Dn 5 - Chuj San Sebastian Bible

Jun tzo'n̈ letra stz'ib'x 'ochi

¹ A Belsasar win sreyl Babilonia, 'ix sna win jun niwquil q'uin̈ yet' jun niwn wa'el. 'Ix yawtn cot win jun mil eb' niwc yajl 'aych yopiso 'a yol snacion̈ cha. Syamn 'och win yuc' 'an̈ yet' eb'.

^2-3 Wan xo sq'ue te 'an̈ chi 'a sjolm win rey Belsasar cha, 'ix 'at ya'nc win 'ijxoc cot jun tzo'n̈ vaso nab'a oro, nab'a plata; jun tzo'n̈ yijnac cot win Nabucodonosor 'a yol yatut Dios 'a Jerusalén, atn win smam 'ichm winac. A yic xjaw jun tzo'n̈ vaso cha, 'ix syamn 'och win yu'n 'an̈ 'a yojl yet' eb' 'ix yistzil yet' pax eb' 'ix schab'l 'istzil winac, yet' smasnil mach 'ayc' yet' win 'a jun q'uin̈ cha.

⁴ Syamn wal 'och eb' yu'w 'an̈, 'ix laj yi'nc chan̈ eb' sb'i sdiosal to nab'a oro, plata, bronce, hierro, te' yet' q'ue'en.

⁵ A wal 'a yic jun rato cha, 'ix sch'oxn sb'a jun sc'ab' 'anma 'a 'aj sacq'uinl yuj jun tzo'n̈ cantil, syamn 'och stz'ib'n 'och yet' yune sc'ab' 'a sat yich n̈a 'a yojl jun n̈a cha. A yic xyiln win rey jun c'ab' wan stz'ib'n cha,

⁶ caw sacb'el win yuj xiwlal. Yuj wal jun xiwlal x'och 'a win cha, syamn 'och win yib'x sniwnal smasnil, caw x'el yip winac.

⁷ 'Ix ya'n 'el win rey chi yaw, xyawtn cot win eb' tzyal jelnal sb'a, eb' tzchumn yet' c'anal, yet' eb' tztac' snan 'el paxti'. A yic xc'och eb', xyaln win 'a eb' 'ixtic: —A mach tztac' yawtn jun tas tz'ib'b'il 'och tic, tzyaln 'ayin tas tzyal 'el'chi, a jun cha, caw 'oj 'ajxoc 'och te pichl púrpura 'a 'a. 'Oj 'ajxoc pax 'och jun q'uen cadena nab'a oro 'a sjaj 'icha ton̈, ax yoch pax yoxl reyl 'a wopiso tic, xchi winac.

⁸ Smasnil eb' tzyal jelnal sb'a chi 'aych yopiso ya'n snab'enoc win rey, 'ix 'och eb' 'a yol jun n̈a cha, palta may junc eb' stac' yawtn jun tas tz'ib'b'il cha, ma'ix stac' yaln eb' 'a win rey tas tzyal 'el'chi.

⁹ Caw wal xwach' xiw win rey Belsasar chi si'mb'il, caw xwach' sacb'el sat win yuj xiwlal. Ax smasnil eb' yajl 'ayc' yet' winac, man̈x 'ic nachj 'el yuj eb', tas tzyutj eb'.

¹⁰ A yic xyab'n 'ix reina yel yaw win rey chi yet' eb' yit yajlil 'ayc' yet'oc, 'ix 'och 'ix 'a yojl jun n̈a chi 'aj 'aych q'uin̈ cha, 'ix yaln 'ix 'a win 'ixtic: —Mamin rey, 'ayc'n̈ej cab' opiso tic 'a smasnil tiempo, man̈ ach xiwoc, man̈ sacb'oc 'el 'a sat yuj xiwlal.

¹¹ A 'a yol a macb'en 'aj 'aych 'och reyl tic, 'ay jun winc caw tztac' snachj 'el yu'uj. Caw 'aych sjelnal jun tzo'n̈ dios 'a 'a. A 'a yol stiempoal win a mam 'icham, a jun winc cha, 'ix sch'oxli to caw 'ay jun snab'en caw wach', caw jelan, 'icha sjelnal jun tzo'n̈ dios. Yuj cha, ax a mam 'ichm Nabucodonosor, a x'a'n 'och syajlilc smasnil eb' 'ay tas tztac' yu'uj, eb' tzchumn yet' c'anal, yet' pax eb' tztac' snan 'el paxti 'a jun nacion̈ tic.

¹² Caw wal chuc yel sjelnal, caw 'ay pax snab'en. Tztac' yalni tas tzyal 'el'ch jun tzo'n̈ wayich, yet' jun tzo'n̈ paxti 'ajltac snachj 'eli, tzb'on pax yaj eb' 'anma tzsomchj 'el snab'en. A jun winc cha, Daniel sb'i, ax win rey chi x'a'n scuch Beltsasar. Mamin rey, comnoc tzac' 'awtxoc cot Daniel cha, ax 'oj alnc 'ayach, tas tzyal 'el'ch jun tzo'n̈ letra tz'ib'b'il 'och 'a sat yich n̈a cha, xchi 'ix.

¹³ Xlajw cha, x'at 'ijxoc cot Daniel, ax yic xjaw 'a yojltac win rey cha, 'ix sc'anb'n win 'a 'ixtic: —¿Ach am tic Daniel a b'i, ach tic yamb'ilch can cot 'icha presoal yuj in mam 'ichm Nabucodonosor 'a chon̈b' Judá?

¹⁴ 'Ix alx wab'i', to caw ab' 'aych sjelnal jun tzo'n̈ dios 'ayach, caw ab' wach' ach, 'ay a nab'en, caw jeln ach ab' paxi.

