Dn 4 - Chuj San Sebastian Bible

Cotnc 'a sjolm rey Nabucodonosor

¹ 'Ix yaln win rey Nabucodonosor jun tzo'n̈ spaxti tic 'ixtc 'a smasnil eb' chon̈b' 'ay 'a yol smacb'en: An reyn tic, tzwac' stzatzl e c'ojl e masnil ex chon̈ab', ex nacion̈, wach'xam chucchc e ti tzeyala, ex to cajn ex 'a sat smasnil lum lum tic.

² Tzin nib'j tzwac' eyojcoc 'el jun tzo'n̈ tas caw satjub'tac sb'o Dios 'ayin, atn jun mach caw niwn yel'chi.

³ ¡Man̈x jantcoc satjub'tacl jun tzo'n̈ tas tzb'o'o, yet' jun tzo'n̈ milagro tzch'oxo! Yajl 'a smasnil tiempo, 'oj b'eyn̈j yopiso 'a yib'n̈ junjn macn̈il 'anma'.

⁴ An reyn tic, caw wal tzaljc'ojlal waj 'a in despacho, caw wal tzniwtj tas 'ay 'ayin.

⁵ Palta 'ay jun 'ac'wal, yic waync in, 'ix 'och jun in wayich. A wal tas 'ix wil cha, caw wal in xiw chan̈ yu'uj.

⁶ Yuj cha, xwa'n 'awtxoc cot smasnil eb' tzyal jelnal sb'a 'ayc' 'a yol yic Babilonia tic yic tzjaw eb' 'a wojltac, sec tzyal eb' 'ayin tas wal tzyal 'el'ch jun in waych cha.

⁷ Ax yic xjaw eb' 'ay tas tztac' yuj cha, eb' tzchumn yet' c'anal, eb' tztac' snan 'el junc paxti', yet' eb' tzyal jelnal sb'a. 'Ix waln jun in waych chi 'a eb', palta ma'ix stac' yaln eb' 'ayin tas tzyal 'el'chi.

⁸ Ax 'a slajb' xoj 'ix jaw Daniel 'a wojltac, win tzcuch pax Beltsasar, 'icha wal sb'i in diosal. A sjelnal jun tzo'n̈ dios 'aych 'a 'a, 'ix waln in waych chi 'a 'ixtic:

⁹ Ach Beltsasar, syajlil ach eb' tztac' snan 'el junc paxti', wojtac to a sjelnal jun tzo'n̈ dios 'aych 'ayach. A smasnil tas c'ultac yaji, caw tznachjn̈ej 'el o'oj. Maclj wal ab' jun tzo'n̈ in waych chi 'ix wil cha, ax aln 'ayin tas tzyal 'el'chi.

¹⁰ Yaj ton jun tzo'n̈ in waych tic 'ix wila, yic c'otn in 'ec' in wayi: A 'a snan̈l lum lum tic, ata c'uyn chan̈ jun te te', caw wal niwquil ste'il.

¹¹ 'Ix q'uib' jun te cha, caw niwquil x'aj spenec. Ax sjolm te', caw xq'ue'ch 'a satcha'an̈, tztac' yilx cot te 'a 'aj tzlajw c'och smasnil lum lum tic.

¹² Caw wach' yilx xil te', man̈x jantcoc sat te', tztechj swatzan te smasnil 'anma yet' sat cha. A 'a yen̈l yich te', ata tzmol sb'a e no calte'al noc'. Ax 'a scal sc'ab' te', ata tzb'o e no ch'ic so', smasnil tas pitzn 'a yolyib'n̈q'uinl tic, tztechj te swatzani.

¹³ Ax xwiln 'a in waych cha, 'a 'a scal eb' yángel Dios stan̈mal yolyib'n̈q'uinl tic, ata 'ix cot jun ángel chi 'a satcha'an̈, 'ix 'eml 'a yolyib'n̈q'uinl tic:

¹⁴ Caw 'ip x'awj cha'an̈, xyaln 'ixtic: Ch'acc 'el jun te cha, tzu'c 'el sc'ab', tzeyi'n 'el xi'il, sactzicnac tzeyutj can 'at sat te'. 'At cab' e no calte'al noc' 'eloc, atn e no 'ayc' 'a yen̈l yich te', yet' e no ch'ic 'ayc' 'a sc'ab' te'.

¹⁵ Cojxn te yib' tzeyactj can yet' sch'an̈l yib' 'a sat lu'um, ax yet' q'uen cadena to hierro yet' bronce tze jalcn 'ejmi. Cancn cab' 'a scal te c'ultac. A mach tzch'ox jun yib'te cha, lojx cab' 'el yuj chicb'chan̈ tz'ejm 'a yib'an̈, ax cab' te c'ultc tzpac' 'a sat lum tic, a 'oj slo yet' no calte'al noc'.

