Dn 2 - Chuj San Sebastian Bible

A swaych win rey Nabucodonosor

¹ A yic schab'l ab'il xo yoch win Nabucodonosor reyal, ata 'ix 'och jun tzo'n̈ swaych winac. Yuj wal jun tzo'n̈ swaych win cha, caw x'och win 'a somc'ojlal, man̈xtzac cot xon swayn̈ win yu'uj.

² Yuj cha, xya'n win rey chi 'awtxoc cot eb' 'ay tas tztac' yu'uj, eb' wayjel, eb' tzyal jelnal sb'a, yet' eb' tzchumn yet' c'anal, sec tzyal eb' tas tzyal 'el'ch jun tzo'n̈ swaych win cha. Ax yic xjaw eb' 'a yojltac winac,

³ 'ix yaln win 'a eb' 'ixtic: —'Ay wal jun in waych x'ochi, caw 'ayn 'och 'a somc'ojlal ticnec yu'uj. Tzin nib'j tzwojquej 'eli tas tzyal 'el'chi, xchi win 'a eb'.

⁴ Xlajw cha, 'ix paxtin eb' tzyal jelnal sb'a chi 'a win rey 'a sti eb' arameo, atn sti eb' cha, 'ix yaln eb' 'ixtic: —¡Mamin rey, 'ayc'n̈ej cab' opiso tic 'a jun 'ejmn̈ej! Al 'ayn̈ an̈ a checb' on̈ tic, tas 'ix el 'a a waych cha, an̈ xo 'oj cal 'aych on̈ tas tzyal 'el'chi, xchi eb'.

⁵ 'Ix ta'w win rey chi 'a eb' 'ixtic: —A tas tox xin na ticnec, toto ma'oj eyal 'ayin tas jun in waych cha, yet' tas tzyal 'el'chi, caw choc' 'oj eyaj e milx chamoc, ax eyatut, jun b'uln̈ 'oj 'aj sma'x can 'ejm lan̈chjoc.

⁶ Palta toto 'oj eyal 'ayin tas 'ix wil 'a in waych cha, yet' tas tzyal 'el'chi, 'oj e cha wal siylab' 'oj wac' 'ayex. 'Oj wac' pax in wach'c'ojlal 'ayex, caw niwn 'oj eyaj 'el'chi. Yuj cha, alc 'ayn 'an tas 'ix in waychej cha, yet' tas tzyal 'el'chi, xchi winac.

⁷ 'Ix ta'w eb' 'a win rey jun 'ejm xo 'ixtic: —Mamin rey, al wal 'ayn̈ on̈, tas 'ix el 'a a waych cha, an̈ xo 'oj cal 'aych on̈, tas tzyal 'el'chi, xchi eb'.

⁸ 'Ix ta'w pax win rey chi 'a eb' 'ixtic: —Wojc wal si'mb'il to tze say tas tzeyutj e coln e b'a. Yuj cha, ton̈j tzeyij 'ec' tiempo, yujto 'ix eyab' tas nab'il wuj 'a e patic.

⁹ Toto ma'oj eyal 'ayn yuj tas 'ix wil 'a in waych cha, eyojc wal b'i'an to 'oj 'el'choc tas nab'ilx wuj 'a eyib'n̈ cha, yujto 'ix e mol alej tas tzeyutj eya'n 'es yic tze pacn 'ayin. Yuj cha, tze tan̈wni sec toq'ue tzin jel tas nab'ilx wuj 'a e patc cha. Alc 'ayn 'an tas 'ix in waychej cha, sec tzwojquej 'eli chajtlto 'oj stac' eyaln tas tzyal 'el'ch in waych cha, xchi win rey chi 'a eb'.

¹⁰ 'Ix ta'w eb' 'a win 'ixtic: —Mamin rey, may junc 'anma 'a yolyib'n̈q'uinl tic tztac' snachj 'el yu'uj, tas tza nib'ej. An̈jtona', mant 'a junc rey mto junc caw niwn yel'ch yet' yopiso, tox 'ix c'anb'n junc tas 'icha jun tza c'anb'j 'ayn̈ tic on̈.

¹¹ Yujto a jun tic caw wal 'ajltac snachj 'eli, may junc mach tztac' yaln 'ayach. Cojn am eb' dios tztac' snachj 'el yu'uj, palta a eb' cha, man̈ 'ayc' 'ec' eb' 'a qui cal an̈ 'anman̈ tic, xchi eb'.

