Cantares 1 - Chuj San Sebastian Bible

¹ A jun tzo'n̈ tic, sb'it rey Salomón, man̈x jantcoc swach'l yalxi.

B'ab'l b'it Spaxti 'ix cob'es:

² Ach quelm to chamc'ojlb'il wu'uj, ¡tz'ub' 'elt jac in ti'! Yujto yel xo wach' tzwab' 'a yib'n̈ te yal uva.

³ Caw wach' yec' a jab' yuj perjuma 'aych 'ayach, ax a b'inaxi, lajn wal 'icha sjab' perjuma cha. Yuj cha, caw wal nib'b'ilch yuj eb' 'ix 'ix.

⁴ 'Ij in 'at 'a atut ach rey, c'olep, con̈ muc'uc, xchi 'ix. Caw 'oj cac' tzaljoc qui c'ojl et'oc; 'oj qui na cot a chamc'ojlal cha, yujto 'ec'b'al swach'l 'a yib'n̈ te yal uva. 'Into yuj cha, tzach snib'n eb' 'ix 'ix tic, xchi eb'.

Tzyaln eb' 'anma': Tzyaln 'ix cob's cha:

⁵ Ex 'ix 'aj Jerusalén, an tic q'uic' 'ixl wilxi, palta caw wach' wilx 'ochi. Q'uic' cab' wilx 'icha yilx smantiado eb' 'aj Cedar, palta wach' pax wilx 'icha te cortina 'aych 'a yol yatut Salomón.

⁶ Man̈ ex 'och wal q'ueln 'ayn yuj sq'ui'l wilxi, yujto mac'b'iln yuj yoc c'u. Cotnc yowl ewin in nul'j 'ayin, yuj cha, in ya'n 'och ewin tan̈j uva, ax x'aji, ma'ix in ya'ilj in b'a.

⁷ Ach quelm to chamc'ojlb'il wu'uj, al 'ayin ¿'ajtil tzach 'ilw calnelu? ¿'ajtil tzej 'at e no 'iljoc 'a chimc'ual? ¿Tas yuj ton̈j tzin satc 'icha junc 'ix 'ix ton̈j tzb'eyc' 'a stz'ey eb' et 'ilm calnelual? xchi 'ix.

Tzyaln win quelm 'ixtic:

⁸ Ach cob's 'ix to chamc'ojlb'il wu'uj, yel wach' elx 'a scal eb' 'ix 'ix caw wach' yilxi, toto man̈ ojcoc, 'ochn̈ tza'n yuj yoc e no calnelu cha, axta tza tan̈wj wa e no a cotc chiwo 'a stz'ey spat ewin 'ilm calnelu cha.

⁹ Ach cob's 'ix, caw wach' yilx a b'ey 'icha no chej tzto'n scaruaje win faraón.

¹⁰ Sja'l wal yilx spac'b'il a ti 'a scal a yumchiquin. Sja'l pax yilx a jaj 'a 'aj 'aych a ton̈.

¹¹ 'Oj qui b'o wal a yumchicn to nab'a oro, ax ca'n 'och yelwnub'l to nab'a plata, xchi winac.

Tzyaln 'ix cob's cha:

¹² Ya' sb'a wocn 'ejm win rey 'a smexa, ax te nardo tzpucl su'mtacl sjab' te 'ayin.

¹³ Ach quelm to chamc'ojlb'il wu'uj, lajn ach wal 'icha jun tzec'oc te mirra to su'q'ui sjab' 'ayc' 'a snan̈l wim.

¹⁴ Ach quelm to chamc'ojlb'il wu'uj, lajn ach wal tzwab' 'icha te snichte alheña, te 'ay 'a scal te 'awb'ente 'a En-gadi, xchi 'ix.

Tzyaln win quelm cha:

¹⁵ Ach cob's 'ix chamc'ojlb'il wu'uj, caw wach' elxi, sja'l wal yilx yol a sat 'icha no 'uch, xchi winac.

Tzyaln 'ix cob's cha:

¹⁶ Ach quelm to chamc'ojlb'il wu'uj, man̈x jantcoc sja'l elxi, caw wal wach' elxi. Ax qui waynub', caw wal nichtetac yilxi, xchi 'ix.

Tzyaln win quelm cha:

¹⁷ A spatzb'il catut, caw wal nab'a c'ute', ax yib'an̈, a te q'uisis latz'b'il q'ue 'a yib'n̈ cha, xchi winac.