Cantares 8 - Chuj San Sebastian Bible

¹ Comnoc wal in nul'j ach, q'uinloc junn̈j 'im chub'il cu'uj. Toto 'ixta', a yic tzach in chan 'a yol b'e, tztac' in tz'ub'n 'elt jac a ti', may mach tu tzaln 'a in patic.

² Toto 'ixta', tztac' am ach wi'n 'at jac 'a yatut in nun, tzach wij 'och am 'a yol yatut cha, ach am tzach 'och in cuymaloc. An am tzwac' oc' yal uva to caw wach', tzwa'n pax oc' yalil sat te in granado.

³ A 'a c'ab' 'a a surito, a tzcan 'a yaln̈ in jolom, ax a wach' c'ab', a tzin la'ni, xchi 'ix.

Tzyaln win quelm cha:

⁴ Ex cob'stac 'aj Jerusalén, ta'wjec can e ti'oc, to man̈ e pitzl swayn̈ 'unx cob's chamc'ojlb'il wu'uj, munto 'oj 'el swayan̈, xchi winac.

Swacl b'it Tzyaln eb' 'anma':

⁵ ¿Mach jun 'ix chi tzcot 'a lum cusltac lum cha, pacn q'ue 'a squelb' jun chamc'ojlb'il yuj cha? xchi eb'. A 'a yich jun te snun mansan, ata xin pitzl a wayan̈, ata yab'jnac a nun syail yic alji.

Tzyaln 'ix cob's cha:

⁶ Comnoc matz chaj a c'ojl tas tzyal junc xo 'ix 'ix, cojn cab' wic tzchaj a c'ojol. May cab' junc xo mach tza la'coti, cojn in cab' tzin a la'coti. A qui chamc'ojlal 'ayn̈ junjn on̈, 'ay cab' yip 'icha chamel. 'Icha yet'l eb' chamnac, matz yactj 'el tas yamb'il yu'uj, 'ixta cab' qui chamc'ojlal tic, lajn cab' 'icha te stzac'ac' caw ow sn̈ilchji.

⁷ A smasnil a mar, matz tza'wni a ya'n tup jun qui chamc'ojlal tic, yet' pax eb' a niwc b'eymal a', matz techj ya'n tup eb' a'. Toto 'ay junc mach tzcob' yaltc smasnil sricoal yuj smann jun qui chamc'ojlal tic, cojn to tzb'uchx cab' yuj jun snab'en cha, xchi 'ix.

Tzyaln eb' snul'j 'ix cob'es:

⁸ A 'ix canb'ec tza'n 'unn to, mant 'a yim 'ix. ¿Tas tzcutjec, q'uinloc tzjaw sc'anmal 'ix 'ayn̈ec?

⁹ Q'uinloc lajn 'ix 'icha junc muro, to 'ixta', tzqui b'oc chan̈ junc n̈a 'a yib'n̈ 'ix to nab'a plata tz'aji. Q'uinloc pax lajn 'ix 'icha junc puerta, tztac' qui macn 'ix yet' te 'a'nte to c'ute', xchi eb'.

Tzyaln 'ix cob's cha:

¹⁰ An tic, lajn in wal 'icha junc muro, ax wim, lajn pax 'icha chab'oc torre. Yuj cha, caw wal tzalj ni quelm chi wet'oc.

¹¹ A Salomón, 'ay jun slum 'a Baal-hamón, ata 'awb'il jun tzo'n̈ uva yu'uj. 'Ix ya'n can 'a yol sc'ab' jun tzo'n̈ eb' tztan̈wni te', ax yic tzch'inn chan̈ eb' sat te uva cha, mil q'uen tumn plata tzyac' junjn eb' 'a winac.

¹² A q'uen mil cha, yic Salomón q'ue'en, ax cha'chb' ciente pax yic junjn ewin tztan̈wni te cha. An xo pax tic, 'ay pax wawb'en uva chi to mun wico', mun wojtac tas tzwutj in tan̈wni, xchi 'ix.

Tzyaln win quelm cha:

¹³ Ach cob's chamc'ojlb'il wu'uj, to 'aych 'ec' 'a scal te 'awb'ente', caw tzin nib'j tzwab' a paxtini. An̈jtona eb' qui wach'c'ojol, tznib'j pax eb' yab' a paxtini, xchi winac.

Tzyaln 'ix cob's cha:

¹⁴ Ach quelm chamc'ojlb'il wu'uj, carela a cot 'ayin. 'Ac' 'ip a b'ey 'icha no c'ultquil chej, 'icha wal junc no yune no c'ultquil chej 'ay 'a eb' lum tzalctac 'a 'aj 'ay eb' te incienso su'q'ui sjab', xchi 'ix.