¹² A wal yic 'ix yab'n win rey chi jun tzo'n̈ cha, caw 'ix cot wal yowl win si'mb'il. 'Ix yaln winac to tzmilx cham smasnil eb' tzcob' yalch jelnal sb'a 'a yol yic Babilonia cha.

¹³ A yic 'ix 'elt jun ley cha, 'ix sayn 'ec' pax eb' Daniel yet' jun tzo'n̈ xo ewin yitb'eyum, yic tzmilx cham eb' jun xo.

Yaljnac Daniel swaych win rey

¹⁴ Yuj cha, xpaxtin Daniel 'a wach' nab'enal 'a win Arioc atn win scapitan̈il eb' soldado tztan̈wni win rey cha, yujto a win x'ajx yopiso smiln cham eb' tzcob' yal jelnal sb'a 'a Babilonia cha.

¹⁵ Sc'anb'n Daniel 'a win Arioc chi 'ixtic: —Ach wajlil, ¿tas yuj caw ji'lti 'ix yutj win rey ya'n 'elt jun ley tic? xchi. 'Ix yaln win Arioc tas wal yaj jun cha.

¹⁶ Xlajw cha, 'ix 'at Daniel yic tz'at tewc 'a win rey cha, sec tzyac' win jacx stiempo stan̈wni, yic tzalx yab' winac tas yaj swaych cha, yet' tas tzyal 'el'chi. 'Ix schaj sc'ojl win rey jun nab'en cha.

¹⁷ Wal 'a yajn̈ej 'ix 'at Daniel 'a yatut, 'ix yaln 'a ewin yitb'eym 'ayc' chi yet'oc, atn Ananías, Misael, yet' Azarías, 'ix yalni tas yaj jun paxti cha.

¹⁸ 'Ix yaln 'a eb' to tzc'an eb' scolwal Dios 'aj satcha'an̈, yuj jun paxti to caw c'ultac yaj cha, sec matz milx cham eb' yet' eb' tzcob' yal jelnal sb'a 'a yol yic Babilonia cha.

¹⁹ Ax 'a yic jun 'ac'wl cha, 'ix ya'n Dios swaychoc Daniel jun paxti to caw c'ultac yaj cha. Yuj cha 'ix yaln win swach' paxti 'a Dios 'aj satcha'an̈.

²⁰ 'Ix yaln 'ixtic: Ach qui Diosal on̈, alx cab' wach' paxti 'aych 'a smasnil q'uinal, yujto ec yaj jelnal yet' poder.

²¹ Ach ojtac jantc tiempo tzyac' junjn mach yajlil, ach tza'ch eb' 'a yopiso, tze'n pax 'el eb'. O'oj yuj cha, 'ay snab'en eb' 'ay snab'en, o'oj yuj cha, 'ay sjelnal eb' 'ay sjelnal.

²² Ach tzac' cojcoc 'el jun tzo'n̈ tas caw 'ajltac snachj 'eli, yet' jun tzo'n̈ tas c'ultac yaji. Ojc tas 'ay 'a scal q'uic'q'uinal, yujto 'aj sacq'uinl ach.

²³ Ach qui Diosal on̈, sDiosal ach pax eb' qui mam quichm on̈, caw tzwac' yuj diosal 'ayach. Tzwaln pax wach' paxti 'ayach, yujto 'ix ac' in jelnal, yet' pax wip. A ticnec 'ix ac' wojcoc 'el tas 'ix qui c'an 'aych on̈; xac' wojcoc 'el tas yaj swaych win rey, xchi Daniel 'a Dios.

²⁴ A yic xlajw yaln Daniel chi jun tzo'n̈ tic, 'ix 'at 'a win Arioc cha, atn win x'ajx yopiso yuj win rey smiln cham eb' tzyal jelnal sb'a 'a yol yic Babilonia cha, 'ix yaln 'a win 'ixtic: —Ach wajlil, comnoc matz cham eb' tzyalch jelnal sb'a cha. 'Ij in 'at 'a yojltac win rey cha. An 'oj wala' tas tzyal 'el'ch swaych win cha, xchi.

²⁵ Yuj cha, wal 'a yajn̈ej 'ix yi'n 'at win Arioc chi Daniel 'a yojltac win rey Nabucodonosor cha. 'Ix yaln win 'a win rey chi 'ixtic: —Mamin rey, a 'a scal ewin yamchjnac cot 'a Judá, ata 'ix 'ilchj jun winc tic wu'uj. A 'oj alnc 'ayach tas tzyal 'el'ch a waych cha, xchi winac.

²⁶ 'Ix yaln win rey chi 'ixtc 'a Daniel, tzcuch pax Beltsasar: —¿'Ojm stac' aln ach tic tas 'ix wil 'a in waych cha, yet' pax tas tzyal 'el'chi? xchi winac.

