Dn 7 - Chuj San Sebastian Bible

A chan̈wn̈ noc'*r* yiljnac Daniel 'a swayich

¹ 'Ay jun 'ac'wal, 'a yic yab'lil xo yoch win Belsasar reyl 'a Babilonia, 'ay jun swaych Daniel x'ochi. 'Ay tas xyil 'a swaych cha. Ax 'a yic x'el swayan̈, 'ix stz'ib'n can jun tzo'n̈ tas caw niwc yel'ch xyil cha.

² 'Ix yaln Daniel 'ixtic: Xwil wal 'a jun in waych 'a 'ac'wl q'uiq'ui, to a 'a schan̈paq'uil yolyib'n̈q'uinal, ata 'ix cot jommoc 'ic'. Ax 'a yib'n̈ a niwquil mar xjawi, caw xma'x chan̈ chel-loc a yu'uj.

³ Ax x'aji, 'ix q'uet chan̈wn̈ no niwc noc' 'a yojl a mar cha, chucchc yilx junjn no'.

⁴ A jun no xb'ab'l q'ueta, lajn yilx 'icha no león, palta 'ay sc'axl 'icha no salt'iw. Ya' sb'a wanto wiln cha, ax xwilni 'ix to'x 'el jun tzo'n̈ sc'axl cha, xlajw cha, x'ijx chan̈ lin̈n 'a sat lu'um. 'Icha 'anma x'aj chan̈ lin̈an. 'Ix jelmj snab'en, 'icha xo snab'en 'anma x'ajcni.

⁵ Ax no schab'il, lajn yilx 'icha no oso, tz'eyn 'ejm jun pac' sniwnal 'a yib'n̈ jun pac' xo. Ax 'a yol sti', ata 'aych 'oxe sb'acl costl 'a slot'l ye. 'Ix wab'n yalx 'a 'ixtic: ¡'Ixic, chi 'ejm jantc chib'j tza nib'j tza chi'a, xchi jun cha.

⁶ Ax no yoxil, lajn yilx 'icha no leopardo. 'Ay chan̈e sc'axl 'a spacl yich spatquil. 'Ix wiln paxi to 'ay chan̈e sjolom, 'ix 'ajx 'och yopiso no'.

⁷ Ax no schan̈l xwil 'a in waych cha, caw yel xo tu yilx no'. 'Ay xo smay yilx 'ochi, caw wal 'ay yip. Caw niwc ye no', nab'a hierro. Choc' tz'aj smasnil tas yu'uj, tzb'u'n can 'ejmi, ax jantc to tzcan yuj cha, c'uxn tzte'cn 'ejm yet' yoc. Caw chuc yilx no 'a yib'n̈ jun tzo'n̈ xo no xin b'ab'l 'ilj cha, 'ay lajn̈e sch'a'ac.

⁸ Ya' sb'a wanto wiln jun tzo'n̈ sch'ac cha, ax xwilni xpac' q'uel junx yune sch'ac 'a scal jun tzo'n̈ xo cha. A yic xq'ueli, 'ix 'ec' stenn̈c 'el 'oxe sb'ab'l ch'ac cha. Sch'ocxoj jun chi xcan 'a yet'l 'oxe cha. A jun sch'ac cha, 'ay yol sat, 'ay sti 'icha 'anma', caw tzb'an̈ sb'a yet' tas tzyala.

A sb'eyc'ojlal Dios

⁹ 'Ix in yamn̈ej 'och wilni, 'ix 'ajx 'ejm jun tzo'n̈ despacho, ax Dios, atn jun 'ayc' 'a jun 'ejmn̈ej, x'em wocn 'a yib'n̈ jun yico'. Caw sac yilx spichl 'icha yilx q'uen sacb'acum. Ax xil sjolom, caw sac yilx 'icha sac lana. A sdespacho cha, 'ay setetal, 'icha to tzn̈ilchj sc'aq'uil.

¹⁰ 'Ay jun c'ac' tz'elt 'a yojltac 'icha sb'ey a a'. Caw smil-l xo sb'isl eb' tz'a'n servil, smiyon̈al xo sb'isl eb' lin̈n 'och 'a yojltac. Xlajw cha, x'el yich yoch b'eyc'ojlal, 'ix jacw jun tzo'n̈ ch'an̈ libro.

¹¹ An tic, caw q'ueln in 'ochn̈ej 'a jun noc' chi yuj jun tzo'n̈ paxti yic b'an̈jb'al tzyal jun syune ch'ac cha. Ya' sb'a wanto wiln cha, 'ix ma'x cham jun noc' cha, caw choc' x'aji. Wal 'a yajn̈ej xjulx 'at 'a scal c'ac', 'ix tz'a'i.

¹² An̈jtona pax jun tzo'n̈ xo no noc' cha, 'ix 'ijx 'ec' yopiso e no', palta 'ix can to eb' junx tiempoal.

¹³ 'Ix wilnn̈j 'a in waych chi 'a jun 'ac'wl cha. Ax xwilni 'ay jun x'eml 'a scal 'asun, lajn yilx 'icha 'anma'. 'Ix c'och 'a stz'ey jun Mach 'ayc' 'a jun 'ejmn̈ej cha, 'ix nitzx 'o'ch 'a yojltac.

