Dn 10 - Chuj San Sebastian Bible

A tas xyil Daniel 'a swayich

¹ A yic yoxl ab'il yoch win Ciro reyl 'a chon̈b' Persia, 'ix japx spaxti Dios 'a Daniel, atn tzcuch pax Beltsasar. Waychil 'ix 'aj yalx 'a 'a, yuj tas wal tzyal 'el'chi. A jun paxti cha, niwquil owl tzch'oxo.

² Yuj cha, xyaln Daniel 'ixtic: A 'a yic jun tiempoal cha, caw wal cusc'ojlal waj 'a 'oxe seman.

³ May jac schib'l wal wach' xin c'uxu, may chib'j xin chi'a, may xon jac yal uva xwuq'uej. May pax perjuma xin succh jac 'ayin, masnto stz'acw 'oxe seman cha.

⁴ A 'a yic 24 yoch b'ab'l 'uj yic jun ab'il cha, ata 'ayn 'ec' 'a sti a niwn a tzcuch Tigris.

⁵ Ax xwiln 'ati, 'ay jun winc 'aych jun spichl nab'a lino yu'uj, ax sinchail snan̈al b'ob'il 'a q'uen oro caw wach'.

⁶ A sniwnal, caw tzictzni yilx 'icha q'uen topacio, ax sat caw tz'etzw 'icha letz'lo'om. A yol sat, caw tzxexni 'icha junc cantil tzn̈ilchj sc'aq'uil. A sc'ab' yet' yoc, caw tzictzni 'icha q'uen bronce caw n̈el-li yaj sb'o'i, ax sjaj caw tzn̈il-li 'icha sjaj nan̈loc 'anma'.

⁷ Cojn an Daniel in tic wiljnac jun chi 'a 'icha waychil, ax jun tzo'n̈ xo eb' 'anma 'ayc' wet'oc, man̈ yiljnacc eb' jun cha, a yic eb' to x'at eb' 'eloc, sc'ub'n 'el sb'a eb' yujto xjaw jun niwquil xiwlal 'a eb'.

⁸ Yuj cha, in ch'ocjxoj 'ayn 'eq'ui yic 'ix wiln jun cha, caw in sacb'el yuj xiwlal, x'el wip xwab'i.

⁹ A wal yic xwab'n sq'ue yaw spaxtin cha, in sicb'eli, caw sat in c'ojol, in 'em n̈ojnjoc 'a sat lu'um.

¹⁰ Ax x'aji, x'och yamn 'a in c'ab', in sto'n cha'an̈, masnto xin quil 'ejm sjolm in penec yet' in c'ab'.

¹¹ Xyaln 'ayn 'ixtic: Daniel, ach chamc'ojlb'il yuj Dios, maclj wal ab' tas 'oj wal 'ayach. Q'uen̈ wa'an, yujto an tic in checx cot 'ayach, xchi 'ayin. A yic xyaln jun tzo'n̈ paxti chi 'ayin, in q'ue lin̈an, palta caw in 'ib'x yuj xiwlal.

¹² Xlajw cha, xyaln pax 'ayn 'ixtic: Daniel, man̈ ach xiwoc. A Dios 'ix 'ab'n a lesl 'a yic b'ab'l c'u yic a'n 'och a b'a 'emmquilal 'a 'a. Yujn̈ej jun tzo'n̈ a paxti cha, yuj cha, in checx coti.

¹³ A jun ángel yajl yaj 'a yol yic Persia, a in yamn 'och wan junschawinc c'ual. Ax pax Miguel, atn jun ángel sat yajl yaji, a xjaw colwjoc wet'oc, 'ix cancn 'a stz'ey eb' syajlil Persia cha.

¹⁴ Yuj cha, ticnec in jaw 'ayach yic tzwul walnoc ab'i', tas 'oj 'ec' 'a yib'n̈ a chon̈b' chi 'a yic slajb' c'ual. Yujto a tas xel 'a jun a waych cha, atn tas 'oj ujc yic b'aq'uin̈, a chi xch'oxx ela', xchi 'ayin.

¹⁵ A yic wan yaln jun tzo'n̈ paxti chi 'ayin, caw man̈x 'ic stac' in paxtini, cojxn̈ej 'a sat lum q'ueln in 'ejmi.

¹⁶ Ax x'aji, 'ay jun 'icha yilx 'anma', yajn̈ej x'och yamn 'a in ti'. Xlajw cha, xwaln 'a jun mach lin̈n 'ec' 'a wojltac chi 'ixtic: Ach wajlil, yuj wal jun in waych tic, in 'och 'a somc'ojlal, caw x'el wip xwab'i.

¹⁷ An a checb' in tic, ¿tas wal 'oj wutc paxtinc in b'a et' ach wajlil? Caw man̈x 'a wip, man̈xtzac stac' wi'n wic' tzwab'i, xin chi 'a 'a.

¹⁸ A jun lajn yilx 'icha 'anma cha, 'ix 'ochx yamn 'ayn jun 'ejm xo, yuj cha, caw x'ochx wip xwab'i.

¹⁹ Xyaln 'ayn 'ixtic: Man̈ ach xiwoc. Caw tzach schamc'ojlej Dios. Cojn to tza te'wtzej a b'a, xchi. A yic wanto spaxtin 'ayn cha, 'ix 'ochx wip si'mb'il xwab'i, xwaln 'a 'ixtic: Ach wajlil, paxtinan̈ 'ayin, yujto caw wal x'ochx wip oj tzwab'i, xin chi 'a 'a.

^20-21 'Ix yaln 'ayn 'ixtic: ¿Ojc ama tas yuj in jaw wul ach wila'? A ticnec, 'oj wal 'ayach, tas jun tzo'n̈ tz'ib'b'il 'a ch'an̈ libro yic jun tzo'n̈ paxti caw yel: A ticnec, to 'oj in 'atx wac' owl yet' jun ángel syajlil Persia. Ax yic 'oj lajwc wa'n owl yet' cha, ax sjaw pax jun ángel syajlil Grecia. A yic tzwa'n owl yet' eb', may junc mach tzcolwj wet'oc, cojn wal Miguel, jun ángel syajlil chon̈b' Israel, a tzcolwj wet'oc.