Dn 3 - Chuj San Sebastian Bible

'Emmquilal 'a jun yechl nab'a oro

¹ 'Ix ya'n win rey Nabucodonosor 'ajxoc b'o jun yechl comn dios nab'a oro tz'aji, 30 metro ste'il, 'oxe metro spimal. 'Ix yaln winac to ata tzb'o 'a jun pan̈n tzcuch Dura 'a yol yic Babilonia cha.

² Xlajw cha, xya'n win 'awtxoc cot smasnil eb' yajl 'aych 'a junjn chon̈b' 'ay 'a yol yic jun nacion̈ cha: eb' syajlil eb' soldado, eb' gobernador, eb' 'a'm nab'en, eb' molm tumin, eb' juez, yet' smasnil jun tzo'n̈ xo eb' yajal, sec tzc'och eb' 'at sna sq'uin̈l jun yechl xyac' win rey b'o cha.

³ Yuj cha, smasnil eb' niwc yajl 'ay 'a jun nacion̈ cha, c'uxn syam sb'a eb' 'a yojltac jun yechl cha, yic tznan eb' sq'uin̈al.

⁴ Ax jun mach 'aych 'a yib'n̈ sjucb'tzan tas tzalx 'elt yuj jun cha, caw 'ip 'ix yutj yaln 'ixtic: E masnil ex 'anma xcot 'a junjn chon̈ab', yet' 'a junjn nacion̈ yet' pax 'a junjn ti'al, macljec eyab' tas 'oj wala'.

⁵ A yic 'oj eyab'nc yoc' q'uen trompeta, te 'amay, te tinab', te arpa, q'uen salterio, q'uen zampoña, yet' jun tzo'n̈ xo yamc'ab' tzc'anlb'ax sonal, a yic cha, tzex 'em cumn e masnil, tzeya'n 'ejm e b'a 'a jun yechl nab'a oro 'ix yac' win rey tic b'o'oc.

⁶ Palta ax mach to matz 'em cuman, yic tzya'n 'ejm sb'a 'a jun yechl tic, yajn̈ej 'oj 'at julxoc 'emt 'a yojl jun jorna caw ow sn̈ilchj sc'aq'uil, xchi winac.

⁷ Yuj cha, a wal 'a yic xyab'n smasnil eb' 'anma chi yoc' smasnil jun tzo'n̈ yamc'ab' tzc'anlb'ax sonl cha, 'ix 'em cumn eb' smasnil, 'ix ya'n 'ejm sb'a eb' 'a jun yechl to nab'a oro cha.

⁸ A 'a yic cha, 'ay jun tzo'n̈ ewin caldeo 'ix wul 'a'nc 'och sc'a'l eb' 'aj Judá 'a win rey.

⁹ 'Ix yaln eb' 'a win rey chi 'ixtic: Mamin rey, 'ayc'n̈ej cab' opiso tic 'a jun 'ejmn̈ej.

¹⁰ Ach 'ix ac' 'elt jun ley, chajtlto a smasnil 'anma', a yic tzyamn 'och yoc' jun tzo'n̈ yamc'ab' tzc'anlb'ax sonal, a yic cha, yowlal tz'em cumn eb' smasnil, tzya'n 'ejm sb'a eb' 'a jun yechl nab'a oro 'ix ac' b'o'oc.

¹¹ Ax mach to matz yiclni yem cumn 'a 'a, tzjulx 'emt 'a yojl jun jorna caw ow sn̈ilchj sc'aq'uil.

¹² Palta 'ay jun tzo'n̈ eb' 'aj Judá, eb' a'jnac yopiso ya'n yajlil 'a yol yic Babilonia tic; atn win Sadrac, Mesac yet' Abed-nego, a ewin tic, caw matz yiclj eb' tas tzala. May yel'ch a diosal 'a eb', yuj cha, matz yac' 'ejm sb'a eb' 'a jun yechl nab'a oro 'ix ac' b'o'oc, xchi eb'.

¹³ A yic 'ix yab'n win rey jun tic, caw xcot yowl win si'mb'il, 'ix 'at ya'nc win 'ijxoc cot win Sadrac, Mesac yet' Abed-nego. A yic 'ix jaw eb' 'a yojltac win rey cha,

¹⁴ 'ix sc'anb'n win 'a eb' 'ixtic: —¿Tom yel, may yel'ch in diosal 'ayex, matz eyac' 'ejm e b'a pax 'a jun yechl in diosal nab'a oro 'ix wac' 'ajxoc b'o'oc?

¹⁵ A ticnec jun, toto 'oj scha e c'ojol, to a yic 'oj 'oc' jun tzo'n̈ yamc'ab' tzc'anlb'ax sonal, a yic cha, tzex 'em cuman, tzeya'n 'ejm e b'a 'a jun yechl nab'a oro 'ix wac' 'ajxoc b'o cha, to 'ixta', may tas 'oj eyi'ni. Toto ma'oj eyiclc eya'n 'ejm e b'a 'a 'a, wal 'a yajn̈ej 'oj e julx 'emt 'a yojl jun jorna caw ow sn̈ilchj sc'aq'uil. ¡'Oj wila', toto 'ay junc xo dios 'oj e coln 'el 'a yol in c'ab'! xchi winac.

¹⁶ 'Ix ta'w Sadrac, Mesac yet' Abed-nego 'a win rey chi 'ixtic: —Mamin rey Nabucodonosor, may tas wach' caln 'aych yuj jun tic.

