Dt 16 - Chuj San Sebastian Bible

Q'uin̈ 'a junjn ab'il

¹ 'Ix yaln pax Moisés 'ixtic: A yic tzjaw jun 'uj tzcuch Abib 'a junjn ab'il, ata tze na q'uin̈ yic quelc 'a libre 'a Egipto, yuj eyi'n chan̈ sb'i Jehová qui Diosalec, yujto a 'a jun 'uj cha, ata 'ay jun 'ac'wl 'aj on̈ yijec 'elt Jehová Dios 'a Egipto cha.

² A 'a yic tze nan jun q'uin̈ cha, ata tzeyac' no wacax, mto no calnelu xajmb'al-l 'a Jehová Dios, atn 'a jun lugar 'oj si'l yico'oc, ata tzex 'och 'emmquilal 'a 'a.

³ A no noc' tzeyac' e xajmb'alc cha, tze chi no', tze wan pax 'ixm pan may yich. Uque c'u tze waj 'ixm pan cha, sec a 'ixm tz'och snanb'ilc cot yailal, yujto caw ji'ltixn̈ej on̈ 'eltec 'a Egipto. Ya' sb'a pitzn ex, 'a junjn ab'il yowlal tze na cot jun c'u yic queltec cha.

⁴ A 'a uque c'u cha, man̈x 'a cab' yich pan tz'ilchj 'a e cal 'a yol e chon̈b' cha. An̈jtona pax no chib'j tzeyac' xajmb'al-l cha, man̈x 'a cab' no tzcan eyuj 'a jun b'ab'l c'u cha, sec man̈x 'a no tzcan yico'oc junc xo c'u.

⁵ A no e xajmb'al yic jun q'uin̈ cha, matz tac' e comn miln no 'a tzann̈j chon̈b'al tzyac' Jehová Dios 'ayex.

⁶ Palta cojn 'a jun lugar 'oj si'l Dios yico'oc cha, ata tze mil cham no xajmb'al cha. A 'a yic wan xo smucnsb'a c'u, ata tze mil cham no', yujto 'icha jun hora cha, 'ixta on̈ 'eltec 'a Egipto.

⁷ A no chib'j cha, ton̈j tze b'ol no', tze chin no 'a jun lugar 'oj si'l Jehová qui Diosalec yico'oc, ax yic tzsacb' 'a junx c'u, tzex pax 'a 'aj 'ay e posada.

⁸ Waque c'u tze waj 'ixm pan may yich, ax 'a yucl c'ual, tzeyamn e b'a e masnil yic tzex 'och 'emmquilal, tzeyi'n chan̈ sb'i Jehová Dios. A 'a jun c'u cha, may mach tzmunlji.

A jun tzo'n̈ xo q'uin̈

⁹ A yic tz'el yich e poln e trigo, ata tzeyij 'el yich e b'isn uque seman.

¹⁰ A yic tzlajw jun yucl seman cha, ata tz'el yich e nan jun q'uin̈ yic tzlajw e poln chan̈ e trigo. Ata tzeyac' eyofrenda to tz'el wal 'a e c'ojl eya'ni, a tzyal jantc syaxilal Jehová qui Diosalec tzyac' 'a eyib'an̈.

¹¹ Tze nan jun q'uin̈ chi 'a yojltac Jehová Dios, 'a jun lugar 'oj si'l yico'oc cha. Tze mol naj jun q'uin̈ chi yet' eb' eyunnal, eb' eyisil, ewin e moso, eb' 'ix eya'mal servil, eb' levita, eb' chuc chon̈b'al, eb' meb'a 'unn chamnc xo smam, yet' eb' 'ix 'ix chamnc yichmil cajn 'a yol e chon̈b' cha.

¹² Nac coti chajtlto 'e'nc on̈c mosoal 'a eb' 'aj Egipto. Yuj cha, yowlal tze b'eylb'ej pax jun tzo'n̈ ley tic.

Q'uin̈ Chinama

¹³ A yic tzlajw e poln chan̈ smasnil e trigo cha, yic tzlajw e pitz'n can 'el eyal uva, a pax ta tze na uque c'u q'uin̈ Chinama.

¹⁴ A 'a jun q'uin̈ cha, ata tzeyac' tzaljoc e c'ojl yet' eb' eyunnal, eb' eyisil, ewin e moso, eb' 'ix eya'mal servil, eb' levita, eb' chuc chon̈b'al, eb' meb'a 'unn chamnc xo smam, yet' eb' 'ix 'ix chamnc yichmil cajn 'a yol e chon̈b' cha.

¹⁵ A jun q'uin̈ cha, uque c'u tze na'a, yuj eyi'n chan̈ sb'i Jehová qui Diosalec. Ata tzeyam e b'a 'a jun lugar 'oj si'l Jehová yico'oc cha, yujto 'oj yac' syaxilal 'a yib'n̈ smasnil tas tze mol cha'an̈, yet' 'a yib'n̈ e munljel, caw wal tzaljc'ojlal eyico'.

¹⁶ Smasnil eb' winac, yowlal 'ox'ejm tz'och eb' 'a yojltac Jehová Dios 'a junjn ab'il, atn 'a jun lugar 'oj si'l yico'oc cha. A jun tzo'n̈ q'uin̈ 'aj 'oj 'och eb' cha, atn tic: Q'uin̈ yic 'ixm pan may yich, q'uin̈ yic tzlajw spolx trigo, yet' q'uin̈ Chinama. May cab' junc mach tzsat sc'ojl yi'n 'at yofrenda 'a yojltac Jehová.

¹⁷ Junjn mach tzyij 'at yofrenda, a tzyal tas 'ay 'a yol sc'ab' yuj Jehová qui Diosalec.

Ley yic b'eyc'ojlal

¹⁸ Tzeya'ch eb' juez yet' eb' yajl 'a junjn chon̈b' 'oj yac' Jehová Dios 'a junjn 'in̈tal, sec a eb' tzb'onyaj eb' 'anma 'a stojlal.

¹⁹ Man̈ ya'ch sb'a eb' 'a man̈ nab'enal, man̈ chucchcoc cab' yilx eb' 'anma 'a sat eb'. Matz chaj eb' q'uen c'ultac tumn 'a junc mach, yujto a jun tumn chi tzjun 'el snab'en eb' 'ay snab'en cha, a pax q'uen tumn chi tzjeln 'el spaxti eb' 'anma tojl snab'en.

²⁰ Tojl cab'n̈ej tzyutj eb' sb'onyaj junc mach. Atn chi 'oj e b'o', sec tzaljc'ojlal 'oj e can cajn 'a sat lum lum 'oj yac' Jehová eyico'oc cha.

Eb' tzyal sb'a 'a comn dios

²¹ Man̈ e comn 'awc junc te te', yic tz'och sch'oxnb'ilc jun comn dios tzcuch Asherá. Man̈ e comn 'awc te 'a stz'ey yet'l xajmb'al yic Jehová qui Diosalec.

²² Man̈ e b'o chan̈ q'uen q'uen 'aj tzyac' 'ejm sb'a eb' 'anma'. A jun tzo'n̈ cha, yajb'il 'el yuj Jehová Dios.