'a 'a, mto tzyal 'a sb'i jun tzo'n̈ comn dios, a jun cha, yowlal tze mil chamoc.

²¹ Palta toto ax tic 'oj e na 'ixtic: ¿Tas wal 'oj cutc cojcan 'eli, toto man̈oc Jehová tzaln jun tzyal tic? xe chi.

²² Toto a jun checb' cha, wan yaln jun tzo'n̈ paxti chi 'a in b'i an Jehová in, q'uinloc matz 'el'ch paxi, atn jun chi tzch'oxn 'eli to man̈oc in tzwala, mun tzb'an̈ sb'a yaln sch'ocoj. A jun cha, man̈ ex xiw 'a 'a, xchi Dios, xchi Moisés.