¹⁴ 'Ix 'ajx yopiso yet' sb'inab'ilal yic tzya'n reyal. Smasnil 'anma 'a junjn nacion̈ yet' 'a junjn ti'al, c'uxn tz'a'w servil eb' 'a 'a. A yip 'ayc' 'a jun 'ejmn̈ej, ax yopiso cha, caw may xon b'a'n̈ 'oj lajwc 'ejmi.

¹⁵ An Daniel in tic, caw in xiwcha'an̈, yic xwiln jun tzo'n̈ cha, in 'och 'a 'il yu'uj.

¹⁶ In c'och 'a stz'ey junc eb' 'ayc' chi ta', 'ix in c'anb'n 'a 'a, tas wal tzyal 'el'ch jun tzo'n̈ cha. 'Ix schan sc'ojl yaln 'ayin, 'ix yaln 'ixtic:

¹⁷ A chan̈wn̈ no noc' xel cha, atn chan̈e nacion̈ 'oj yac' yajlil 'a yolyib'n̈q'uinl tic tzch'oxo.

¹⁸ A yic 'oj lajwc ya'n eb' yajlil cha, ax scan smasnil 'a yol sc'ab' eb' chon̈b' sic'b'il 'el yuj jun Dios cojxn niwn yel'chi, jun 'ejmn̈ej 'oj cancn 'a yol sc'ab' eb' 'a smasnil q'uinal, xchi.

¹⁹ Xlajw cha, xin c'anb'n to wal 'a 'a, tas yaj no schan̈l cha, yujto caw yel xo chuc yilx no 'a yib'n̈ jun tzo'n̈ xo no cha, caw tzon̈ xiw quiln 'och no'. A ye no', caw nab'a hierro smasnil; ax yech, nab'a bronce. Caw choc' tzyutj smasnil tas, tzb'u'n 'ejm smasnil, ax jantc to tas tzcan yu'uj, c'uxn tzte'cn 'ejm yet' yoc.

²⁰ An̈jtona xin c'anb'n paxi, tas wal tzyal 'el'ch lajn̈e sch'ac no cha, yet' pax junx sch'ac tot xpac' q'uet cha. 'Ix stenn 'el 'oxe ch'ac chi 'a yet'l 'aj xq'ueli. Yel xo 'ec'b'al yel'ch 'a yib'n̈ jun tzo'n̈ xo yitb'eym cha. A jun sch'ac tot xpac' cha, 'ay yol sat, 'ay pax sti', caw tzb'an̈ sb'a yet' tas tzyala.

²¹ Ax xwilni, a jun sch'ac cha, tzyac' owl yet' eb' schon̈b' Dios. Caw tzcan eb' 'a yaln̈ yu'uj,

²² masnto 'ix c'och jun Mach 'ayc'n̈ej 'a jun 'ejmn̈ej cha. 'Ixta to b'i'an, sb'onyaj eb' schon̈b' Dios to cojxn niwn yel'chi, yujto 'ix c'och stiempoal schan eb' yopiso.

²³ Xyaln 'ayn 'ixtic: A no schan̈l cha, atn jun schan̈l nacion̈ 'oj pitzwc chan̈ 'a yolyib'n̈q'uinl tic. Caw chuc yel 'a yib'n̈ jun tzo'n̈ xo eb' nacion̈ cha. 'Oj yic'c' smasnil yolyib'n̈q'uinl tic, 'oj yac' yajlil 'a yib'n̈ smasnil, toxn may xon jac sniwnc'ojlal.

²⁴ A lajn̈e sch'ac cha, tzyal 'el'chi, 'ay lajn̈wan̈ eb' rey 'oj yac' yajlil. Ax 'a spatc eb' lajn̈wan̈ cha, ata tza'n sjaw junx rey 'oj yac' yajlil. A jun cha, yel xo chuc yel 'a yib'n̈ jun tzo'n̈ xo eb' rey cha, 'oj satxoc 'el 'oxwn̈ eb' rey chi yu'uj.

²⁵ Caw 'oj b'uchwjoc 'a jun Dios to cojxn niwn yel'chi. 'Oj 'ixtxoc eb' schon̈b' Dios chi yu'uj. 'Oj ya'lc cob' sjeln jun tzo'n̈ ley, yet' jun tzo'n̈ tiempo yic 'emmquilal alb'il can yuj Dios. 'Oj 'ochcn eb' schon̈b' Dios chi 'a yaln̈ schecnb'il 'a nan̈l schan̈l ab'il.

²⁶ Palta ax 'a yic jun c'u yic 'oj 'och b'eyc'ojlal, 'oj 'ijxoc 'ec' yopiso cha, ax sat 'ejm 'a jun 'ejmn̈ej.

²⁷ Ax yopiso, yip yet' sb'inab'ilal smasnil nacion̈ 'ayc' 'a yolyib'n̈q'uinl tic, 'oj 'ajxoc can 'a yol sc'ab' eb' schon̈b' jun Dios to cojxn niwn yel'chi. A jun 'opiso tic, 'ayc'n̈ej 'a jun 'ejmn̈ej. Smasnil eb' chon̈b' cajn 'a sat lum lum tic, 'oj yac' eb' 'emmquilal 'a 'a, ax syiclni pax eb' tas 'oj yala', xchi 'ayin.

²⁸ Atn slajb' jun tzo'n̈ tic xalx can 'ayn an Daniel in tic. Caw in 'ochcn 'a somc'ojlal yu'uj. Caw sacb'el in sat yuj xiwlal, palta may xon junc mach 'aj 'ix wal-l jun tzo'n̈ paxti tic, xchi Daniel.