Dt 11 - Chuj San Sebastian Bible

Niwn yel'ch Jehová

¹ Xyaln pax Moisés 'ixtic: Chamc'ojlejec Jehová qui Diosalec, yicljec smasnil tas tzyac' qui b'o'ec, atn sley, scuynb'il yet' schecnb'il 'a smasnil tiempo.

² A ticnec, xcojquejec 'eli tas 'ix sb'o Jehová cujec, yujto man̈oc yet' eb' cunnalec paxtinnac, palta an̈ec wal xquila, xquilc wal sniwquil poder Jehová Dios.

³ Quiljnaquec wal tas sb'ojnac 'a Egipto. Til wal tas sch'oxjnac yil win rey 'a jun nacion̈ cha.

⁴ Quiljnaquec wal tas 'ajnc eb' soldado yic Egipto cha, yic cob' yoch tza'n eb' cujec. Lajwnac 'el schej eb', scaruaje eb' yic owal, 'ix mucchj can 'at eb' 'a yojl a Chac Mar. A Jehová satn 'el eb' smasnil 'a jun 'ejmn̈ej.

⁵ Nac cot wal tas on̈ yutjec 'a lum cusltac lu'um, masnto on̈ jawc yuj 'a jun lugar tic.

⁶ Nac cot pax tas yutjnac Datán yet' Abiram, atn eb' yunnal Eliab, win yin̈tl can Rubén, atn eb' 'aj sjac lum lum sti 'a qui calec. Yic pitznto eb' s'atcn eb' 'a yich lum yet' smasnil yunnal yet' smantiado eb'. C'uxn xlajw 'el eb' yet' smasnil scajb'en noc'. Q'ueln on̈c 'och wal qui masnil, yic xlajw 'el eb'.

⁷ Xquilc wal si'mb'il tas satjub'tac 'ix sb'o Jehová.

Yaxilal xyaltj Dios

⁸ Yuj cha, yicljec smasnil jun tzo'n̈ checnb'il wan waln can 'ayx tic, sec caw te'n tzeyutj e b'a yic tzeyi'n 'ec' lum lum 'oj 'och eyico'oc 'a sc'axpil 'ec' a Jordán cha,

⁹ yic wach' najtl 'oj eyec' 'a sat lu'um, atn lum ya'jnac Jehová sti ya'n 'a eb' qui mam quichmec, yet' 'a yin̈tl eb'. A jun lum cha, caw wal wach' lu'um.

¹⁰ A lum lum 'oj 'ajxoc 'ayx cha, man̈ lajnoc lum yet' lum Egipto 'aj cotnc on̈ec. Ata', tzeyawj tas tzeyawej, palta tzeya'ch yalil 'icha junc hortaliza.

¹¹ Palta ax lum 'aj 'oj e c'och cha, 'ay lum jolmctac witz 'a lu'um, 'ay pax span̈nil, ax n̈ab' tzcot 'a satcha'an̈, a tziclan lu'um.

¹² A jun lum cha, tan̈b'il lum yuj Jehová qui Diosalec 'a smasnil tiempo, q'ueln 'och wal 'a lu'um.

¹³ Toto 'oj eyiclc smasnil jun tzo'n̈ checnb'il wan waln can 'ayx 'a jun c'u tic, tze chamc'ojlan Jehová qui Diosalec 'a smasnil e c'ojol, yet' smasnil e nab'en tzeya'n servil,

¹⁴ toto 'ixta', 'oj ya' cot b'ab'l n̈ab', ax ya'n cot pax schab'l n̈ab' 'a 'icha xon stiempoal, sec wach' tz'aj e trigo, eyal uva yet' eyaceite.

¹⁵ An̈jtona', 'oj yac' q'uib' te c'ultc 'oj slo e cajb'en noc', ax xo tic, caw 'oj yac' sobra tas tze c'uxu.

¹⁶ Palta tzeyil wal e b'a, man̈ e cha 'ixtxoc paxti e b'a. Man̈ eyactc can Jehová. Toto a 'a jun tzo'n̈ comn dios 'aj tzex 'och tzac'an, tzeya'n 'ejm e b'a 'a eb',

¹⁷ toto 'ixta tzeyutj e b'a, 'oj cot yowl sc'ojl Jehová 'a eyib'an̈. Man̈x 'oj ya' cot n̈ab' 'a stiempoal. Ax lum lum cha, man̈x 'oj yac' lum sb'a'al, ax e cham yuj wejel. 'Ixta wal 'oj eyaj 'a sat lum lum caw wach' cha, lum 'oj yac' Jehová eyico'oc cha.

