A Scarta San Pablo D'a Eb' Aj Colosas 1 - Chuj San Sebastian Bible

Tz'el yich scarta Pablo

¹ An tic Pablo in. Schecb' in Jesucristo, yujto 'ixta x'el 'a sc'ojl Dios. An yet' cu'tac Timoteo,

² tzin tz'ib'j 'at jun in carta tic 'ayx ex yic xo Dios 'a chon̈b' Colosas. Caw 'aych e c'ojl 'a Cristo si'mb'il. Tzin nib'j tzyac' qui Mam Dios swach'c'ojlal yet' sjunc'ojlal 'ayx ta'.

Slesl Pablo yuj eb' creyente

³ A yic tzon̈ leslwi 'a junjn 'ejm eyu'uj, tzcac' yuj diosal 'a Dios eyuj on̈, atn 'a Smam Cajlil Jesucristo.

⁴ Yujto xcab' eyab'xil on̈, chajtlto xeya'ch e c'ojl 'a Cristo Jesús. Tzcab'n on̈, to caw 'ay e chamc'ojlal 'a jantcn̈ej eb' yic xo Dios yaj quet'ec.

⁵ 'Ixta tzeyutj e b'a, yujto wan e tan̈wni jun eyic molb'il 'a satcha'an̈. Atxo 'a yic eyab'n jun wach' 'ab'x caw yel, eyamn 'och eya'n 'och jun chi yipc e c'ojol.

⁶ A jun 'ab'x yic colnb'il alb'ilx 'ayex, wan yalx 'a junjn lugar 'a yolyib'n̈q'uinl tic. 'Icha junc te tzq'uib'i, tzya'n sat, 'ixta tz'aj jun 'ab'x tic 'a eb' tz'ab'ni. An̈jtona', 'ixta x'aj 'ayex, yictax e b'ab'l 'ab'ni, chajtlto niwn swach'c'ojlal Dios. Yujto nachjnac 'el eyu'uj, to caw yel 'ay swach'c'ojlal cha.

⁷ A Epafras, a cuyjnacx 'a jun 'ab'x tic. Chamc'ojlb'il cujec, yujto quit munljumal qui b'a yet' on̈. Caw yiclum tzyutj sb'a ya'n servil Cristo 'a e cal ta'.

⁸ A wul aljnac 'ayn̈ on̈, chajtlto caw 'ay e chamc'ojlal yuj Yespíritu Dios ta'.

⁹ Yuj cha, yictax cab'n eyab'xil on̈, ma'ix cactj can xon qui leslwi eyuj on̈. To tzqui c'an 'a Dios eyuj on̈, sec a tz'a'n e jelnal yuj Yespíritu, tzya'n nachjc 'el smasnil yic Dios eyu'uj, sec wach' 'oj eyojcoc 'el si'mb'il, tas tznib'j 'ayex.

¹⁰ Toto 'ixta tzex 'aji, wach' 'oj eyutc e b'eyb'al, sec 'oj wach' tzaljoc Cajlilec eyet'oc, yujto smoj 'ixta tzeyutj e b'a. Caw wach' tzeyutj e b'eyb'al, 'icha junc te caw wach' satni. Ax e wach' 'ojcan 'el Dios.

¹¹ Tzon̈ leslwi pax eyuj on̈, sec a tz'a'n e te'nal yet' spoder, yujto a spoder cha, caw niwn yel'chi. To 'ixta', 'oj techjoc smasnil tas eyu'uj. Caw te'n 'oj eyutcn̈ej e b'a, 'oj e tzaljn̈ej paxi.

¹² Ax eya'n yuj diosal 'a qui Mam Dios. A tzb'on qui nab'enec, sec 'ay calnec quic yet' jantcn̈ej eb' yic xo yaji, yujto yic on̈c xo sacq'uinal.

¹³ Yujto a on̈ colnec can 'elt 'a yol sc'ab' q'uic'q'uinal, on̈ yi'nec 'och 'a yol sc'ab' Yunnal, atn jun chamc'ojlb'il yu'uj.

¹⁴ Atn Yunnal chi on̈ colnec 'eli, [yujto xcham cujec.] A 'ix 'a'n lajwc can qui mulec.

Junc'ojlal xoj cajc yet' Dios

¹⁵ Wach'xam matz tac' quilnec qui Mam Dios, palta a Yunnal chi xch'oxn 'ayn̈ec tas yaji, yujto caw lajn yet'oc. A Yunnal, b'ab'l yaj 'a smasnil tas, yel xo wal niwn yel'ch 'a yib'n̈ smasnil.

