Dt 12 - Chuj San Sebastian Bible

Cojn jun scajnub' Dios

¹ 'Ix yaln pax Moisés 'ixtic: Atn wal jun tzo'n̈ ley yet' cuynb'il tic, to yowlal 'oj e b'eylb'oc 'a smasnil tiempo, yic 'ayx xo 'ec' 'a sat lum lum 'oj yac' Jehová 'ayex, atn jun qui Diosalec yet' eb' qui mam quichmec cha.

² Ma'c poj smasnil yet'l 'aj tzlaj yal sb'a eb' 'anma chi 'oj 'em eyuj cha; tze ma'n juwc smacsej eb' 'ay 'a lum jolmctac witz, 'a tzalctac, yet' pax jun tzo'n̈ xo 'ay 'a yich te niwc te caw pim xi'il.

³ Ma'c poj yet'l xajmb'al eb', tze juln poj q'uen q'uen 'aj tzlaj yal sb'a eb', tze n̈usntz'a te te tzb'o eb' sdiosalc cha. Tze satl smasnil, sec man̈x 'a 'aj 'oj b'inaxc eb' 'a jun tzo'n̈ lugar cha.

⁴ Man̈ 'ichaoc tzyutj sb'a eb' cha, man̈ 'ixta'oc tzeyutj e b'a, yic tzeyaln e b'a 'a Jehová qui Diosalec.

⁵ A 'a scal eb' eyin̈tl ax tic, ata 'oj si'l Jehová jun lugar 'aj 'oj b'inaxc sb'i, atn 'a jun lugar chi 'aj smoj 'at eya'nc 'ejm e b'a.

⁶ A 'a jun lugar cha, ata 'oj 'at e n̈ustz'a e xajmb'al, atn no noc' caw wach' 'a sat Jehová. Tzeyij 'at e diesmo, e colwal to ta'wb'il eyu'uj, yet' eyofrenda ton̈j tz'el 'a e c'ojl eya'ni. An̈jtona pax no sb'ab'l 'une e wacax yet' e calnelu, yowlal tzeyij 'at 'a jun lugar cha.

⁷ Ata 'oj e mol c'uxc jun tzo'n̈ chi yet' eb' eyunnal 'a yojltac Jehová qui Diosalec, ata tzeyac' tzaljoc e c'ojl e c'uxn tas tzeyij 'a e munljel, yujto a Jehová tz'a'n 'ayex.

⁸ Ata', man̈x 'oj e b'o 'icha tas tzqui b'oc 'a tic. A 'a tic, junjn mach tzb'o tas 'icha tznib'ej.

⁹ Wal yel, mantzac ex c'och 'a jun lugar 'aj man̈x 'a tas 'oj e na', atn jun 'oj yac' Jehová eyico'oc.

¹⁰ A yic 'oj e c'axw can 'ec' 'a yojl a Jordán cha, ax e cajn lum lum 'oj yac' Jehová 'ayex, tzyal 'el'chi to ex colchj 'el 'a yol sc'ab' eb' 'ajc'ojl yajch 'ayex, man̈x 'a e xiwc'ojlal 'a jun lugar cha.

¹¹ A 'a jun lugar 'oj si'l Jehová yico'oc cha, ata 'oj 'at eyac' smasnil jun tzo'n̈ xwal 'ayx tic: no noc' tzeyac' xajmb'alil, yet' no xajmb'al tze n̈ustz'a'oc, e diesmo, eyofrenda to tz'el 'a e c'ojl eya'ni, yet' e colwal to ta'wb'il eyu'uj.

¹² Tzlajw cha, tze nan sq'uin̈l jun tzo'n̈ chi 'a yojltac Jehová qui Diosalec, yet' eb' eyunnal, eb' eyisil, ewin e checab', eb' 'ix e checab', yet' pax eb' levita cajn 'a e cal, yujto a eb' levita cha, may smacl lum eb' 'oj scha eyet' 'a lum lum cha.

¹³ Tzeyil wal e b'a, man̈ e comn n̈usc no noc' xajmb'al-l 'a Jehová, 'a junc lugar 'aj tze nib'ej.

¹⁴ Cojn 'a jun lugar tzsi'l Jehová 'a yol e nacion̈, ata tzeyij 'at jun tzo'n̈ cha. A jun tzo'n̈ tzwalcn 'ayx tic, yowlal tzeyiclj e b'on 'a jun lugar cha.

¹⁵ Palta a yic tze nib'j e chi no chib'ej, tztac' e miln no noc' cha, sec 'ay chib'j tze chi 'aj 'ayx 'ec' cha, a tzyal tas no'l 'ay 'a yol e c'ab' yuj Jehová. Toxn̈ej to wach' eyaj 'icha yaln ley mto ma'ay, tztac' e chin no e masnil, tze chi no 'icha tz'aj schix no c'ultquilchej.

¹⁶ Palta a schic'l no', man̈ e chi', tze secl 'a sat lu'um, 'icha tz'aj secx 'el a a'.