¹⁷ Wal yel, a qui Diosal 'aj tzcac' 'emmquilal on̈, a tztac' on̈ scoln a te c'ac' caw ow sn̈ilchj 'a jun jorna cha, yet' 'a smasnil tas tza nib'j tzon̈ otj on̈, a 'oj qui coln 'el 'a yol a c'ab' on̈.

¹⁸ Wach'xam ma'oj qui colx pax yuj on̈ jun, palta tzca'cn ojcoc 'el mamin rey, chajtlto ma'oj cac' 'ejm qui b'a xon 'a a diosal chi 'on̈, atn jun yechl nab'a oro 'ix ac' 'ajxoc b'o cha, xchi eb'.

Colchjnac 'el eb' 'oxwn̈ 'a jun jorna

¹⁹ A wal yic xyab'n win rey Nabucodonosor jun tzo'n̈ spaxti ewin quelmtac cha, caw wal xjuw yilx sat win scot yowal, xya'n win 'ajxoc 'och sc'a'l jun jorna chi uc 'ejm xo 'a yib'n̈ 'icha xon tz'ajch sc'aq'uil.

²⁰ 'Ix schecn 'at win jun tzo'n̈ eb' soldado caw 'ay yip yic tz'at sjalnoc eb' win Sadrac, Mesac yet' Abed-nego, sec tz'at julxoc 'emt eb' 'a yojl jun jorna caw ow sn̈ilchj sc'a'l cha.

²¹ A eb' quelm winc chi yoxwn̈il, 'ayt 'och spichl eb' yic yopiso yu'uj, yic 'ix jalx eb' cha. Xlajw cha, 'ix julx 'emt eb' 'a yojl jun jorna caw ow sn̈ilchj sc'a'l cha.

²² Yujto a win rey 'ix 'a'n jun ley cha, yuj cha, 'ix yiclx muc'uc. A jun jorna cha, caw wal ow sn̈ilchj sc'aq'uil, yuj cha, a eb' soldado x'at julnc 'emt eb' quelmtac chi 'a yojol, 'ix tz'a eb' yuj xob' te c'ac' cha, 'ix cham eb' yuj te'.

²³ Ax eb' quelm chi yoxwn̈il, jaln to eb' yic x'emcn eb' 'a yojl jun jorna caw ow sn̈ilchj sc'a'l cha.

²⁴ Wal 'a yajn̈ej 'ix q'ue lin̈njoc win rey Nabucodonosor chi 'a yet'ul, caw xiw winac, 'ix yaln 'a eb' yajl 'ayc' yet' ta': —¿Tom man̈ 'oxwn̈oc ewin quelm jalb'il 'ix julx 'emt 'a scal c'ac' cha? xchi winac. —'Ixtnta mamin rey, xchi ewinac.

²⁵ 'Ix yaln win rey cha: A tzwil an tic, coynto chan̈wn̈ ewin tzb'eyc' 'a scal c'ac' cha, jiyb'il 'el ewinac, may tz'i'n ewin xon jab'oc. A jun schan̈l cha, lajn wal yilx 'icha junc ángel, xchi winac.

²⁶ A yic xlajw yaln win jun tzo'n̈ cha, 'ix c'och win 'a stz'ey sti jun jorna cha, 'ix yaln win 'ixtic: —Sadrac, Mesac yet' ach Abed-nego, ex schecb' jun Dios To Niwn Yel'chi, ¡'eln̈ecta, cotn̈ec 'a tic! xchi winac. Yajn̈j wal cha, 'ix 'elt eb' quelm chi yoxwn̈il 'a scal te c'ac' cha.

²⁷ Xlajw cha, 'ix c'och smasnil eb' yit yajlil win rey chi 'a stz'ey eb' quelm winc cha. 'Ix yiln eb' to may jac sniwnal eb' stz'a yuj te c'ac' cha, may pax jac xil sjolm eb' stz'a'i, may xon x'i'n jac spichl eb' yuj te', may xon jac sjab' te c'ac' chi 'aych 'a eb'.

²⁸ A wal 'a yic jun rato cha, 'ix yaln win rey chi 'ixtic: Alx cab' wach' paxti 'a sDiosal Sadrac, Mesac yet' Abed-nego, yujto a 'ix checn cot jun yángel wul scol-l eb' schecb' caw tzya'ch sc'ojl 'a tic. Eb' ma'ix yiclni jun ley xwac' 'elt an reyn tic. Schaj sc'ojl eb' schami, 'a yib'n̈ pax to tzyac' 'ejm sb'a eb' 'a junc xo dios to man̈ sDiosalc eb'.

²⁹ A ticnec, an tzwala, to a smasnil mach tzaln tu paxti'al 'a sDiosal jun tzo'n̈ quelm tic, caw wal choc' 'oj 'aj smilx chamoc. Ax yatut, 'oj ma'xoc can 'ejm lan̈chjoc, wach'xam chuc chon̈b'al, chuc nacion̈al, mto chuc til tzyala. Yujto may wal junc xo dios tztac' scolwj 'icha sDiosal ewin tic, xchi winac.

³⁰ Xlajw cha, 'ix ya'n 'och win rey eb' 'oxwn̈ tic 'a jun tzo'n̈ niwc 'opiso 'a yol yic Babilonia cha.