Cantares 3 - Chuj San Sebastian Bible

Tzyaln 'ix cob's cha:

¹ A 'a 'ac'wal, yic waync in 'a sat in ch'at, 'ix in waychej in sayn 'ec' ni quelm chamc'ojlb'il wuj cha, til wal cob' xin sayq'ui, palta ma'ix 'ilchj xon ni wu'uj.

² Yuj cha, in q'ue wa'an, xcob' in saync 'ec' ni 'a yol chon̈ab', xlaj in saync 'ec' ni 'a yoltc caye, 'a plas, palta ma'ix 'ilchj ni wu'uj.

³ Xlajw cha, xin c'anb'n 'a eb' policia tztan̈wni jun chon̈b' cha, xwaln 'a eb' 'ixtic: ¿May am 'aj xeyil ni quelm chamc'ojlb'il wu'uj? xin chi 'a eb'.

⁴ Jab'nant wal in cot 'a stz'ey ewinac, ax x'aji, xin chan in b'a yet' ni quelm cha. In 'och quetzn 'a sc'ab' na, man̈x 'ic wactj 'el na, 'ix wi'n 'at ni 'a yatut 'unx in nun, atn 'a jun scuarto 'unx 'aj 'aljnac in, xchi 'ix.

Tzyaln win quelm cha:

⁵ Ex cob'stac 'ix 'aj Jerusalén, ta'wjec can e ti'oc, tze locn sb'i e no c'ultquil chej 'a calte', to man̈ e pitzl swayn̈ 'unx cob's chamc'ojlb'il wu'uj, munto 'oj 'el swayan̈, xchi winac.

Yoxl b'it Tzyaln eb' 'anma':

⁶ ¿Tas jun wan scot 'a cusltac lum cha, a tzquila to scal tab' 'aychi yic tzcot cha? A jun cha, stab'l te mirra yet' stab'l incienso, stab'l pax jun tzo'n̈ xo tas su'q'ui sjab'.

⁷ Atn eb' sb'achmal b'ey Salomón, 'ay 60 soldado tza'n 'och yu'uj, atn eb' israel caw jeln 'a owal.

⁸ 'Ay yespada eb' smasnil, t'un̈n 'och yespada eb' chi 'a snan̈al, caw wal jeln eb' 'a owl cha; caw lista yaj eb', lemb'il 'ay owl tz'och 'a 'ac'wal.

⁹ Ax rey Salomón, xyac' b'o jun sb'achnb'il b'ey 'a te 'a'nte tzcot 'a Líbano.

¹⁰ A yoyl yamjnac, nab'a plata, ax 'aj tz'och 'ijn yichspatic, nab'a oro; ax 'aj tz'em wocan, a te nip púrpura 'ay 'ejm 'a sat; ax 'a yojl cha, 'aych yelwnub'l yuj eb' 'ix 'ix 'aj Jerusalén yuj sch'oxn eb' schamc'ojlal 'a 'a.

¹¹ Ex 'ix 'aj Jerusalén, 'eln̈ect eyil sjaw rey Salomón. 'Ay q'ue scorona 'a sjolom, atn jun 'ac'b'il q'ue 'a sjolm yuj snun, jun 'oj sc'ana', yic 'oj 'och 'a nupnel. A 'a jun c'u cha, til wal tzaljc'ojlal 'oj 'och ta', xchi eb' 'anma'.