¹⁶ Caw 'oj juwc 'el snab'en, lajn 'oj 'ajcn snab'en 'icha no noc'. A jun yailal 'oj 'ec' 'a yib'n̈ cha, uque ab'il 'oj yac'a'.

¹⁷ An̈ ángel on̈ tzqui tan̈wj yolyib'n̈q'uinl tic on̈, an̈ tzcal on̈ to tzjaw jun yailal chi 'a yib'an̈, sec wach' tzyojquej 'el smasnil eb' 'anma', to a jun Dios yel xo niwn yel'chi, a tz'a'n yajlil 'a yib'n̈ smasnil nacion̈. A eb' tznib'j tzya'ch yajlil, tzya'ch yopiso eb'. A eb' 'anma yel xo may yel'chi, a eb' tzya'cn 'och yajlil 'a scal eb' 'anma', xchi jun ángel cha.

¹⁸ Atn wal jun in waych tic 'ix wila. A ticnec ach Beltsasar, al 'ayin tas tzyal 'el'chi, yujto a smasnil eb' tzyal jelnal sb'a 'ayc' 'a yol in macb'en, may junc eb' stac' yaln 'ayin tas tzyal 'el'chi. Palta ach xo tic, 'oj stac' aln 'ayin tas tzyal 'el'chi, yujto a sjelnal jun tzo'n̈ dios 'aych 'ayach, xin chi 'a 'a.

¹⁹ Yuj cha, ax Daniel tzcuch pax Beltsasar, sictac 'ix 'aj snan jun rato, caw somchj snab'en yuj jun cha. Palta 'ix waln 'ixtc 'a 'a: Beltsasar, man̈ ach 'och 'il yuj jun in waych cha, yet' pax yuj tas tzyal 'el'chi, xin chi. 'Ix ta'w Beltsasar chi 'ixtc 'ayin: ¡'Ay, mamin rey, comnoc wal a 'a yib'n̈ eb' 'ajc'ojl yajch 'ayach, comnoc ata 'oj 'em tas tzyal 'el'ch jun a waych cha!

²⁰ Mamin rey, a jun te te 'ix el sq'uib' cha, caw wal niwquil 'ix 'aj te', 'ix q'ue'ch sjolm te 'a satcha'an̈, tztac' yilx cot te 'a smasnil 'aj tzlajw c'och lum lum tic.

²¹ Caw wach' yilx xil te', man̈x jantcoc sat te', tztechj swatzan te smasnil tas pitzan. A 'a yich te', ata tzmol sb'a smasnil e no calte'al noc'. Ax 'a scal sc'ab' te', ata tzb'o e no ch'ic so'.

²² A mach tzch'ox jun te cha, ach ton mamin rey, caw 'ix ach q'uib' yet' a b'inab'ilal. 'Ix 'och ep, masnto 'ix q'ue'ch a b'inax 'a satcha'an̈. 'Ix c'och a'n yajlil 'a 'aj tzlajw c'och lum lum tic.

²³ An̈jtona 'ix eln pax yemt jun ángel 'a satcha'an̈, atn jun stan̈mal yolyib'n̈q'uinl tic, 'ix yaln 'ixtic: Ch'acc 'el jun te cha, satc 'eli, cojxn yib' yet' sch'an̈l yib' tzeyactj can 'a sat lu'um. Tzlajw cha, tze jaln can 'ejm yet' q'uen cadena to hierro yet' bronce. A jun cha, can cab' 'a scal c'ultac, 'ejm cab' chicb'chan̈ 'a yib'an̈. A cab' te c'ultc 'oj slo yet' no calte'al noc', masnto 'oj 'ec' uque ab'il 'a yib'an̈, xchi jun ángel cha.

²⁴ A tzyal 'el'ch jun tic mamin rey, a jun Dios yel xo niwn yel'chi, a 'ix aln jun tic 'a eb'an̈.

²⁵ To 'oj a pechx 'el 'a scal eb' 'anma tic, ax yet' no calte'al noc', ata 'oj aj cajan. A te c'ultc 'oj a lo 'icha no wacax, 'oj 'em chicb'chan̈ 'a eb'an̈. 'Ixtan̈ej 'oj 'aj yec' uque ab'il o'oj, masnto 'oj nachjoc 'el o'oj chajtlto a jun Dios yel xo niwn yel'chi, a yajl yaj 'a yib'n̈ eb' 'anma tz'a'n yajlil, a tz'a'n 'och yajlil eb' tznib'j tzya'chi.

²⁶ A jun paxti 'ix alx cha, chajtlto tzcan te yib' yet' te sch'an̈l yib' 'a sat lu'um, tzyal 'el'chi, to 'oj a meltzj pax 'a opiso jun 'ejm xo, yic tox 'ix nachj el o'oj to a jun 'aj satcha'an̈, a Yajl yaj 'a yolyib'n̈q'uinl tic.

