Apoc 20 - Chuj San Sebastian Bible

A jun mil ab'il

¹ Xlajw cha, xwilni, 'ay jun ángel xcot 'a satcha'an̈, 'ix 'eml 'a yolyib'n̈q'uinal. Yet' syaweal jun xab' olan. Yamb'il jun niwquil cadena yu'uj.

² 'Ix c'och 'a win dragón yic tzyamn coti. A win dragón cha, atn jun ya'jnac 'och sb'a chanl 'a pecti', atn win diablo, win Satanás. Ax jun ángel chi 'ix jaln winac. Jun mil ab'il 'oj jalx can win yu'uj.

³ 'Ix sjuln can 'at 'a yol jun xab' olan. Xlajw cha, 'ix smacn can sti jun xab' oln cha. 'Ix ya'n can 'och jun seyo 'a 'a, sec man̈xtzac stac' yixtn paxti win eb' 'anma 'a junjn nacion̈, masnto tz'acw jun mil ab'il. At 'a yic 'oj lajwc jun mil ab'il cha, ax yajx 'elt win jab'ocx tiempoal.

⁴ Ax xwilni, 'ay jun tzo'n̈ despacho. Ata wocn 'ejm jun tzo'n̈ eb' 'ac'b'il yopiso sb'eyc'ojlwi. 'Ix wiln pax spixn jun tzo'n̈ eb' tzuc'b'il 'el sjolom, yujto ya'jnac testigoal sb'a eb' yuj Jesús, yaln pax 'el eb' spaxti Dios. A eb' cha, ma'ix yal sb'a eb' 'a jun noc' sb'i, yet' 'a jun yechel. Ma'ix schaj 'och eb' senyail 'a snan̈l sat mto 'a sc'ab'. Ax xwilni, pitzn eb'. 'Aych eb' yajlil jun mil ab'il yet' Cristo.

⁵ Ax jun tzo'n̈ xo eb' chamnc to, mantzac pitzw pax eb', masnto 'oj tz'acwc jun mil ab'il. Ax eb' 'ayc' yet' Cristo, atn eb' b'ab'l pitzwnac.

⁶ Caw wach' yic eb' tzb'ab'l pitzw cha. Yicn̈ej Dios yaj eb'. May spoder jun schab'l chaml 'a yib'n̈ eb'. 'Oj 'ajxc yopiso eb' ya'n 'och sti 'a Dios yet' 'a Cristo. Jun mil ab'il 'oj yac' eb' yajlil yet'oc.

'Emnc win diablo

⁷ Ax yic 'oj tz'acwc jun mil ab'il cha, ax sjacx pax q'uet win Satanás 'a 'aj 'aycn 'ejm 'a preso cha.

⁸ C'uxn 'oj 'ec' yixtc paxti win eb' 'anma 'a junjn nacion̈ 'a yolyib'n̈q'uinal. 'Oj yixtc paxti jun Gog sb'i yet' jun Magog. Ax jun tzo'n̈ soldado yic Gog yet' Magog cha, 'oj yac' win Satanás syam sb'a eb' yuj owal. Ax eb' soldado cha, caw niwn eb' 'icha yarenail sti a mar.

⁹ A yic 'oj 'at eb' yac' owal, caw 'oj macchjoc 'el sat yolyib'n̈q'uinl yuj eb'. 'Oj c'och oynjoc eb' 'a jun slugar eb' yic xo Dios macb'ilx yu'uj, atn jun chon̈b' chamc'ojlb'ilx yu'uj. Ax Dios 'oj 'anc 'emt c'ac' 'a satcha'an̈, ax yejm 'a yib'n̈ eb' soldado cha. C'uxn 'oj tz'a eb' smasnil.

¹⁰ Ax win diablo, win 'ix 'ixtn paxti eb' cha, 'oj julx can 'at 'a scal jun niwquil c'ac' tzn̈ilchji, caln yaj yet' azufre, 'icha pama', atn 'aj julb'il can 'at jun noc' sb'i, yet' jun cob' yaljnac 'och sb'a schecb'oc Dios. Sc'ual yac'wlil 'oj yab' eb' syal ta 'a smasnil tiempo.

Tzb'eyc'ojlax eb' 'anma smasnil

¹¹ Xlajw cha, xwiln jun wocn 'ejm 'a jun niwquil despacho caw sac. Ax 'a yojltac, ata 'ix satl yolyib'n̈q'uinal, yet' satcha'an̈. Man̈x 'a 'aj 'ix 'ilchj jac sc'ajil.

¹² Ax xwiln eb' chamnc smasnil, eb' niwn yel'chi, yet' eb' may yel'chi, lin̈n 'ec' eb' 'a yojltac Dios smasnil. Xlajw cha, xjacw jun tzo'n̈ ch'an̈ libro. 'Ay pax junx 'ix jacwi, atn jun libro yic q'uinl 'a jun 'ejmn̈ej. 'Ix b'eyc'ojlax eb' yuj tastc sb'ojnac jun jun. A tzyala, tastc tz'ib'b'il 'a jun tzo'n̈ libro cha.

¹³ Ax a mar, c'uxn xyac' pitzwc eb' chamnc 'ay 'a 'a. 'Ixta pax jun chamel, yet' jun yet'l spixn eb' chamnac, c'uxn xyac' pitzwc pax jantcn̈ej eb' 'ay 'a 'a. Yuj cha, 'ix b'eyc'ojlax eb' smasnil. A tzyala, tastc sb'ojnac junjn eb'.

¹⁴ Ax jun chaml cha, yet' jun yet'l spixn eb' chamnac, 'ix julx can 'at 'a scal jun niwquil c'ac' tzn̈ilchji, jun 'icha pama'. A jun c'ac' cha, atn jun schab'l chamel.

¹⁵ Jantcn̈ej eb' man̈ tz'ib'b'ilc sb'i 'a jun libro yic q'uinl 'a jun 'ejmn̈ej, an̈jta xjulx can 'at eb'.