¹⁷ A 'a yol e chon̈b' cha, matz tac' eyi'n can sdiesmoal e trigo, sdiesmoal eyal uva, mto eyaceite, matz tac' e chin sb'ab'l 'une e wacax, mto e calnelu, matz tac' eyi'n can 'el jac eyic 'a tas ta'wb'il eyu'uj, yet' 'a jun tzo'n̈ ton̈j tz'el 'a e c'ojl eya'n 'a Jehová.

¹⁸ Tzeyij 'at jun tzo'n̈ chi 'a jun lugar 'oj si'l Jehová yico'oc, ax 'a yojltac, ata tze mol c'uxj jun tzo'n̈ chi yet' eb' eyunnal, eb' eyisil, ewin e checab', eb' 'ix eya'mal servil, yet' eb' levita cajn 'a e cal. Ata 'oj eyac' tzaljoc e c'ojl 'a yojltac Jehová qui Diosalec yuj tas tzeyij 'a e munljel cha.

¹⁹ Ya' sb'a yic pitzn ex 'a jun lugar cha, man̈ eyac' sat e c'ojl 'a eb' levita 'ayc' eyet'oc.

²⁰ A yic tox xyac' Jehová qui Diosalec lewnb'oc lum e lum cha, 'icha wal yaj yaln cani, toto 'ay 'aj tzcot e nib'n e chin chib'ej, tztac' e chini, yaln̈ej tas c'ual.

²¹ Toto najt cajn ex 'a stz'ey jun lugar 'oj si'l Jehová yico'oc cha, jun 'aj tzex 'och 'emmquilal cha, tztac' e miln e chi no e wacx cha, mto e calnelu chi tzyac' Jehová 'ayex. Tztac' e chin no 'aj 'ayx 'ec' cha, a tzyal jantc no tze nib'j e chi', 'icha wal yaj waln 'ayex.

²² 'Icha tz'aj schix no c'ultquilchej, 'ixta tzeyutj no e chini, tztac' e chin no e masnil, toxn̈ej wach' eyaj 'icha yaln ley, mto ma'ay.

²³ Matz tac' e chin no chib'j chi yet' schiq'uil, yujto a schic'l no', a chi sq'uinl no yaji. Yuj cha, man̈ e chi no chib'j yet' sq'uinal.

²⁴ Ton̈j tze secl schic'l no 'a sat lu'um, 'icha tz'aj secx 'el a a'.

²⁵ Man̈ e c'ux jun tzo'n̈ cha, sec wach' 'oj eyel'ch yet' eb' eyunnal, yujto yiclum tzeyutj e b'a 'a sat Jehová.

²⁶ Palta ax jantcn̈ej tas tzeyac' ofrendail 'a 'a, yet' tas ta'wb'il eyu'uj, tzeyij 'at 'a jun lugar chi 'oj si'l Jehová yico'oc cha.

²⁷ Ax 'a yib'n̈ jun yet'l xajmb'al yic Jehová qui Diosalec, ata tze n̈us e no noc' tzeyac' xajmb'al-l cha. Ax schic'l e no', tze secn 'ejm 'a yich yet'l xajmb'al yic Jehová, ax schib'jal no cha, tztac' e chin no'.

²⁸ Tzcham wal eyab'n jun tzo'n̈ tzwal tic, yowlal tzeyiclj smasnil, sec wach' 'oj eyaj 'el'ch yet' eb' eyunnal b'aq'uin̈, yujto wach' tzeyutj eyiclni tas tojl 'a sat Jehová qui Diosalec.

Tz'ajx snab'enoc eb'*r* sec matz yac' 'ejm sb'a eb' 'a yechel

²⁹ A yic 'oj satnoc 'el Jehová jun tzo'n̈ nacion̈ chi 'a lum lum cha, ax xo 'oj e cajcn slum eb' cha.

³⁰ Tzcham wal eyilni, man̈ ex 'och tza'n yuj sb'eyb'al eb' 'anma cha, man̈ e c'anb'c 'eq'ui tas tzyutj eb' ya'n 'ejm sb'a 'a sdiosal cha, yic wach' 'ixta tzeyutj e b'a jun xo.

³¹ Man̈ 'ichaoc tzyutj sb'a eb' cha, man̈ 'ixta'oc tzeyutj e b'a 'a Jehová, yujto a jun tzo'n̈ cha, yajb'il 'el eb' yuj Jehová Dios. A jun tzo'n̈ yajb'il 'el yuj cha, atn sb'eylb'ej eb' 'anma cha, yic tzyi'n 'ejm sb'a eb' 'a sdiosal. 'Ay wal eb' yel may snab'en, xyac' eb' tz'a yunnal yet' yisl xajmb'al-l 'a sdiosal cha.

³² A smasnil jun tzo'n̈ tzwalcn tic, yowlal tze b'eylb'ej, man̈ eya'ch stz'acub', man̈ eyi'l pax jab'oc 'a 'a, xchi Moisés.