¹⁸ Yuj cha, molc can jun tzo'n̈ paxti tic 'a e nab'en yet' 'a e pixan, tzeya'ch 'a e c'ab' yet' 'a snan̈l e sat.

¹⁹ 'A'c scuy eb' eyunnal jun tzo'n̈ paxti tic 'a yol eyatut, yic tzex b'ey yet' eb', yic tzex waycn 'ejmi yet' 'a yic tzex q'uexwa'an.

²⁰ Tz'ib'jec 'och jun tzo'n̈ paxti tic 'a spiralil eyatut yet' 'a spuertail e chon̈ab'

²¹ yic wach' 'oj najtxb'oc e q'uinl yet' eb' eyunnal 'a sat lum lum 'aj ya'jnac Jehová sti ya'n 'a eb' qui mam quichmec, 'oj e cajn̈j lu'um, ya' sb'a 'ayt 'ec' yolyib'n̈q'uinl tic.

²² Toto 'oj eyiclc smasnil jun tzo'n̈ checnb'il tzwa'cn e cuy tic, 'oj e b'eylb'oc, ax e chamc'ojlan Jehová qui Diosalec, 'oj e cha eyab' smasnil tas 'oj yal 'ayex,

²³ to 'ixta', 'oj yi'l Jehová eb' 'anma cajn 'a jun tzo'n̈ nacion̈ cha, ax xo 'oj e pechl eb' 'a sat lu'um, atn eb' caw jeln cob' cha, niwn pax sb'isl eb' 'a eyib'an̈.

²⁴ Smasnil lum lum 'aj 'oj eyec' cha, eyic 'oj 'ajcn lu'um. A e mon̈jon, tz'el yich 'a lum cusltac lu'um, masnto tzc'och 'a Líbano, tzcotx 'a a niwquil a Éufrates masnto tzc'och 'a Mar Mediterráneo.

²⁵ May xon junc mach 'oj ste'wtzoc sb'a 'a eyojltac. A Jehová qui Diosalec, a 'oj 'a'noc 'och eb' 'anma chi 'a xiwc'ojlal, ax stac chan̈ sc'ojl eb' 'aj 'oj eyec' cha, 'icha wal 'ix yutj yaln cani.

Yaxilal yet' catab'

²⁶ A 'a jun c'u tic, tzwa'cn e si'loc, 'aj 'ay tas tze nib'ej, tom a yaxilal, mto a catab'.

²⁷ 'Oj e cha yaxilal, toto 'oj eyiclc jun tzo'n̈ schecnb'il Jehová qui Diosalec cha, atn jun tzo'n̈ wan waln can 'ayx tic.

²⁸ 'Oj e cha catab', toto tenmtac tzeyutj e b'a 'a schecnb'il Jehová qui Diosalec, matz eyiclej, ax 'a jun tzo'n̈ comn dios man̈ 'ojcab'iloc ata tzex 'och tzac'an.

²⁹ A yic tox ex c'och yuj Jehová qui Diosalec 'a sat lum lum cha, 'oj eyalcn 'el wach' paxti 'a yich lum witz Gerizim, ax 'a yich lum witz Ebal, ata 'oj eyalcn 'el catab'.

³⁰ A jun tzo'n̈ witz cha, ata 'ay eb' 'a sti b'e tz'ec' 'a sc'axpil 'ec' a Jordán, 'a stojlal 'aj tz'em c'u, atn 'a lum slum eb' cananeo cajn 'a span̈nil sti a Jordán cha, 'a yojltac Gilgal, atn 'a 'aj nab'a ma'ach', 'a yol yic Moré.

³¹ Ax tic, jab'xoj wal sc'och stiempoal eye'cn 'a yojl a Jordán cha, ax e c'och 'a sat lum lum tzyac' Jehová e caja'.

³² A yic cajn ex xo ta', caw tzeyil wal e b'a, yowlal tze b'eylb'ej smasnil jun tzo'n̈ checnb'il wan waln can 'ayx tic, xchi Moisés.