Cantares 4 - Chuj San Sebastian Bible

Tzyaln win quelm cha:

¹ Ach cob's 'ix to chamc'ojlb'il wu'uj, caw wal wach' elxi, nib'jub'tac elx 'ochi. A yol a sat, caw wach' yaj 'elt q'ueln 'a yojl 'och te nip 'ay 'emt 'a a sat, lajn wal yilx 'icha yol sat no 'uch. A xil a jolom, lajn wal yaj 'ejm tzicn 'icha yemt quitzcnoc no chiwo 'a lum spa'nil switzl Galaad.

² A eb' q'uen e, caw sacn̈j eb' q'uen smasnil. Lajn wal yilx eb' q'uen 'icha yilx e no calnelu tzb'icxi yic tzlajw sjoxxi. Caw latz'tz'i yilx eb' q'ue'en, tz'acn eb' q'uen smasnil.

³ Caw chac yilx yol a ti' 'icha te chac ch'al, caw nib'jub'tac pax yilxi. A spac'b'il a ti', lajn yilx 'icha yojl chat'axc sat te granado polb'il 'ati, checl a sat chi 'a yojl te nip cha.

⁴ A 'a jaj, lajn wal yilx 'icha jun torre b'ob'il yuj David, jun 'aj locn 'och jun mil eb' q'uen smacl sat jul-lab' yic eb' 'a'm owl caw jelan.

⁵ A chab' em, lajn wal yilx 'icha chawn̈oc no cotc c'ultquil chej mojn 'aljnac, tzmontj wa sb'a 'a scal eb' te c'ultc 'ay snich.

⁶ Ya' sb'a mantzac sacb'eli, 'oj in 'at 'a lum jolm witz 'aj 'ay te mirra, yet' 'a eb' lum tzaln 'aj 'ay te incienso.

⁷ Ach cob's 'ix chamc'ojlb'il wu'uj, caw wal wach' yilx a niwnal smasnil, may tas palta 'a 'a.

⁸ Ach cob's 'ix to 'oj och wistloc, 'el con̈ 'a lum Líbano tic. 'Oj calcn qui b'a 'a lum jolm witz Amana, 'a lum jolm witz Senir yet' 'a lum jolm witz Hermón; a 'a lum jolm witz chi 'ay sn̈aq'uen e no león, a pax ta 'ay yet'l e no leopardo.

⁹ Ach cob's 'ix 'oj och wistloc, 'ix montchj wal in nab'en o'oj; jun 'ejm wal xa mutz' jun yol a sat 'ayin, xwiln pax 'och jun ch'an̈l a ton̈ locn 'och 'a a jaj, cojn wal cha, in montchj oj muc'uc.

¹⁰ Til wal sja'l jun a chamc'ojlal tic, yel xo wal wach' 'a yib'n̈ 'icha schil yal uva, yel xo pax wach' sjab' a perjuma tza c'an 'a yib'n̈ smasnil te su'q'ui sjab'.

¹¹ 'Icha wal to a no yal chab' 'aych 'a yol a ti', a tas tz'elt 'a yol a ti cha, lajn wal 'icha lech, 'icha pax yal chab'. Ax a pichul, yel xo su'mtac sjab' 'icha te c'ute 'ay 'a Líbano.

¹² Lajn ach wal 'icha junc 'awb'ente macnto scol-lal, 'icha pax junc a spac'b'a 'ayt q'ue smacl sti 'aj tzpac' a cha.

¹³ Lajn ach 'icha 'aj 'ay te 'awb'ente granado wan swolni, ax eb' te sat cha, caw wal chi eb' te', 'icha pax 'aj 'awb'il te alheña tznichni,

¹⁴ 'icha te nardo, te azafrán, te canela, te te su'q'ui sjab', te snun incienso, te mirra, te áloe, yet' smasnil te c'ultc su'q'ui sjab'.

¹⁵ Lajn ach pax 'icha a spac'b'a 'a scal te 'awb'ente', jun a to tzb'ey 'emt 'a lum Líbano, xchi winac.

Tzyaln 'ix cob's cha:

¹⁶ A 'ic' 'ay 'a stojlal norte, yet' 'ic' 'ay 'a stojlal sur, 'ec' cab' xummoc 'a scal te wawb'en te tic, sec wach' tzpucl sjab' te'. Ach quelm chamc'ojlb'il wu'uj, cotn̈ 'a 'aj 'ay te 'awb'ente tic, wul lo sat te', caw wal chi eb' te sat tic, xchi 'ix.