Apoc 16 - Chuj San Sebastian Bible

A uque vaso yic yowl sc'ojl Dios

¹ Xlajw cha, xwab'n yoch jun paxti 'a jun Lugar caw yicn̈ej Dios yaj sch'ocoj. Caw 'ip yaln 'ixtc 'a eb' ángel chi yucwn̈il: —'Ixquec, 'at secc 'ejm sb'al uque vaso chi 'a yolyib'n̈q'uinal. A sb'al cha, atn yowl sc'ojl Dios, xchi.

² Yuj cha, 'ix 'at jun b'ab'l ángel, x'at secnc 'ejm sb'al svaso chi 'a sat lu'um. Ax jantcn̈ej eb' 'aj 'aych senyail jun noc' sb'i, eb' xlaj yal sb'a 'a jun yechel, 'ix pitzw jun tzo'n̈ niwc yab'il 'a sniwnal eb'. Caw maysch'olnil, caw wal tzyab' eb' syal yu'uj.

³ Xlajw cha, ax jun schab'l ángel, 'ix secn 'ejm sb'al svaso chi 'a yib'n̈ a mar. Ax a mar cha, x'och a chic'al, 'icha xo schic'l junc chamnc 'anma', 'ixta x'aj a'. Yuj cha, c'uxn xcham jantcn̈ej tas 'ay 'a yojl a'.

⁴ Xlajw cha, ax jun yoxl ángel, 'ix secn 'ejm sb'al svaso 'a yib'n̈ smasnil a niwc a', yet' 'a spac'b'a'. Yuj cha, c'uxn x'och pax smasnil a a chi chic'al.

⁵ Ax xwab'ni, a jun ángel 'aych syajlilc a a cha, xyaln 'ixtic: —Mamin, ach Dios, cojxn ach wach' ach. 'Aych 'ec' ticnec, 'aych 'ec'n̈ej yictax pecti'. Caw tojl xotj a b'eyc'ojlan eb' yet' jun xa b'o tic.

⁶ Yujto a eb' 'anma', xlaj smac' 'elt eb' schic'l eb' eco', yet' eb' a checab'. Yuj cha, cojxn chic' tzac' yuc' eb' 'anma ticnec. ¡Caw smoj 'ixta tz'aj eb'! xchi.

⁷ Ax xwab'ni, 'ay jun 'ayc' 'a yet'l xajmb'al, xyaln pax 'ixtic: —Yel Mamin, Dios ach, smasnil tas tztac' o'oj. Caw yel tojl xotj a b'eyc'ojlan eb' 'anma', xchi.

⁸ Xlajw cha, ax jun schan̈l ángel, 'ix secn 'ejm sb'al svaso 'a yib'n̈ c'u. Yuj cha, x'ajx spoder c'u, yic tz'a eb' 'anma yuj sc'aq'uil.

⁹ Caw xlaj tz'a eb' 'anma smasnil yuj yoc c'u. Palta an̈ja man̈ jac 'ix sna sb'a eb' jab'oc. Toxn ma'ix yal eb' chajtlto niwn yel'ch Dios. Ton̈j xb'uchwj eb' 'a 'a, yujto 'ay spoder ya'n jun tzo'n̈ yailal cha.

¹⁰ Xlajw cha, ax jun yol ángel, 'ix secn 'ejm sb'al svaso 'a yib'n̈ sdespacho jun noc' sb'i. Yuj cha, caw q'uic'q'uinl x'aj jantcn̈ej 'aj tzyac' yajlil. Ax eb' 'anma cha, caw xchi eb' yac' yuj yab'n syail.

¹¹ Palta an̈j 'ijnoc ma'ix sna sb'a eb' jab'oc. Ton̈j xwach' b'uchwj eb' 'a Dios 'a satchan̈ yuj jun tzo'n̈ yailal xlaj yab'i', yet' jun tzo'n̈ yab'il 'ay q'ue 'a sniwnal eb' cha.

¹² Xlajw cha, ax jun swacl ángel, 'ix secn 'ejm sb'al svaso 'a yib'n̈ a niwquil a Éufrates. Ax jun a cha, 'ix tupi. 'Ix tacj can sb'e a'. 'Ixta x'aj sb'o jun sb'e eb' yajl xcot 'a stojlal 'aj tzq'uel c'u.

¹³ Ax xwilni, 'ayc' win dragón, yet' jun noc' sb'i, yet' jun xcob' yalch sb'a schecb'oc Dios. A 'a sti junjn eb', ata x'elt junjn demonio. 'Icha yilx no pajtza', 'ixta junjn eb' demonio chi yoxwn̈il.

¹⁴ A 'oxwn̈ eb' demonio cha, checb' yaj eb' yic tzch'oxn eb' jun tzo'n̈ milagro. X'at eb' yac' syam sb'a jantcn̈ej eb' niwc yajl 'a smasnil yolyib'n̈q'uinal, yic tzya'n eb' owl 'a yic jun c'u niwn yel'ch yic Dios, atn Dios tztac' yuj smasnil.

¹⁵ 'Ix yaln Cajlilec 'ixtic: 'Ab'ec, 'icha sc'och junc 'elc'um, 'ixta 'oj in c'och tza'njoc. A wal ex lista eyaji, caw wach' eyico'. 'Icha to man̈ ex wayn̈coc, 'icha to 'aych e pichul. Ax xo ex man̈ listaoc eyaji, ax in c'ochi, 'icha to jitn ex 'eli, ax e b'eyc' 'a sat eb' 'anma smasnil. Caw 'oj eyac' e q'uixwloc, xchi.

¹⁶ Ax eb' demonio cha, 'ix ya'n eb' syam sb'a eb' niwc yajl 'a jun lugar Armagedón sb'i 'a hebreo.

¹⁷ Xlajw cha, ax jun yucl ángel, 'ix secn 'ejm sb'al svaso 'a scal 'ic'. Ax 'a sdespacho Dios, 'a yojl jun Lugar yicn̈ej yaj sch'ocoj, ata x'elt jun paxti'. Caw 'ip yaln 'ixtic: —'Ix b'o 'el'chi, xchi.

¹⁸ Yajn̈j wal cha, x'ec' jun tzo'n̈ raya. 'Ix laj c'an̈ c'u. 'Ay pax jun tzo'n̈ xo tas xlaj c'an̈i. 'Ix 'ec' wal jun niwquil quixcab'. Yictax mant 'a 'anma 'a yolyib'n̈q'uinal, mant xon junc quixcab' 'e'nc 'icha jun cha.

¹⁹ A jun niwquil chon̈ab', 'oxe x'eli. Ax smasnil chon̈b' 'a yolyib'n̈q'uinal, c'uxn xlaj lan̈chj 'ejmi. Ax Dios, 'ix snan cot stul jun niwquil chon̈b' tzcuch Babilonia. 'Ix ya'n 'at junx niwn yailal 'a yib'n̈ eb' yuj yowl sc'ojol. 'Icha to xyac' yuc' junjn eb' jun yal uva jawnc sti'.

²⁰ Smasnil jun tzo'n̈ lum lum checl 'a snan̈l a mar, yet' smasnil lum witz, c'uxn 'ix sat 'ejmi.

²¹ Xlajw cha, 'ix 'ejm wal jun tzo'n̈ sacb'at caw niwac. 'Aym junjnoc quintal yal-l jun jun. Ax eb' 'anma', caw xlaj b'uchwj eb' 'a Dios yuj jun tzo'n̈ sacb'at cha, yujto caw niwn xyab' eb' syal yu'uj.