Apoc 8 - Chuj San Sebastian Bible

A jun yucl seyo

¹ Ax jun tzcuch Calnelu cha, a yic 'ix sn̈i'chtan jun yucl seyo cha, caw sictac x'aj 'a satchan̈ junc am mel-l hora.

² Ax xwilni, lin̈n 'ec' ucwn̈ ángel 'a yojltac Dios, 'ix 'ajx strompeta junjn eb'.

³ Xlajwn̈ej cha, 'ix jaw junx ángel yet' jun tz'ab'c'ac' nab'a oro, yet'l 'aj tz'a incienso. 'Ix c'och lin̈n yet' 'a yojltac jun yet'l xajmb'al. Caw niwn incienso chi 'ix 'ajx 'a 'a, yic tzn̈usn 'a yib'n̈ jun yet'l xajmb'al nab'a oro 'ayc' 'a yojltac jun despacho cha. A yic xc'och su'q'uil sjab' jun incienso cha, 'ix c'och pax slesl eb' yic xo Dios yet'oc.

⁴ A jun incienso cha, 'ix q'ue stab'l 'a yol sc'ab' jun ángel chi yet' slesl eb' yic xo Dios cha, 'ix c'och 'a Dios.

⁵ Xlajw cha, xyi'n cot jun ángel chi jun tzo'n̈ stzac'ac' 'ay q'ue 'a yib'n̈ jun yet'l xajmb'al. 'Ix ya'n 'ejm 'a yojl jun stz'ab'c'ac' cha, caw xb'ut'j yu'uj. Xlajw cha, 'ix sjuln 'ejm 'a yolyib'n̈q'uinal. Xlajwn̈ej cha, 'ix syamn 'och sc'an̈ c'u, yet' jun tzo'n̈ xo tas xlaj c'an̈i. Xlaj 'ec' pax raya. 'Ix 'ec' pax jun quixcab'.

A jun tzo'n̈ trompeta tz'utz'xi

⁶ Ax eb' ángel yucwn̈il, xyac' lista junjn eb' strompeta, yic tzyutz'n eb'.

⁷ 'Ix yutz'n jun b'ab'l ángel strompeta. Yajn̈j wal cha, ax sacb'at, yet' c'ac', caln yaj yet' chic'. 'Ix julx 'ejm 'a sat lu'um. Yuj cha, jab'xoj man̈ spacloc lum xtz'a'i. An̈jtona te te smasnil, jab'xoj man̈ spacloc xtz'a'i. Ax te c'ultac, c'uxn 'ix tz'a te smasnil.

⁸ 'Ix yutz'n jun schab'l ángel strompeta. Yajn̈j cha, 'ay jun 'icha niwquil witz wan stz'a'i. 'Ix julx 'ejm 'a yojl a mar. Yuj cha, jab'xoj man̈ spacloc a mar chi x'och chic'al.

⁹ Ax no noc' 'ay 'a yojl a mar cha, jab'xoj man̈ spacloc no xchami. Yet' pax jun tzo'n̈ barco, jab'xoj man̈ spacloc xlajwi.

¹⁰ 'Ix yutz'n jun yoxl ángel strompeta. Ax jun niwquil c'anal 'a satcha'an̈, yajn̈ej x'ejmi. Caw stz'a 'icha stz'a junc taj. Jab'xoj man̈ spacloc a niwc a', yet' a spac'b'a 'ajtil xlaj 'ejmi.

¹¹ A jun c'anal cha, 'Ixaj sb'i. Ax jun tzo'n̈ a chi 'aj xlaj 'ejmi, caw lajn x'aj yet' yalil 'ixaj. Til wal 'anma xlaj cham yuj a a cha, yujto caw c'a x'aj a'.

¹² 'Ix yutz'n jun schan̈l ángel strompeta. Yajn̈j wal cha, jab'xoj man̈ spacloc x'aj sjuw c'u, yet' 'uj, yet' pax c'anal. Jab'xoj man̈ spacloc x'aj sq'uic'b' eb'. Yuj cha, junjn c'u man̈x 'a wal sacq'uinal, ax 'a junjn 'ac'wal, man̈x 'a wal yoc 'uj yet' c'anal.

¹³ Xlajw cha, xwilni, 'ay jun ángel tzjen̈n̈ 'ec' 'a snan̈l satcha'an̈. Ax xwab'ni, caw 'ip x'awj 'ixtic: —¡'Ay, 'ay, 'ay! 'Oltac wal eb' 'anma 'a yolyib'n̈q'uinal, yujto 'ayt 'oxwn̈ xo eb' ángel tot 'oj yutz'c strompeta, xchi.