Dt 13 - Chuj San Sebastian Bible

¹ 'Ix yaln pax Moisés 'ixtic: Tzeyil e b'a toq'ue 'ay junc mach tzq'ue wan 'a e cal, tzyalni to schecb' Dios, mto waychnum. Toto tzyala to 'ay junc senya mto milagro 'oj checljoc,

² q'uinloc tz'el'ch pax cob' junc tas tzyal cha, tzlajw cha, tzyaln 'ayx 'ixtic: Coyc wet'oc, 'at quilc wal jun tzo'n̈ xo dios mant eyojcoc; 'at ca'c 'ejm qui b'a 'a 'a, toto xchi,

³ man̈ e cha eyab' jun tzo'n̈ chi 'a 'a. A Jehová qui Diosalec, a tzex 'a'n prowal, sec tzyila toto yel tze chamc'ojlej yet' smasnil e c'ojol, yet' smasnil e nab'en.

⁴ Tza'nex cab'n̈ej yuj qui Diosalec, 'ijec chan̈ sb'i; yicljec smasnil schecnb'il, chajec eyab' tas tzyala, 'ochn̈ec 'emmquilal 'a 'a, sec junxn̈ej tzex can yet'oc.

⁵ Ax jun tzyalch sb'a schecb'oc Dios, mto waychnum cha, yowlal tzmilx chamoc, yujto a tz'a'n e c'ojloc yic tzeyi'n 'el e nab'en 'a Jehová qui Diosalec, atn jun on̈ 'i'nec 'elt 'a Egipto 'a 'aj 'ayn̈ec 'och mosoal. A jun 'anma cha, tzmilx chamoc, sec tzsatl jun maysch'olnil chi 'a e cal, yujto tznib'j tzex yij 'el 'a sb'eyb'al Jehová 'ix yalcn 'ayex.

^6-8 Q'uinloc 'ay junc mach tzex c'ultac 'i'n 'at eyac' 'ejm e b'a a jun tzo'n̈ tzalx 'och diosal, atn sdiosal eb' chon̈b' oyn 'och 'a sla'nil, mto 'a snajtil 'el sti lum e lum cha, atn jun tzo'n̈ man̈ yojcoc eb' qui mam qui nun 'a pecti', man̈ e cha eyab' 'a 'a. Wach'xam a junc eyu'tac, junc eyunnal, junc eyisil, mto eyistzil chamc'ojlb'il eyu'uj, mto junc e wach'c'ojl caw wach' eyaj yet'oc, man̈ 'o'ch e c'ojl 'a 'a, man̈ junn̈joc tzeyutj e nab'en yet'oc, man̈ e c'ub'c 'eli.

⁹ A tzeyutej, to tze mil chamoc. Ax tze b'ab'l si'j chan̈ q'uen q'ue'en, tze juln chamoc, tzlajw cha, tzya'n eb' chon̈b' yic smasnil.

¹⁰ A jun 'ixta snab'en cha, julc cham yet' q'uen q'ue'en, yujto tznib'j tzex yij 'el 'a stz'ey Jehová qui Diosalec, atn jun on̈ 'i'nec 'elt 'a Egipto 'a 'aj 'ayn̈ec 'och mosoal.

¹¹ 'Ixta wal 'oj yutc eb' quit chon̈b' tic yojcan 'el jun cha, ax xiw eb' sb'on jun tzo'n̈ tic, sec man̈ comnoc tzya'ch eb' smul 'icha jun cha.

¹² Toto tz'ab'x speclal to 'ay tas tzpitzw chan̈ 'a scal jun chon̈b' chi tzyac' Jehová qui Diosalec e caj cha,

¹³ toto ata tzyij chan̈ sb'a eb' tenmtac 'a Dios, tzjucb'tzan eb' 'anma chi 'a maysch'olnil yic tzya'n 'ejm sb'a eb' 'a jun tzo'n̈ comn dios man̈ 'ojcab'iloc,

¹⁴ ax xo tic, tzcham wal e c'anb'n eyab'i'. Toto yel jun tzo'n̈ paxti cha, to 'ay eb' wan sb'eylb'an jun tzo'n̈ maysch'olnil chi 'a e cal,

¹⁵ to 'ixta', smasnil eb' 'anma 'a jun chon̈b' cha, tze tzu'cn cham eb' yet' scajb'en noc', tze satn can 'el smasnil tas 'ay 'a jun chon̈b' cha.

¹⁶ Tze molb'tzej smasnil tas 'ay 'a eb', tzeyi'n 'at 'a plas 'a yol chon̈b' cha. Tzlajw cha, tzeya'n 'och sc'a'l jun chon̈b' chi yet' smasnil jun tzo'n̈ tzeyij 'ec' 'a eb' cha. 'Ixta wal tzeyutj eya'n tz'a 'a yojltac Jehová qui Diosalec. A jun chon̈b' cha, jun 'eln̈ej tzlajw can 'ejmi, man̈x 'a b'a'n̈ tzb'ox sjel.

¹⁷ Ax xo tic, man̈ eyi'cn jac eyic 'a jun tzo'n̈ tz'ajx lajwc cha, sec ma'oj cot yowl Jehová 'a eyib'n̈ yuj jun tzo'n̈ cha. Yujto caw 'ay schamc'ojlal 'ayex, yuj cha, 'oj yac' q'uib' e b'isl 'a yol e chon̈ab', 'icha wal yaj yaln can 'a eb' qui mam quichmec.

¹⁸ Yiclum tzeyutj e b'a 'a Jehová qui Diosalec, wach' cab' tzeyutj e b'eylb'an jun tzo'n̈ checnb'il wan waln can 'ayx tic. A cab' tas tojl tze b'o 'a sat Jehová.