A Scarta San Pablo D'a Eb' Aj Colosas 4 - Chuj San Sebastian Bible

¹ Ax xo ex patron̈, tojl tzeyutj e nab'en 'a eb' e moso to man̈ yico'oc sb'a, wach'n̈j tzeyutj e b'a 'a eb'. Tze na coti, chajtlto 'ay pax jun mach 'a satcha'an̈, a tzex 'a'n mandar, atn Cajlilec.

² Ax xo e masnil, yelc'ojlal caw tzex leslwi 'a smasnil tiempo. Tzlaj eya'nc pax yuj diosal 'a Dios.

³ An̈jtona', tzex leslwi pax cuj on̈, sec 'oj 'och Cajlilec quet' on̈, sec 'oj stac' caln 'el spaxti 'on̈, yet' yab'xil Cristo, atn jun 'ac'b'il cojcoquec 'eli. Ax ticnec, yuj waln 'el yab'xil tic, preso waji.

⁴ Yuj cha, leslwan̈c wu'uj, sec a yic tzwaln 'el yab'xil Cristo, 'oj nachjc 'el yuj eb' tz'ab'n 'icha tznib'ej.

⁵ A yic tzex paxtin yet' eb' man̈ creyenteoc 'a junjn 'ejem, caw wach'n̈j tzeyutj e b'eyb'al yil eb'.

⁶ Wach'n̈j tzeyutj e paxtini, tze ch'oxn e wach'c'ojlal 'a eb'. Toto 'ixta', 'oj nachjc 'el eyu'uj, tas 'oj eyutc e pacn tas tzc'anb'j junjn eb' 'ayex.

Tz'ajx 'at stzatzl sc'ojl eb'

⁷ A jun cu'tac Tíquico tic, chamc'ojlb'il cujec. Caw yiclum tzyutj sb'a smunlj 'a yic Dios. 'Aych ya'malc servil Cajlilec wet'oc. C'uxn 'oj 'at yal 'ayex, tas waj 'a tic.

⁸ Yuj cha, tzin checn 'at yal 'ayex, chajtl caj 'a tic on̈. 'Oj ex sjucb'tzoc pax ta'.

⁹ An̈jtona cu'tac Onésimo, 'oj 'at pax yet'oc. A Onésimo tic, eyit chon̈ab', caw chamc'ojlb'il cujec. Caw yiclumn̈ej tzyutj sb'a. A chawn̈ eb' tic, c'uxn 'oj 'at yal eb' 'ayex, tastc wan sb'o 'a tic.

¹⁰ Ax Aristarco, preso yaj wet' 'a tic. Tic tzya't stzatzl e c'ojl ta'. Yet' pax Marcos, atn yican Bernabé, tzya't pax stzatzl e c'ojol. Waljnacx 'at 'ayx yuj Marcos tic, toto 'oj c'och ta', tzaljc'ojlal tze chaj sc'ochi.

¹¹ Ax Jesús, tzcuch pax Justo, tic tzya't stzatzl e c'ojl jun xo. 'Ay jun tzo'n̈ xo eb' wit israelal schajnac Cristo 'a tic, palta an̈j wal 'oxwn̈ eb' xin b'ab'l alj tic, an̈j wal eb' caw tzmunlj wet'oc, sec 'ay eb' tzlaj 'och 'a yol sc'ab' Dios quet'ec. A eb' 'oxwn̈ tic, caw tzyac' eb' sniwnal in c'ojol.

¹² A jun eyit chon̈b' Epafras tic, 'aych ya'malc servil Cristo wet'oc. Yelc'ojlal caw tzleslwi eyu'uj, sec tzex wach' te'nb'i, sec wach' cojxn wal jun tzo'n̈ tas tznib'j Dios 'aj tze wach' 'a'j 'och e nab'en.

¹³ An tic, tzwac' testigoal in b'a, chajtlto caw tzex sna'a. Tznan pax 'at eb' 'ay 'a Laodicea yet' eb' 'a Hierápolis.

¹⁴ Ax Lucas tic, atn doctor, caw chamc'ojlb'il cujec, yet' Demas, tic tzya't eb' stzatzl e c'ojol.

¹⁵ Tic tzca't stzatzl sc'ojl eb' creyente 'ay 'a Laodicea cha. Tzca'n pax 'at stzatzl sc'ojl canb' Ninfas, yet' pax eb' creyente tzyam sb'a 'a yatut.

¹⁶ Tzlajwn̈ej eyawtn 'elt jun carta tic 'a sat eb' creyente ta', tzeya'n pax 'at 'a eb' 'aj Laodicea, sec 'oj 'awtxoc pax 'a eb' ta'. Ax e chan sjaw jun carta 'oj yac' paxt eb' 'aj Laodicea chi 'ayex, ax eyawtn paxi.

¹⁷ Ax cu'tac Arquipo, tzeyal 'ixtc 'a 'a: Caw tzach munlj wal 'a jun opiso tic xyac' Cajlil 'ayach, xe chi 'a 'a.

¹⁸ An Pablo in tic, caw an tzin tz'ib'j 'at stzatzl e c'ojl. Tzin e na coti, chajtlto preso waj 'a tic. Tzin nib'j tzyac' Dios swach'c'ojlal 'ayx ta'. [Ya' cab'i'.]