²⁷ 'Ix ta'w Daniel 'a win 'ixtic: —Mamin rey, a jun tas caw c'ultac yaj tza nib'j tzojquej 'el cha, may junc mach tztac' snachj 'el yu'uj. Wach'xam eb' tzyal jelnal sb'a, eb' tzchumn yet' c'anal, eb' wayjel, eb' tztac' snan 'el junc tas, may junc eb' tztac' yaln 'ayach.

²⁸ Palta 'ay jun Dios 'aj satcha'an̈, a tztac' ya'n cojcoc 'el jun tzo'n̈ tas caw c'ultac yaj cha. A tz'a'n ojcoc 'el ach mamin rey tas jun tzo'n̈ 'oj ujc b'aq'uin̈. 'Oj wal 'ayach tas 'ix el 'a a wayich yic wayn̈c ach cha:

²⁹ Ach tic mamin rey, a yic wayn̈c ach cha, 'ix a yamn 'och a nani tas 'oj ujc 'a yic b'aq'uin̈. Ax Dios jun mach tz'a'n 'ojcaxc 'el jun tzo'n̈ tas c'ultac yaji, a 'ix ch'oxn 'el jun tzo'n̈ tas 'oj ujc cha.

³⁰ A 'ix ch'oxn pax jun a waych tic 'ayin, man̈ yujoc to yel xo jeln in 'a yib'n̈ smasnil 'anma', ma'ay. Palta yuj wa'n ojcoc 'eli tas tzyal 'el'ch a waych cha, sec tznachj 'el o'oj tas nab'il oj 'a a nab'en.

³¹ Ach tic mamin rey, a tas 'ix el 'a a waych cha, atn tic: 'Ay wal jun yechl 'anma caw wal niwquil, caw tzictzni paxi, lin̈n 'och 'a ojltac. Caw wal 'ay smay yilxi.

³² A sjolm jun yechl cha, nab'a oro smasnil. A sn̈i sc'ojol yet' sc'ab' nab'a plata. Ax sc'ojol yet' xub' nab'a bronce.

³³ A spenec nab'a hierro. Ax samil yoc, hierro caln yaj yet' lum lum mucb'il 'elt 'a scal c'ac'.

³⁴ Ya' sb'a wanto eln jun tic mamin rey, 'ix cot jun q'uen q'uen 'a sat jun lum witz. Man̈ 'anmac xecn cot q'ue'en. Ax x'aji, 'echb' wal a 'a yoc jun yechl 'anma chi x'och q'ue'en, 'a 'aj caln yaj q'uen hierro chi yet' lum lum mucb'il 'elt 'a scal c'ac' cha, ax q'uen xma'n pojoc.

³⁵ Wal 'a yajn̈ej, 'ix poj smasnil q'uen hierro, lum mucb'il lu'um, q'uen bronce, q'uen plata, yet' q'uen oro cha. Nab'a pococ x'ajcn 'icha tzyac' stzapil 'ixm trigo 'a yic cuaresmail, ax 'ic' x'utz'n can 'ati, man̈x 'a jac sc'ajl 'ix can yu'uj. Ax q'uen q'uen 'ix ma'n poj jun yechl 'anma cha, 'ix ya'ch sb'a q'uen niwquil witzal. C'uxn 'ix macchj 'el sat lum lum tic yuj q'ue'en.

³⁶ Atn wal jun a waych tic 'ix el cha, al ticnec 'oj wal 'ayach, tas tzyal 'el'chi.

³⁷ Ach tic mamin rey, sat aj 'a smasnil eb' rey, yujto a Dios 'aj satcha'an̈, a ach 'a'n 'och reyal. Xya'n a jelnal, xya'n pax ep, yuj cha, caw niwn el'chi.

³⁸ Ach ya'n 'och yajlil 'a sat smasnil lum lum 'aj cajn eb' 'anma', 'aj 'ay no calte'al noc', yet' no ch'ic. A Dios cha, a 'a'jnacch 'och yajlil 'a yib'n̈ smasnil tas, yuj cha, ach tzach yal sjolm jun yechl to nab'a oro cha.

³⁹ A yic 'oj lajwc 'ec' jun opiso tic mamin rey, 'ay junx nacion̈ 'oj q'ue wa'an, ax ya'n reyal, palta ma'oj q'ue'choc sjelnal 'icha ec tic. 'Oj lajwc cha, ax sq'ue wan junx yoxl nacion̈ ya'n reyal, atn jun chi tzch'ox q'uen bronce cha, 'oj yac' yajlil 'a sat smasnil lum lum tic.

