Cantares 7 - Chuj San Sebastian Bible

Tzyaln win quelm cha:

¹ Ach cob'es, ach to yisl ach win rey, caw wach' yilx oc 'a yol a xan̈ab'. A yib' a xub', caw wach' yilx 'icha eb' q'uen oro sja'l wal yajch yelwnub'l yuj mach caw jeln sb'oni.

² A 'a c'ojol, lajn 'icha junc vaso b'utnn̈ej yet' yal uva; ax a nan̈al lajn wal 'icha jun yuchc trigo jalb'il tze'n yet' nichte'.

³ A chab' em, lajn 'icha chawn̈oc no cotc c'ultquil chej mojn 'aljnac.

⁴ A 'a jaj, lajn 'icha junc torre b'ob'il 'a q'uen marfil; a yol a sat, lajn 'icha chab' a pama 'ay 'a chon̈b' Hesbón, junn̈j yaj 'a stz'ey spuertail yic Bat-rabim; ax a n̈i', lajn 'icha jun torre yic Líbano, jun q'ueln 'at 'a stojlal chon̈b' Damasco.

⁵ A 'a jolom, chan̈ yaj cha'an̈, lajn 'icha lum jolm witz Carmelo; a xil a jolom, lajn yilx 'icha te ch'al púrpura. Caw nib'jub'tac yilx yaj 'ejm tzicn xil a jolm chi tzyil win rey.

⁶ Ach cob's chamc'ojlb'il wu'uj, caw nib'jub'tac elxi, caw wal yel xo wach' elxi.

⁷ Caw jichmtac a tel 'icha te palma; ax chab' em, lajn 'icha sc'ojlab'il sat te palma cha.

⁸ An tic, tzin nib'j tzin q'ue 'a sc'ab' te palma cha, sec tzwij 'emt sat te chi wico'oc. A em, lajn 'icha sc'ojlab'il sat te uva; ax xob' a ti', lajn sumntacl 'icha sjab' te mansan.

⁹ A wal yol a ti', lajn wal schil 'icha yal uva man̈x jantcoc schil tzwab'i, xchi winac. Yuc' cab' ni quelm chi te yal uva, tz'och 'a sti' masnto tzc'och 'a yip ye.

Tzyaln 'ix cob's cha:

¹⁰ A ni quelm cha, yic in na, caw nib'b'iln yuj na.

¹¹ Ach quelem, con̈ b'eyc'oc 'a b'esan. Ata tz'ec' junc 'ac'wl cuj 'a scal eb' te snichte alheña.

¹² Ax 'a yic tzq'uin̈lb'i 'a junx c'u, tz'at quilnc eb' te snun uva, lemb'il wan xo swoln eb' te', mto wan xo snichn eb' te'. Ax quiln paxi, toq'ue 'ayx pax snichte granado, atn wal ta 'oj in ch'ox in chamc'ojlal 'ayach.

¹³ A eb' te mandrágoras, caw wal su'q'ui spucl sjab' eb' te'. A 'a sti catut, til wal te lob'tzalte tz'el-li. 'Ay eb' te sat chi tacn̈ xo, 'ay pax eb' te tzat ch'inxi. Ach quelem, 'ay te ec molb'il can 'el wu'uj.