Cantares 5 - Chuj San Sebastian Bible

Tzyaln win quelm cha:

¹ Ach cob's 'ix to tzach 'och wistloc, tox xin 'och 'a scal te wawb'en te'. Wan in molb'tzan te 'in mirra yet' jun tzo'n̈ xo te su'q'ui sjab', wan pax in le'n no yal chab' tz'elt 'a sc'ate', wan pax wu'n yal in uva yet' in lech, xchi winac. Ex qui wach'c'ojol, wan̈ec, 'u'jec tas tzeyuq'uej, xchi eb'.

Tzyaln eb' 'anma': Schan̈l b'it Tzyaln 'ix cob's cha:

² Waync in cob'i', palta pitzn pax in nab'en. Ax xwab'ni, x'awj 'och ni quelm chamc'ojlb'il wuj chi 'a smac watut xyaln ni 'ixtic: Ach cob's 'unn chamc'ojlb'il wu'uj, caw wal wach' elx 'icha no 'uch may spaltail; jacn 'och 'a yol atut, yujto caw xlojx 'el xil in jolm yuj chicb'cha'an̈. Caw wal tz'ujlni xil in jolm yuj yal 'ac'wal, xchi ni 'ayin.

³ Yuj cha, xwaln 'ixtic: Tox 'ix wij 'el in pichul, ¿tom 'oj wa'x 'och jun 'ejm xo? Tox xin b'icl pax woc, ¿tom 'oj b'on̈xoc paxi? xin chi.

^4-6 Ax ni quelm cha, xya'n 'och ni sc'ab' 'a jun oln 'a smac watut. A yic xwab'n yawj 'och na, in q'ue jucnjoc 'a wet'ul, palta caw 'ijn in cham mu'c xwab'i. Xlajw cha, xin jacn smac watut cha, sec tz'och ni quelm chi walni, ax yic xin yamn sch'apl watut cha, 'ix tz'ujlni 'ejm yal mirra 'a yune in c'ab', 'ix 'em t'ujljoc 'a yib'n̈ te sch'apl smac watut cha. Ax yic xin jacn watut chi 'a ni quelm cha, ax x'aji, tox x'atx na. In cob' 'eltc in sayc' na, palta man̈x 'ic chax ni wu'uj, in cob' 'awj 'a na, palta man̈x 'ic ta'w ni 'ayin.

⁷ Ax x'aji, xin chan in b'a yet' eb' policia tztan̈wni jun chon̈b' cha, in sma'n eb', in lajw yuj eb', sto'n 'ec' eb' in potil.

⁸ Ex 'ix 'aj Jerusalén, 'a'c e ti eyaln 'a ni quelm chamc'ojlb'il wuj cha, alc yab' na, to wan in cham in nan na, xchi 'ix 'a eb'.

Tzyaln eb' 'anma':

⁹ Ach cob'x yel xo wach' yilx 'a scal eb' 'ix 'ix wach' yilxi, ¿tas wal swach'l win quelm chi 'ayach? ¿tom yel xo wach' winac, yuj cha, an̈ tzac' cac' qui ti oj on̈? xchi eb' 'ix.

Tzyaln 'ix cob's cha:

¹⁰ A ni quelm chamc'ojlb'il wuj cha, sac yilx na, chac b'och'nac pax janc yilx na, cojn ni 'ixta yilx 'a scal lajn̈e'oc mil eb' winac.

¹¹ A sat na, lajn yilx 'icha q'uen oro caw wach', c'olchtac xil sjolm na, caw wal q'uic' yilx xil sjolm ni chi 'icha yilx no joj.

¹² A yol sat na, lajn wal yilx 'icha chawn̈oc no 'uch tz'achn 'a sti a', 'icha to scal lech tz'achn no', tzlajw cha, ax 'a sti junc pama', ata tz'ilj no'.

¹³ A spac'b'il sti na, lajn wal 'icha junc lum 'aj 'awb'il te c'ultc tzyac' snich, til wal sja'l yec' sjab'. A sjab' sti na, lajn wal 'icha sjab' te mirra.

¹⁴ A sc'ab' na, lajn yilx 'icha junc q'uen oro xoyn xoj yaj sb'o'i, a q'uen topacio 'aych 'a spatic; ax sniwnal na, lajn yilx 'icha q'uen marfil, ax q'uen zafiro 'aych yelwnub'loc.

¹⁵ A yoc na, lajn yilx 'icha junc piral b'ob'il 'a q'uen mármol, te'n 'ejm q'uen 'a yib'n̈ sb'achnub'al nab'a oro, lajn pax yilx ni 'icha te c'ute niwc stel 'ay 'a Líbano.

¹⁶ A yic tzpaxtin na, caw wach' tas tzyal na, man̈x jantcoc snib'jub'tacl na, caw wal 'ay smon ni yet' smasnil tas tzyal cha. 'Ixtnta wal yilx ni quelm chi ex cob'stac 'aj Jerusalén, xchi 'ix.