²⁷ Yuj wal cha mamin rey, chaj ab' jun tzo'n̈ tzwal 'aych tic. Wach' cab' tzotj a b'a, man̈x 'och a mul. Comnoc wal tzactj can a b'on maysch'olnil, colwjan̈ 'a eb' tz'ixtxi. Toto 'ixta', tecn 'oj a can 'a junc'ojlal, ax a q'ue'ch yet' tas 'ay 'ayach, xchi Daniel 'ayin, xchi win rey cha.

²⁸ Smasnil jun tzo'n̈ paxti alb'il can 'a win rey Nabucodonosor cha, 'ix 'el'ch eb'.

²⁹ Yab'lil xo yalx jun tzo'n̈ cha, 'ay jun 'ejem, 'ix q'ue win rey chi b'eyc'oc 'a span̈nil yib'n̈ sdespacho 'a Babilonia.

³⁰ 'Ix yaln win 'ixtic: ¡'Iltec wal yilx niwquil chon̈b' Babilonia tic! An xin b'o yet' in jelnal, yet' wip xin b'oni, yic tzwa'n yajlil 'a 'a, sec a tzch'oxn 'eli, chajtlto caw niwn wel'chi, xchi winac.

³¹ Wanto wal yaln win rey jun tzo'n̈ paxti cha, 'ix yab'n win yalx 'emt jun paxti 'a satchan̈ 'ixtic: Maclj ab' jun tzo'n̈ paxti tic ach rey Nabucodonosor. A opiso cha, tox 'ix 'ijx 'ec' 'ayach.

³² 'Oj a pechx 'el 'a scal eb' 'anma', ax yet' no calte'al noc' 'oj a c'och cajan. Uque ab'il 'oj a lo te c'ultc 'icha e no wacax, masnto 'oj nachjoc 'el o'oj, to a jun Dios yel xo niwn yel'chi, a tz'a'n yajlil 'a yib'n̈ smasnil 'anma', yet' 'a yib'n̈ smasnil nacion̈ 'ay 'a sat lum lum tic. A tz'a'n 'och eb' yajl tznib'j ya'ch yajlil, xchi jun paxti cha.

³³ A wal 'a yic jun rato cha, 'ix 'el'ch tas alb'il can 'a yib'n̈ win rey cha, 'ix pechx 'el 'a scal eb' 'anma'. A te c'ultc slo 'icha no wacax, 'ix 'ejm chicb'chan̈ 'a yib'n̈ sniwnal. 'Ix q'uib' xil 'icha xil no salt'iw, xq'uib' pax yech 'icha yech no salt'iw cha.

B'oxnc sc'ojl Nabucodonosor

³⁴ 'Ix yaln pax win rey chi 'ixtic: A yic xtz'acw stiempoal jun yailal 'aych 'a wib'an̈, in q'ue q'ueln 'a satcha'an̈, 'ix tojlb'i can pax in nab'en. Xlajw cha, xwaln wach' paxti 'a jun Dios caw niwn yel'chi, 'ix wi'n chan̈ sb'i Dios jun mach 'ayc' 'a jun 'ejmn̈ej. Yajl yaj 'a jun 'ejmn̈ej. 'Oj b'eyn̈j yopiso 'a yib'n̈ junjn macn̈il 'anma'.

³⁵ Qui masnil an̈ cajn on̈c 'a sat lum lum tic, caw may jac quel'chec 'a sat. Tzb'o tas tznib'j sb'o 'a scal eb' 'ayc' 'a satcha'an̈, yet' 'a qui cal an̈ cajn on̈c 'a sat lum tic. May junc mach tztac' stenn 'och wa'an, yic tzyaln 'a 'ixtic: ¿Tas yuj 'ixta tza b'o'o? man̈ xchic 'a 'a.

³⁶ A wal 'a yic jun rato cha, 'ix tojlb'i can pax in nab'en, in 'ochx can 'a wopiso xwab'i, x'ochx can in jelnal yet' in b'inab'ilal. Ax eb' in checab', yet' eb' niwc yopiso 'a in despacho, 'ix 'at eb' 'at in sayq'ui. In 'ochx can reyl jun 'ejm xo, yel xo in q'ue'ch 'a yib'n̈ 'icha 'a yic yaln̈taxi.

³⁷ A ticnec jun, an Nabucodonosor in tic, tzwij chan̈ sb'i jun sReyl satcha'an̈, tzwaln pax wach' paxti 'a 'a. Yujto caw wach'n̈j tas tzb'o'o, caw tojln̈ej smasnil, a tz'i'n 'ejm eb' cob' tzyij chan̈ sb'a 'a yol yico', xchi win rey cha.