¹⁵ Yuj cha, ach wawtni, an tic xwawtj cot eb' tzyal jelnal sb'a yet' eb' tzchumn yet' c'anal, sec tzyawtj eb' jun tas tz'ib'b'il 'och tic, yic tzyaln pax eb' 'ayin tas tzyal 'el'chi, palta may junc eb' xnachj 'el yu'uj.

¹⁶ Ach xo tic, xwab'i chajtlto tznachj 'el o'oj, tztac' alni tas tzyal 'el'ch jun tzo'n̈ paxti 'ajltac snachj 'eli. Yuj cha, toto tztac' awtn jun tzo'n̈ letra tz'ib'b'il 'och tic, tzaln pax 'ayin tas tzyal 'el'chi, toto 'ixta', caw 'oj 'ajxoc 'och te pichl púrpura 'ayach. 'Oj 'ajxoc 'och jun q'uen cadena nab'a oro 'a a jaj 'icha ton̈, ax och yoxloc reyl 'ayin, xchi winac.

¹⁷ Xlajw cha, xta'w Daniel 'a win 'ixtic: —Can cab' jun tzo'n̈ a siylab' chi et' mamin rey, ax jun 'opiso cha, chucx cab' junc xo mach 'aj tzac'a. Palta an tic, 'oj wawtc jun tzo'n̈ letra tz'ib'b'il 'och tic ab'i', ax waln 'ayach, tas tzyal 'el'chi.

¹⁸ Mamin rey, a jun Dios cojxn niwn yel'chi, a x'a'n 'och yopiso a mam 'ichm Nabucodonosor, sec niwn yel'ch yet' sjelnal, yic tzb'inaxi.

¹⁹ Yuj wal jun sjelnal x'ajx cha, yuj cha, smasnil eb' 'anma 'a junjn nacion̈ yet' 'a junjn ti'al, caw x'ib'x eb' yuj xiwlal 'a yojltac winac. Caw niwn yel'ch win 'a sat eb'. A mach tznib'j tzmila, tzmiln̈j chamoc, ax mach tz'el 'a sc'ojl matz mila, matz mila. 'Ay mach x'ijx chan̈ yu'uj, ax 'ay mach x'ijx 'ejm yu'uj, a tzyal tas tznib'j sb'o'.

²⁰ Palta caw spitj sb'a yet' sb'an̈quinal, yuj cha, x'ijx 'ec' yopiso 'a sreyal, yet' sb'inab'ilal.

²¹ 'Ix pechx 'el 'a scal yit 'anma'il, 'ix jelmj snab'en, lajn x'aj snab'en 'icha no noc'. Ax yet' no calcte'al b'uru 'ajnc cajan, a te c'ultc slo 'icha no wacax. 'Emnc chicb'chan̈ 'a yib'n̈ sniwnal, masnto xnachj 'el yu'uj, chajtlto a jun Dios cojxn niwn yel'chi, a tz'a'n yajlil 'a yib'n̈ eb' tz'och reyal. A mach tznib'j tzya'ch yajlil 'a junjn chon̈ab', tzya'chn̈ej.

²² Ach tic mamin rey Belsasar, yixchicn ach jun winc cha, wach'xam ojtac tas 'ajnac, palta matz ej 'ejm xon a b'a jab'oc.

²³ A eco', to 'ix a b'an̈ a b'a 'a sat jun sYajlil satcha'an̈. 'Ix a'n 'ijxoc cot 'a ojltac jun tzo'n̈ svaso 'ayc' 'a yol yatut. Ach xo tic yet' smasnil eb' 'awtb'il cot o'oj, 'ix o'j 'an̈ yet' eb' 'a yojl jun tzo'n̈ vaso cha. 'Ix aln wach' paxti 'a jun tzo'n̈ comn dios nab'a plata, oro, bronce, hierro, te', yet' q'uen q'ue'en, atn jun tzo'n̈ matz tac' xon yilni, matz yab'i, may jac yojtac. Man̈oc 'a Dios 'aj 'ix al wach' paxti', palta ticni a 'a yol sc'ab' 'ayc' a q'uinal, a tzach 'i'n b'eyc'oc.

²⁴ Yuj cha, xya'n cot Dios jun c'ab' yic tzwul stz'ib'nc 'och jun tzo'n̈ paxti tic.

²⁵ MENE, MENE, TEKEL, UPARSIN.

²⁶ A tas tzyal 'el'ch jun tzo'n̈ tic, atn tic: MENE: Tox sna Dios to a 'a tic tzlajw can c'och opiso.

²⁷ TEKEL: Tox ach 'echtax 'a yol 'echtab', man̈x ach 'aloc.

²⁸ UPARSIN: A 'a macb'en 'aj 'aych 'och reyal, tox 'ix 'ijx 'ec' 'ayach, 'ix pojx 'ec' 'a eb' 'aj Media yet' eb' 'aj Persia, xchi Daniel.

²⁹ Xlajw cha, xya'n win rey Belsasar 'ajxoc 'och te pichl púrpura 'a Daniel. Xya'n pax win 'ajxoc 'och jun q'uen cadena nab'a oro 'a sjaj 'icha ton̈. 'Ix yaln win 'a smasnil eb' 'anma', to tz'ochcn Daniel 'a yoxl reyal.

³⁰ Ax 'a yic jun 'ac'wl cha, 'ix milx cham win Belsasar sreyl eb' caldeo cha.

³¹ Ax win Darío 'aj chon̈b' Media, a win xya'ch sb'a sjelc can 'a yopiso cha, 'ayx 62 ab'il sq'uinl win Darío cha.