⁴⁰ 'Oj lajwc cha, ax sq'ue wan junx schan̈l nacion̈ ya'n reyal. A jun cha, yel xo wal caw 'ay yip 'icha q'uen hierro. Yujto a q'uen cha, tztechj sma'n poj q'uen junc tas, 'ixta jun nacion̈ 'oj q'ue wan cha, 'oj satxoc 'el smasnil jun tzo'n̈ nacion̈ chi yu'uj.

⁴¹ 'Ix eln pax samil yoc yet' yune yoc, chajtlto caln yaj q'uen hierro, yet' lum lum mucb'il 'elt 'a scal c'ac'. A jun cha, tzyal 'el'chi, chamacn̈ yaj jun nacion̈ cha. 'Ay jun macn̈ 'ay tac yip 'icha q'uen hierro, 'icha 'ix otj eln ach tic, to 'ay q'uen hierro chi caln yaj yet' lum lum cha.

⁴² A yune yoc, 'ix ela to caln yaj q'uen hierro yet' lum lum cha. A jun cha, tzyal 'el'chi to 'ay jun tzo'n̈ nacion̈ 'oj sb'o strato, 'ay nan̈l 'ay yip, 'ay pax nan̈l may yip.

⁴³ 'Icha wal 'ix otj eln q'uen hierro caln yaj yet' lum lum cha, 'ixta wal 'oj yutc sb'a jun tzo'n̈ nacion̈ cha. 'Oj ya'lc eb' junxn̈ej cob' 'oj yutc sb'a, palta ma'oj stac' smojn sb'a eb'. Lajn eb' 'icha q'uen hierro, matz tac' scaln sb'a q'uen yet' lum lu'um.

⁴⁴ A 'a yol stiempoal jun tzo'n̈ eb' rey cha, ata 'oj ya'ch Dios 'aj satchan̈ junx yajl yet' snacion̈ to man̈x 'a b'a'n̈ 'oj satli. Man̈x 'oj 'ajxoc 'och 'a yol sc'ab' junc xo chon̈ab'. 'Oj satxoc 'el smasnil jun tzo'n̈ xo rey yet' snacion̈ yu'uj. Palta a jun cha, 'ayc'n̈ej 'a jun 'ejmn̈ej.

⁴⁵ Atn wal chi tzyal 'el'ch q'uen q'uen 'ix el scot 'a sat witz cha, to man̈ 'anmac 'ix ecn cot q'ue'en. A q'uen 'ix 'a'n 'och poccal q'uen hierro, q'uen bronce, lum mucb'il lu'um, q'uen plata yet' q'uen oro. A jun Dios caw niwn yel'chi, a 'ix ch'oxn 'aych mamin rey, yuj tas 'oj ujc b'aq'uin̈. A jun a waych cha, 'oj 'el'choc tas tzyala, 'icha wal tzwutj waln 'aych tic, 'ixta wal tzyal 'el'chi, xchi Daniel 'a win rey cha.

⁴⁶ Xlajw cha, 'ix 'ejm cumnjoc win rey Nabucodonosor yi'n 'ejm sb'a 'a yojltac Daniel, 'ix ya'n win 'ajxoc xajmb'al yet' incienso 'a 'a.

⁴⁷ 'Ix yaln win rey chi 'a Daniel 'ixtic: —Wal yel a e Diosal ax tic, cojxn̈ej niwquil yel'ch 'a yib'n̈ jun tzo'n̈ xo comn dios, syajlil eb' rey yaji, a tzch'oxni tas jun tzo'n̈ waych to c'ultac yaji, tic wal 'ix nachj 'el jun waych tic o'oj, xchi winac.

⁴⁸ Xlajw cha, 'ix ya'n 'och win rey chi Daniel 'a jun 'opiso to yel xo niwn yel'chi. Caw niwn jun tzo'n̈ xo siylab' caw wach' 'ix yac' win 'a 'a. 'Ix ya'n 'och win gobernadoral 'a yol smacb'en Babilonia. 'Ix ya'n 'och pax win sat yajlil 'a yib'n̈ smasnil eb' tzyal jelnal sb'a cha.

⁴⁹ 'Ix sc'ann Daniel yopiso jun tzo'n̈ eb' yitb'eym chi 'a win rey. Yuj cha, xya'n 'och win rey chi yopiso win Sadrac, win Mesac yet' win Abed-nego 'a yol smacb'en Babilonia cha. Ax Daniel ata 'aych yopiso 'a sdespacho win rey cha.