¹⁶ Yu'uj, b'onc smasnil tas 'ay 'a satcha'an̈, yet' tas 'ay 'a sat lum tic. Wach'xam jun tzo'n̈ tzquila, toxn̈ej jun tzo'n̈ matz quila, an̈j b'ojnac smasnil. Yet' pax smasnil jun tzo'n̈ xo eb' 'aych yajlil, eb' 'ay spoder, wach'xam matz tac' quiln eb', palta a b'ojnac eb', sec wach' tz'ajx servil yuj eb'.

¹⁷ Yic mant 'a yolyib'n̈q'uinl tic, 'ayc' xon Cristo. Yujn̈ej, wach'n̈j yec' smasnil tas.

¹⁸ Caw sjolm yaj 'a yiglesia. An̈ec yiglesia on̈c tic, 'icha to sniwnal cajec. A tz'a'n qui q'uinlec. A b'ab'l pitzwnac pax 'a scal eb' chamnac, yic wach' yel xo wal niwn yel'ch 'a yib'n̈ smasnil.

¹⁹ A Dios caw 'aych 'a Cristo si'mb'il, yujto 'ixta tznib'ej.

²⁰ Tznib'j pax Dios, yuj Cristo junxn̈ej 'oj 'aj smasnil tas yet'oc, eb' 'ay 'a satcha'an̈, yet' eb' 'ay 'a yolyib'n̈q'uinl tic. Yuj wal cha, xcham Cristo 'a spenc te culus. 'Ix 'elcn schiq'uil, sec wach' junc'ojlal xoj 'oj 'aj smasnil yet' Dios.

²¹ Ax xo, caw 'ajc'ojl eyajch 'a Dios 'a yic yalan̈. Caw tu eyutjnac e nab'en 'a sat, yujto maysch'olnil e b'eyb'al ta'. Palta ax ticnec, junc'ojlal xoj eyaj yet'oc,

²² yujto xcham Cristo yet' sniwnal cujec. 'Ixta x'aj schami, sec tzon̈ yijec 'och yico'oc, sec may jac qui mul yet' qui maysch'olnilal 'a sat.

²³ Palta yowlal tzeya'ch 'a e c'ojl 'a smasnil tiempo. Caw te'n tzeyutj e nab'en, 'icha junc te caw 'ay sch'an̈l yib'. A jun wach' 'ab'x yic colnb'il eyab'jnac xo, man̈ eyactc can eya'n 'och yipc e c'ojol. A jun wach' 'ab'x tic, wan yalx 'el 'a smasnil yolyib'n̈q'uinl tic. An xo Pablo in tic, wan waln 'el pax jun xo.

Scuyjnac Pablo eb' creyente

²⁴ A ticnec, 'ayn 'och 'a yailal e mul eyujoc. Palta tzin tzaljn̈ej paxi. Yujto a yic tzwab'n syal yet' in niwnal tic, 'icha to tzin tz'acb'tzej syailal Cristo jac xo. A 'ix 'ab'n syal cuj an̈ yiglesia on̈c tic, yujto 'icha to sniwnal cajec.

²⁵ In 'ajx 'och ya'malc servil eb' wit creyenteal smasnil. Ya'jnac Dios jun wopiso tic, sec tzex wac' servil, yujto tznib'ej, to tzin wach' alj 'el spaxti'.

²⁶ 'Ay jun tas c'ub'b'il 'el yuj Dios 'a yictax mant 'a yolyib'n̈q'uinl tic. Palta ax ticnec, a x'a'n cojcoquec 'el an̈ yic on̈c xo tic. A 'a'jnac wopiso waln 'el jun tic.

²⁷ 'Elnc 'a sc'ojol, to tzyac' cojcoquec 'eli. A jun tic, yel xo wal niwn yel'ch 'ayx ax man̈ ex israeloc. Atn jun tic x'ajx cojcoquec 'eli, to a Cristo cajn 'och 'a e pixn junjn ex quet' on̈. Yuj Cristo, tzca'nec 'och 'a qui c'ojol, to 'oj tz'acwc qui wach'l 'icha swach'l Dios.

²⁸ Atn Cristo tzcal-l yab'xil on̈. Tzcham wal caln yab'xil 'a junjn eb' 'aj tzon̈ 'ec' on̈. Tzon̈ cuywj pax on̈, sec tzwach' jelnb'i junjn eb' 'a yic Dios. Yujto tzqui nib'j on̈, to caw tzte'nb'i snab'en junjn mach 'a yol sc'ab' Cristo.

²⁹ Yuj wal jun tzo'n̈ tic, caw tzin munlji. Caw tzwac' 'ip wal 'a smasnil in c'ojol, yujto a Cristo tzyac' spoder 'ayin.