Cantares 6 - Chuj San Sebastian Bible

Tzyaln eb' 'anma':

¹ Ach cob's yel xo wach' yilx 'a scal eb' 'ix 'ix wach' yilxi, ¿'ajtil xc'och ni quelm chamc'ojlb'il oj cha? ¿'Ajtil x'atcn na, sec tzon̈ 'at qui say ni et' on̈? xchi eb'.

Tzyaln 'ix cob's cha:

² A ni quelm cha, 'ix 'at ni 'a 'aj 'ay yawb'ente' 'aj 'ay te su'q'ui yec' sjab', 'ix 'at ni stan̈wc wa scalnelu ta', yic tz'at saync cot ni eb' te nichte'.

³ An tic, yic in ni quelm cha, an̈jtona wic pax na. Ata tztan̈wj wa ni scalnelu 'a scal eb' te c'ultc 'ay snich, xchi 'ix.

Yol b'it Tzyaln win quelm cha:

⁴ Ach cob's 'ix to chamc'ojlb'il wu'uj, caw wal wach' elxi, nib'jub'tac elx 'icha lum chon̈b' Tirsa, yet' chon̈b' Jerusalén to 'ay xo smay yilxi, 'icha nan̈loc eb' soldado 'aych 'a yol b'e.

⁵ Colb'l xo in eln 'och cha, yujto montchjnacn xo yuj a sat cha. A xil a jolom, lajn wal yaj 'ejm tzicn 'icha yemt quitzcnoc no chiwo 'a lum spa'nil switzl Galaad.

⁶ A eb' q'uen e, caw sacn̈j eb' q'uen smasnil. Lajn wal yilx eb' q'uen 'icha yilx e no calnelu tzb'icxi. Caw latz'tz'i yilx eb' q'ue'en, tz'acn eb' q'uen smasnil.

⁷ A spac'b'il a ti', lajn yilx 'icha yojl chat'axc sat te granado polb'il 'ati, checl a sat chi 'a yojl te nip cha.

⁸ Wach'xam 'ay 60 eb' 'ix wistzil 'aych reinail, yet' 80 eb' 'ix in chab'l 'istzil, yet' pax eb' 'ix cob'stac to man̈x b'ischjb'enoc,

⁹ palta an tic, cojn wal ach tic wach'ch 'ayin. Lajn ach 'icha junc no 'uch may spaltail. Cojn ach caw xajn ach yuj a nun. A yic tzach 'ilx yuj eb' 'ix cob'stac, yuj eb' 'ix reina, yet' jun tzo'n̈ xo eb' 'ix, smasnil eb' 'ix, tzaln yuj swach'l elxi, xchi winac.

Tzyaln eb' 'anma':

¹⁰ ¿Mach jun chi tzch'ox sb'a cha, 'icha sch'oxn sb'a yoc c'u 'a yic tzq'uin̈lb'i? Lajn wal sja'l yilx 'icha 'uj, tzictzni yilx 'icha yoc c'u. 'Ay xo smay yilx 'icha nan̈loc eb' soldado 'aych 'a yol b'e, xchi eb'.

Tzyaln 'ix cob'es:

¹¹ In xit' b'eyc'oc 'a calc te nogales, yic tz'at wilnc smasnil te te tzwoln 'a lum pan̈an, 'ix in nib'j wal xwila toto wan scan sat te uva, yic tzwiln paxi toto wan scan snichte granado.

¹² Ax x'aji, ma'ix wila tas in 'aji, ax xwilni, coynto a 'a yol scaruaje win wajlil 'aj 'ayn 'ochi, xchi 'ix.

Tzyaln eb' 'anma':

¹³ Meltzjan̈ coti, meltzjan̈ cot ach sulamita, caw tzqui nib'j ach quila', xchi eb'. ¿Tas tze nib'j eyil 'ayn an sulamita in tic? xchi 'ix. Tzqui nib'j quil a q'ue b'atnjoc a chan̈lwi, 'icha chan̈l tz'och 'a camplamento, xchi eb'.